Uira'a
Nö fa'aro'o na vau ia Ietu...nähea atu ai?
Pähonora'a
Mea maita'i ! Mea maita'i teie fa'aotira'a tä 'oe nö tö 'oe orara'a ! Të uiui nei paha te mana'o ë, nähea atu ai ? Nähea teie tere 'äpï nä muri i te Atua ? Nä roto i teie pu'e a'ora'a e pae i raro a'e nei, e fa'a'ite te Pïpïria ia 'oe te 'ë'a. Mai te mea e uira'a atu tä 'oe i ni'a i tö 'oe tere, 'a täpapa ia : www.GotQuestions.org/Tahitian.
1. 'A ha'apäpü ia 'oe ra 'ua ta'a maita'i 'oe e aha te fa'aorara'a.
'Ua parau o 1 Ioane 5:13, "'ua päpa'i au i teie nei mau parau ia 'outou nei, 'ia 'ite 'outou ë, e ora mure 'ore tö 'outou, nö te mea të fa'aro'o na 'outou i te i'oa o te Tamaiti a te Atua." 'Ua hina'aro o te Atua 'ia 'ite päpü tätou e ti'aturi roa tätou e fa'aora hia tätou. 'A tuatäpapa ri'i na tätou i te parau o te fa'aorara'a.
(a) 'Ua hara tätou pä'äto'a. 'Ua rave tätou pä'äto'a i te 'ohipa mäuruuru 'ore hia e te Atua (Tö Röma 3:23).
(b) Nö tä tätou hara, e tano 'ia fa'autu'a hia tätou ma te fa'ata'a roa ia tätou 'e te Atua (Tö Röma 6:23).
(c) 'Ua pohe o Ietu i ni'a i te tätauro 'ei utu'a nö tä tätou hara (Tö Röma 5:8 ; 2 Tö Törinëtia 5:21).
'Ua pohe o Ietu nö tätou, ma te amo i te utu'a i topa i ni'a ia tätou. Töna ti'a-fa'ahou-ra'a, e täpa'o fa'a'ite 'ua tano au noa tö Ietu pohe nö te fa'a'ore i tä tätou hara.
(d) E aroha te Atua 'e e fa'a'ore i te hara i te feiä e fa'aro'o ia Ietu - ma te ti'aturi ë, töna pohe, nö te amo i te utu'a nö tä tätou hara (Ioane 3:16 ; Tö Röma 5:1 ; Tö Röma 8:1).
Teie mau te poro'i nö te fa'aorara'a ! Mai te peu 'ua fa'aro'o 'oe ia Ietu Tirito 'ei fa'aora tö 'oe, 'ua fa'aora hia ïa 'oe ! 'Ua fa'a'ore hia tä 'oe mau hara ato'a, 'e të ha'apäpü nei Ietu e'ita 'Oia e fa'aru'e ia 'oe, e'ita 'Oia e huri tua ia 'oe (Tö Röma 8:38-39 ; Mataio 28:20). 'Eiaha 'ia mo'e, mea päpü tö 'oe fa'aorara'a nä muri ia Ietu Tirito (Ioane 10:28-29). Mai te peu të ti'aturi nei 'oe ia Ietu 'ei fa'aora nö 'oe, mea päpü 'oe i te haere i te ra'i teitei nä muri ia Ietu 'a tau 'a hiti noa atu !
2. 'A täpapa atu i te hö'ë Etaretia maitata'i e ha'api'i ia 'oe i te Pïpïria.
E'ere te Etaretia i te hö'ë fare pure ana'e. Te Etaretia, te nüna'a ïa. Mea faufa'a roa te autaea'era'a 'ia fa'aro'o ana'e vetahi ia Ietu. Terä te tahi o te mau fä o te Etaretia. I teie nei, nö tö 'oe fa'aro'o ia Ietu Tirito, të fa'aitoito nei mätou ia 'outou nö te 'imi i te hö'ë Etaretia e fa'aro'o i te Pïpïria 'e o tei pïha'i ia 'oe, 'a haere atu e färerei i te 'orometua. 'A fa'a'ite atu iäna tö 'oe fa'aro'o 'äpï nö Ietu Tirito.
