கேள்வி
ஒரு கிறிஸ்தவன் இரட்சிப்பை 'திருப்பித் கொடுக்க’ முடியுமா?
பதில்
இந்த கேள்விக்கான குறுகிய பதில் இல்லை என்பதாகும், ஒரு உண்மையான கிறிஸ்தவன் இரட்சிப்பை "திருப்பி கொடுக்க" முடியாது. விந்தை என்னவென்றால், ஒரு கிறிஸ்தவன் தனது இரட்சிப்பை "இழக்க" முடியாது என்பதை ஒப்புக்கொண்ட சிலர் இன்னும் இரட்சிப்பை தேவனுக்கு "திருப்பிக் கொடுக்கலாம்" என்று நம்புகிறார்கள். இந்த கண்ணோட்டத்தை வைத்திருக்கும் சிலர் ரோமர் 8:38-39-ஐ வாசிப்பார்கள், நமக்கு வெளியே எதுவும் நம்மை தேவனிடமிருந்து பிரிக்க முடியாது என்றாலும், தேவனிடமிருந்து நம்மைப் பிரித்துக்கொள்ள நாம் சுதந்திரமாகத் தேர்வு செய்யலாம். இது வேதாகமத்திற்கு எதிரானது மட்டுமல்ல; அது அனைத்து தர்க்கங்களையும் மீறுகிறது.
நம்முடைய இரட்சிப்பை நாம் ஏன் "திருப்பிக் கொடுக்க" சாத்தியமில்லை என்பதைப் புரிந்து கொள்ள, நாம் மூன்று விஷயங்களைப் புரிந்து கொள்ள வேண்டும்: தேவனுடைய இயல்பு, மனிதனுடைய இயல்பு மற்றும் இரட்சிப்பின் தன்மை. தேவன் இயற்கையாகவே ஒரு இரட்சகர். சங்கீதத்தில் மட்டும் பதின்மூன்று முறை, தேவன் மனிதனின் மீட்பர் என்று குறிப்பிடப்படுகிறார். தேவன் மட்டுமே நம் இரட்சகர்; வேறு யாராலும் நம்மைக் இரட்சிக்க முடியாது, நம்மால் நம்மைக் இரட்சித்துக்கொள்ள முடியாது. "நான், நானே கர்த்தர்; என்னையல்லாமல் இரட்சகர் இல்லை" (ஏசாயா 43:11). வேதத்தில் எந்த இடத்திலும் தேவன் ஒரு இரட்சகராக அவர் இரட்சிக்கப்படுவதற்கு அவர் இரட்சித்தவர்களைச் சார்ந்து இருக்கிறார் என்பதாக சித்தரிக்கப்படவில்லை. யோவான் 1:13 தேவனுக்குச் சொந்தமானவர்கள் மீண்டும் தங்கள் சொந்த விருப்பத்தினால் பிறப்பதில்லை, மாறாக தேவனுடைய சித்தத்தினால் பிறக்கிறார்கள் என்பதை தெளிவுபடுத்துகிறது. தேவன் தனது சித்தத்தால் இரட்சிக்கவும், அவரது வல்லமையால் இரட்சிக்கவும் செய்கிறார். அவருடைய சித்தம் ஒருபோதும் முறியடிக்கப்படாது, அவருடைய வல்லமை வரம்பற்றது (தானியேல் 4:35).
