Question
Añí Isár uore iman ainní… Yalá ki goittám?
Answer
Tuñí mubarek! Tuñí zindigi bodole de faiséla goijjó! Tuñí fusár goródde, “Yalá ki goittám? Añí Allar fúañti añár sófor oré keéngorí cúrur goijjúm?” Nisé Allar Kalam (Baibél) ottú fáñs-sán hotá diyá giyé ziíne keéngorí solibóu de yían ciká. Zeéñtte tuáñttu ruú-hanir sófor or baabute suwál aiyé héeñtte dooya gorí íibat zai foijjó: https://www.gotquestions.org/Rohingya
1. Nejat or baabute sóyi gorí buziyó.
1 Yuhúnna 5:13, añára re hoóde, “E hotá iín añí tuáñra zetará Allar Fuar nam or uore biccác goijjó ítarár hañsé leikkí dé, zeéne tuáñra ofúrani zibon tuáñra ttú asé de yían zani faro.” Alla ye saáde ki, añára nejat or baabute bála gorí buzi edde añára nejat faiyí de yían añára fura furi zani. Añára Baiththár saáñtte nejat or baabute dorhári hotá gún saái:
(a) Añára fottí ekzone guná goijjí ar Alla re ziíne naráz goré híin goijjí (Romiyól 3:23).
(b) Añárár gunár zoriyá añára faiyí de cáñza yían óilde Alla ttú ofúrani llá alok óizongoi (Romiyól 6:23).
(c) Isá ye añárár gunár dam fuñjitóu kúruc or uore moijjé (Romiyól 5:8; 2 Kórintiyóol 5:21). Añára faitám de cáñza híin Isá Nizor uore loi añárár zagat moijjé. Isá mora ttú zinda ói uiththe de yiáne saabut goré de ki, Ibár moot añárár gunár dam fuñji bólla kafi.
(d) Alla ye nejat edde gunár maf uitará re de zetarár iman Isár uore rake edde Isár moot gunár dam de yían biccác goré. (Yuhúnna 3:16; Romiyól 5:1; Romiyól 8:1).
Yián óilde nejat or hóbor! Zodi tuñí Isá Moósi re tuáñr Basáiloiya ísafe biccác goró tóoile tuñí nejat faiyó! Tuáñr hárr guná maf gorá zaibóu edde Alla ye tuáñre eri no dibóu ar no yó foráibóu (Romiyól 8:38-39; Moti 28:20). Yián monot raikkó de ki, tuáñr nejat Isá Moósir butore hefazot asé (Yuhúnna 10:28-29). Zodi tuñí Isá Moósi re tuáñr Basailoya hoói biccác goró tóoile tuñí ofúrani zindigi Allar fúañti jonnót ot haçái faribá!
2. Pak Kalam (Baibél) or baabute sóyi cikká dede hendillá eggwá zomát tuwó.
Zomát mani manúic or dhaái. Yián bicí zorúri de, añára zetará Isáyí imandaar así añára fottí ekzon ottú mili táka foribóu. Yían óilde Isáyí zomát or mossús ókkol or foóila mossús. Yalá tuñí Isá Moósir uore iman ainnó, yían ólla añára tuáñre ekkáda Pak Kalam (Baibél) or baabute sóyi cikká dede Isáyí zomát oré tuwái bólla edde Isáyí zomát or cikká doiya (Pastor) loi mili bólla hoói. Isáyí zomát or cikká doiya (Pastor) oré tuñí Isár uore iman ainnó de yían zanái-dóu.
Isáyí zomát or dui lombór or mossús óilde Pak Kalam (Baibél) oré cikón. Tuñí Allar cikká re tuáñr zindigit keéngori lagai faribá de yían ciki fariba. Tuñí Allar Kalam (Baibél) buzíle ekkadá kaamiyabi edde taakoti Isáyí zindigi haçái faribá. 2Timoti 3:16-17 hoóde, “Pak-kitab or hárr hotá Allar hañsóttu nazil óiye, ar híin taalim dite, sábut goitté, sóyi goitté, sóyi zindigi haçai bólla nosíyot goitté dorhari, zeéne Allar bonda bilkúl kabil ói fottí gom ham ólla toiyair táke.”
Isáyí zomát or tin lombór or mossús óilde, Ebaadot gorá. Ebaadot gorá óilde, Alla ye goijjé de híin óllla Íba re cúkuria zaná! Alla ye añára re nejat diyé. Alla ye añára re muhábbot goré. Alla ye añára ttú lage de sis ókkol añára re milai de. Alla ye añára re saáñt de edde sóyit sola. Añára Allar cúkur kiyá no goittám? Allar Pak, Forhésgar, Muhábbot olá, Dooya olá, edde Rahám óla. Zahéri 4:11 hoóde, “Óu añárár Malik edde añárár Alla, Tuñí taarif, izzot edde kudurut faibar laayek, kiyólla-hoilé Tuñí hárr kessú foida goijjó ar Tuáñr issá ye híin foida óiye edde asé.”