Te piti o te fä o te Etaretia, 'ia ha'api'i hia tätou i te Pïpïria. E 'ite 'oe nähea 'ia rave i te fa'auera'a a te Atua i roto i tö 'oe orara'a. 'Ia märamarama maita'i 'oe i te Pïpïria, e manuia ai 'oe i roto i te hö'ë orara'a teretetiano päpü maita'i. 'Ua parau mai o 2 Timoteo 3:16-17, "te mau parau ato'a i päpa'i hia ra, e mea fa'auru a mai ïa e te Atua, 'e mea maita'i ho'i nö te ha'api'i atu, nö te päto'i i te mau parau hape, nö te fa'atïtï'aifaro, nö te arata'i i te parau ti'a, 'ia fa'aineine hia te ta'ata o te Atua, 'e 'ia ha'api'i maita'i hia, 'ia au maita'i 'oia nö te rave i te mau 'ohipa maitata'i ato'a ra."
'Ei toru o te fä o te etaretia, te ha'amorira'a. Te ha'amorira'a, te ha'amäuruurura'a hia i te Atua nö te mau 'ohipa ato'a o täna i rave ! 'Ua fa'aora te Atua ia tätou. 'Ua here te Atua ia tätou nei. E höro'a te Atua nö tätou. E arata'i te Atua ia tätou. E'ita ïa tätou e ha'amäuruuru iäna ? E Atua mo'a, 'e te parau ti'a, te aroha 'e te taratia rahi. 'Ua nä'ö te Apotarupo 4:11 ë, "e te Fatu ë, e mea ti'a roa 'ia püpü hia te hanahana 'e te tura 'e te mana nö 'oe, nä 'oe ho'i te mau mea ato'a i hämani, 'e na roto i tö 'oe hina'aro i vai ai 'e i hämani hia ai te mau mea ato'a."
3. I te mahana hö'ë, 'a vähi i te tahi ma'a taime iti nö te rötahi te 'ä'au i ni'a i te Atua.
Mea faufa'a roa nä tätou 'ia rötahi te 'ä'au i te Atua. 'Ua pi'i hia te reira 'ei "taime hau",'aore ra 'ei "taime tähinura'a, nö te mea ho'i, e taime tähinura'a i te Atua terä. E hina'aro te tahi 'ia rave hia te reira i te po'ipo'i, 'e te tahi atu i te ahiahi ïa. Hö'ë ä maita'i. Te mea faufa'a, 'ia rötahi ihoa tö 'oe 'ä'au i te Atua. E aha te mau mea e au 'ia rave hia nö te reira ?
(a) Te pure. 'Ia pure 'oe, e paraparau 'oe i te Atua. 'A fa'a'ite atu i te Atua i tä 'oe mau fifi, 'e te pe'ape'a o tä 'oe e färerei. 'A ani i te Atua 'ia höro'a 'Oia i te hau 'e te arati'a. 'A ani i te Atua i te tauturu. 'A fa'a'ite atu i te Atua tö 'oe here rahi iäna, 'e te mau mea au ato'a o Täna e rave nö 'oe. Terä te aura'a o te pure.
(b) Tai'o i te Pïpïria. Hau atu i te haere i te fare pure, 'aore rä i te ha'api'ira'a Täpati, 'aore rä i te fare ha'api'ira'a Pïpïria, e au 'oe 'ia tai'o i te Pïpïria nö 'oe iho. Tei roto i te Pïpïria te mau ha'api'ira'a ato'a e tïtau hia nö te hö'ë orara'a teretetiano manuia roa. Tei roto iäna te mau 'avei'a o tä te Atua e fa'a'ite mai ia tätou nö te rave i te 'ohipa ma te hau, nö te 'ite i te hia'ai o te Atua, nö te tävini i te ta'ata, 'e nö te ha'amaita'i i te orara'a pae vairua. Te Pïpïria, te parau ïa o te Atua ia tätou. Te Pïpïria, te fa'auera'a ïa a te Atua nö te hö'ë orara'a e mäuruuru 'Oia, 'e 'o tätou ato'a ho'i.