தேவனுடைய இரட்சிப்பின் திட்டம் இயேசு கிறிஸ்துவால் நிறைவேற்றப்பட்டது, தேவன் அவதரித்தார், அவர் "இழந்துபோனதைத் தேடவும் இரட்சிக்கவுமே" பூமிக்கு வந்தார் (லூக்கா 19:10). நாம் அவரைத் தேர்ந்தெடுக்கவில்லை என்று இயேசு தெளிவுபடுத்தினார், ஆனால் அவர் நம்மைத் தேர்ந்தெடுத்து "போய்க் கனிகொடுக்கும்படி" நியமித்தார் (யோவான் 15:16). இரட்சிப்பு என்பது கிறிஸ்துவில் உள்ள விசுவாசத்தின் மூலம் தேவனிடமிருந்து கிடைத்த ஈவு, உலகத் தோற்றத்திற்கு முன்பே, அதைப் பெறுவதற்கு முன்கூட்டியே நிர்ணயிக்கப்பட்ட மற்றும் பரிசுத்த ஆவியால் அந்த இரட்சிப்பில் முத்திரையிடப்பட்டவர்களுக்கு வழங்கப்பட்டது (எபேசியர் 1:11-14). மனிதன் தன் விருப்பப்படி, தேவனை இரட்சிப்பதற்கான திட்டத்தை முறியடிக்க முடியும் என்ற கருத்தை இது விலக்குகிறது. இரட்சிப்பின் ஈவைப் பெறுவதற்கும், பிறகு ஈவைத் திரும்ப யாராவது கொடுத்தால் அவருடைய திட்டம் அழிக்கப்படும் வகையில் தேவன் யாரையும் முன்கூட்டியே நிர்ணயிக்க மாட்டார். தேவனுடைய சர்வஞானமும் முன் அறிவும் இத்தகைய சூழ்நிலையை சாத்தியமற்றதாக்குகின்றன.
மனிதன் இயற்கையாகவே, தேவனை எந்த வகையிலும் தேடாத ஒரு கெட்டுப்போன ஜீவி. அவனுடைய ஆவி தேவனுடைய ஆவியால் மாற்றப்படும் வரை, அவன் தேவனைத் தேடமாட்டான், அவனாலும் அது முடியாது. தேவனுடைய வார்த்தை அவனுக்கு புரியாது. மறுபிறப்பு அடையாத மனிதன் அநீதியானவன், பயனற்றவன், ஏமாற்றுபவன். அவனது வாயில் கசப்பும் சாபமும் நிரம்பியுள்ளது, அவனது இருதயம் இரத்தம் சிந்துவதை நோக்கி சாய்ந்துள்ளது, அவனுக்கு அமைதி இல்லை, மேலும் "அவனது கண்களுக்கு முன்பாகத் தெய்வபயமில்லை" (ரோமர் 3:10-18). அத்தகைய நபர் தன்னைக் இரட்சிக்கவோ அல்லது இரட்சிப்பின் தேவையைப் பார்க்கவோ இயலாது. அவன் கிறிஸ்துவில் ஒரு புதிய சிருஷ்டியாக ஆக்கப்பட்ட பிறகுதான் அவனுடைய இருதயமும் மனமும் தேவனை நோக்கி மாற்றப்பட்டது. அவன் இப்போது சத்தியத்தைப் பார்க்கிறான் மற்றும் ஆவிக்குரிய காரியங்களைப் புரிந்துகொள்கிறான் (1 கொரிந்தியர் 2:14; 2 கொரிந்தியர் 5:17).
ஒரு கிறிஸ்தவன் பாவத்திலிருந்து மீட்கப்பட்டு பரலோகத்திற்கான பாதையில் வைக்கப்பட்டவன். அவன் ஒரு புதிய சிருஷ்டி, அவனுடைய இருதயம் தேவனை நோக்கி திரும்பியுள்ளது. அவனது பழைய இயல்பு போய்விட்டது, மறைந்துவிட்டது. இருதய மாற்று அறுவை சிகிச்சை பெற்றவர் தனது புதிய இருதயத்தை திரும்ப கொடுத்துவிட்டு, மீண்டும் பழைய நோய்வாய்ப்பட்ட இருதயத்தை பெற விரும்புவதில்லை, அதுபோலவே அவனது புதிய இயல்பு அவனது இரட்சிப்பைத் திரும்ப கொடுக்க விரும்பவில்லை. ஒரு கிறிஸ்தவன் தனது இரட்சிப்பைத் திரும்பக் கொடுப்பது என்ற கருத்து வேதப்பூர்வமற்றது மற்றும் சிந்திக்க முடியாதது.
English
ஒரு கிறிஸ்தவன் இரட்சிப்பை 'திருப்பித் கொடுக்க’ முடியுமா?