3. Alla re fottí din thaim dibólla thaim rakó.
Alla re fottí din thaim doón-nan añára ttú bicí zorúri . Kessú maincé yían oré “Isáyí zomát miloón” ar kessú ye yían oré hoóde, “Ebaadot gorá,” kiyólla hoilé hé thaim ot añára añárár dil-mon Alla re gosái di. Kessú maincé hé thaim hibá re biína rake, ar kessú maincé hañzinná rake. Tuñí he thaim hibá re ki nam loi dhakó yatóu hoóñtte rako yián llói honó mosólla nái montor mosólla uwán llói asé ki, tuñí Alla re hámicá thaim doóne. Ki thaim ot añárár thaim Alla re di?
(a) Munazát. Munazát mani, Alla llói hotá hoón. Alla re tuáñr bafani edde mosibot ókkol or baabute hoón. Tuáñre giyán edde saáñt dibólla tuñí Alla re hoón. Tuáñre tuáñttú lage de híin dibólla tuñí Alla re hoón. Tuñí Alla re hoddúr muhábbot goró edde Íba ye tuáñr llá goijjé de híin ollá tuñí Íba re hoddúr taarif goró de yían tuñí Alla re hoón óilde munazát.
(b) Pak Kalam (Baibél) forá. Pak Kalam (Baibél) oré dormo gór ót, Roibaijjá Eskul ot edde ustat ókkol ottú ciká foribóu edde nizottú yó forá foribóu. Isáyí Kaamiyabi zindigi haçái bólla lage de fottí ekkán sis Pak Kalam (Baibél) ot asé. Ibát asé de: gayáni faiséla gorí bollá Alla ye saáñt de, Allar issá re keéngori zaniyúm, arekzon oré keéngori hedmot goriyúm edde Ruú-hanir zindigit keéngori tórki oi fariyúm. Pak Kalam (Baibél) óilde añárár háñse Allar hotá. Pak Kalam (Baibél) óilde Allar nosíyot or Boói, ziba ye, añárár zindigi re Allar mozin edde furáfuri gorí keéngori haçáiyúm de híin cika.
4. Uitará llói taalukot takóu zetará tuáñre ruú-hanir zindigit baari bólla modot gorí fare.
1 Kórintiyól 15:33, añára re hoóde, “Dúka na háiyo, “Horáf sáañti ye gom adot oré hóraf goré.” Pak Kalame (Baibele) horaf sollá dede ítarár baabute úñciyari diyé. Gunár ham goré de ítara llói thaim haçáile añára re yó gunár ham gorá baibóu. Ítarár horáf adot añárár eçé yó faráibóu.Yían ólla añárár thaim uitarár fúañti haçoón-nán bicí zorúri, zetará Malik Moósi re muhábbot goré edde nizore nize Moósir háñse gosái diyé.
Tuáñr zomát or butottú ek yatóu dui zon manúic tuwó zetará tuáñre nosíyot gorí faré. (Híbraniyól 3:13; 10:24). Tuáñr dusto ókkol oré tuñí súp takóu de tthaim ot, tuáñr ham ot edde Allar fúañti thaim haçóu de thaim ot sáañt dibólla hoó. Zodi tuñí gorí faille tuñí yó goijjó. Yián or maáni honó endilla no de ki, tuáñttú tuáñr dusto zetará Isá Moósi re Basáiloiya hoói no zane, itará loi dustigiri báñgi fela foribóu. Ítará llói dustigiri no báñgiyó bolke ítara re muhábbot goró. Tuáñr zibon bodoillé de yían edde tuñí horáf ham goittá de híin ar no goríba de yían ítará re zanái dóu. Tarár háñse Isár baabute hotá hoói farófan Alla ttú bála mouka magóu.
5. Bapthísma loo.
Bapthísmar baabute bicí manúic ottú gollót buza asé. “baptize” or mani “fanít maze duuf maroon.” Pak Kalam (Baibél) or mozin bapthísma luwa ye dehá de tuñí Moósir uore iman ainnó edde Íbar fisé zaibólla nizore gosái diyó. Fanít duuf mara ye dehá de Isár fúañti dohoón gorá giyé. Fanír duuf ottú uçá ye dehá de Isá Moósir fúañti mora ttú zinda ói uiththó. Bapthísma luwa ye dehá de tuñí Isár fúañti moijjó, dohoón óiyo, edde zinda ói uiththó (Romiyól 6:3-4).
Bapthísma ye tuáñre no basá edde tuáñr guná yó duúi no felé montor bapthísma hoóde yíane sírif tuñí formádar de yián dehá - nejat faibólla tuñí Moósir uore iman ainnó de yían hoó. Bapthísma hoóde yían zorúri kiyólla hoilé yíane dehá de tuñí formádar, tuñí bapthísma lói dehoódde tuñí Isá Moósir uore iman ainnó edde nizore tuñí Íbar átt ot gosái diyó. Zodi tuñí bapthísma loitóu soó, tóoile Isáyí zomát or cikká doiya (Pastor) loi miliyó.
English
Añí Isár uore iman ainní… Yalá ki goittám?