4. 'Imi i te räve'a 'ia tupu te autaea'era'a 'e te mau ta'ata e riro i te tauturu ia 'oe i te pae vairua.
Të nä'ö mai ra tö 1 Törinëtia 15:33 ë, "'eiaha 'outou 'ia vare, e 'ino te peu maitata'i i te mau 'ämuira'a 'ï'ino." I roto i te Puta Mo'a, e 'äpapa haere te parau fa'aara nö ni'a i te mau ta'ata e fa'a'ino ia tätou nei. 'Ia pe'e atu tätou i tö te rave nei i te 'ohipa 'ino, e riro ato'a tätou i te rave i te reira mau 'ohipa. E "pe'e" mai te peu a tö të fätata mai i ni'a ia tätou. Nö reira mea faufa'a roa 'ia fa'a'ati hia tätou e te tahi mau ta'ata e here i te Fatu, 'e e tä'ati ato'a iäna.
'A 'imi atu i te hö'ë hoa, 'aore rä i nä piti hoa nö roto mai i tö 'oe fare pure änei, 'o të nehenehe e tauturu ia 'oe, fa'aitoito ia 'oe (Tö Hëpera 3:13 ; 10:24). 'A ani i tä 'oe mau hoa 'ia vai ineine noa 'oe i mua i te hau, tä 'oe mau heiva, 'e tae noa atu i tö 'oe haere'a nä muri i te Atua. 'A ani atu e nehenehe änei 'oe e tauturu ato'a atu ia rätou. 'Eiaha rä ho'i 'ia riro te reira 'ei a'ora'a nö te fa'aru'e i tä 'oe mau hoa e 'ore e fa'aro'o ia Ietu te Fatu, te fa'aora. 'A vai hoa noa 'outou 'e 'a here ia rätou. Terä noa, 'a fa'a'ite na ia rätou ë, 'ua taui ri'i tö 'oe orara'a, e'ita fa'ahou 'oe e nehenehe rave i te tahi mau pu'e 'ohipa mai te mätämua. 'A ani atu ia Ietu 'ia nehenehe 'oe 'öpere te parau o Ietu i tä 'oe mau hoa.
5. 'A Papetito hia 'oe.
'Ua rau te ta'ata e mana'o hape tö rätou i ni'a i te Papetitora'a. Te parau o te "Papetitora'a", te fa'ahopura'a i roto i te vai. Te Papetitora'a, te räve'a o te Pïpïria nö te fa'a'ite i mua i te ta'ata i tö 'oe fa'aro'o 'äpï ia Ietu, 'e tö 'oe fa'aotira'a nö te fa'aro'o iäna. E au te fa'ahapura'a i roto i te vai i te tanura'a 'äpiti hia o te ta'ata 'e te Tirito. E au te 'ïritira'a hia i te tino mai roto mai i te vai i te ti'a-fa'ahou-ra'a o te Tirito. Nö reira, te Papetitora'a, te fa'aaura'a ïa i tö Ietu pohe, tanura'a, 'e töna ti'a-fa'ahou-ra'a (Tö Röma 6:3-4).
E'ita te Papetitora'a e fa'aora ia 'oe. E'ita ato'a e fa'a'ore i tä 'oe mau hara. Te papetitora'a, 'oia ho'i, e aurarora'a, e püharara'a i tö 'oe fa'aro'o i te Tirito i mua i te ta'ata nö te fa'aora. Mai te mea 'ua ineine 'oe nö te papetito, 'a täpiri i te tahi 'orometua.
English
Nö fa'aro'o na vau ia Ietu...nähea atu ai?