Suraq
Qudai qutqarǵan adam máńgilikke qutqarylady ma?
Jaýap
Adam qutqarylsa máńgilikke qutqarylady ma? Másixti óziniń Qutqarýshysy retinde qabyldaǵan adam Qudaimen tyǵyz qarym-qatynasta bolady. Qudai mundai adamdarǵa máńgilik qaýipsizdikti syilaidy. Kieli jazbada osy shyndyqty rastaityn úzindiler óte kóp. (a) Rim. xat 8:30 ayatynda bylai aitylǵan: «Qudai kimderdi burynnan belgilep qoisa, solardy shaqyryp aldy, shaqyryp alǵandaryn aqtap ta aldy, aqtap alǵandaryna ulylyq ta syilady». Bul ayattyń maǵynasy mynandai: Qudai bizdi tańdap alǵan kezden bastap bizdi Óziniń qasynda bolyp, kóktegi ulylyqqa ie bolýǵa laiyqty etti. Senýshiniń osy syilyqty iemdenýine eshqandai nárse kedergi bola almaidy, óitkeni Qudai barlyǵyn áldeqashan daiyndap qoiǵan. Qudai adamdy ádil dep jariyalap qutqarsa, adam esh kúmánsyz kóktegi ulylyqqa ie bolmaq.
(á) Elshi Paýyl Rim. xat 8:33-34 ayattarynda eki mańyzdy suraq qoyady: «Qudai tańdap alǵandaryna kim aiyp taǵa alady? Qudaidyń Ózi olardy aqtaidy, endeshe kim úkim shyǵara alady? Másix Isa biz úshin óldi, Ol qaida tirildi de, Qudaidyń oń jaǵynan oryn alyp, bizdi qoldaýda». Shynymen de, Qudai tańdap alǵandaryna kim aiyp taǵa alady? Eshkim, óitkeni bizdi Másixtiń Ózi qoldaidy. Kim bizge úkim shyǵara alady? Eshkim, óitkeni bolashaqta adamzatty sottaityn Másix biz úshin janyn qidy. Demek bizdi aqtaityn da Másix, adamzatty sottaityn da Másix.
(b) Adam Isaǵa sengen kezde rýxani jaǵynan jańadan týylady (Joxan 3:3; Tit. xat 3:5). Másixshi qutqarylýyn joǵaltqan bolsa, yaǵni ol eshqashan jańadan týylmaǵan. Kieli kitapta jańadan týylǵan adamnyń máńgilik ómirden aiyrylǵany týraly eshqandai áńgime joq. (v) Kieli Rýx barlyq senýshilerdiń boiynda mekendeidi (Joxan 14:17; Rim. xat 8:9) jáne barlyq senýshilerdi sýǵa shomyldyrý rásiminen ótkizip Másixtiń Denesine engizedi (Qorynt. 1-xat 12:13). Másixtiń Denesine jatpaityn jáne boiynda Kieli Rýx joq adamdar ǵana qutqarylýdan aiyrylady.
(g) Joxan 3:15 ayatynda: «Oǵan (Isa Másixke) senýshi árkim máńgilik ómirge ie bolady». Eger siz búgin Másixke senip, máńgilik ómirge ie boldym dep, erteń odan aiyrylsańyz, onda siz osy máńgilik ómirge shyn máninde eshqashan ie bolǵan joq shyǵarsyz. Onda Kieli kitaptaǵy máńgilik ómir jaily ýádeler qate bolar edi. (d) Meniń oiymsha osy jaǵdai jaily eń jaqsy qorytyndyny biz Kieli jazbadan tabamyz: «Men mynaǵan nyq senemin: ólim de, ómir de, perishteler de, jyn-periler de, búgingi kún de, bolashaq ta, tabiǵattan tys kúshter de, ne ústimizdegi, ne astymyzdaǵy eshqandai kúsh te, tipti jaratylystyń basqa eshbir nársesi de bizdi Qudaidyń Iemiz Isa Másix arqyly kórsetip júrgen súiispenshiliginen aiyra almaidy!» (Rim. xat 8:38-39). Esterińizde bolsyn: sizdi qutqarǵan Qudai sizdi qorǵap saqtap júredi. Biz bir qutqarylǵannan keiin máńgilikke qutqarylamyz, yaǵni máńgilik qaýipsizdikke qol jetkizemiz!
English
Qudai qutqarǵan adam máńgilikke qutqarylady ma?