ଈଶ୍ବରଙ୍କ ଚରିତ୍ରସମୂହ କଅଣ? ଈଶ୍ବର କେଉଁ ଭଳି?


ପ୍ରଶ୍ନ: ଈଶ୍ବରଙ୍କ ଚରିତ୍ରସମୂହ କଅଣ? ଈଶ୍ବର କେଉଁ ଭଳି?

ଉତ୍ତର:
ବାଇବଲ, ଈଶ୍ବରଙ୍କ ବାକ୍ୟ, କହେ ଯେ ଈଶ୍ବର କେଉଁ ଭଳି ଓ ଈଶ୍ବର କେଉଁ ପ୍ରକାର ନୁହନ୍ତି । ବାଇବଲର କ୍ଷମତା ବିନା, ଈଶ୍ବରଙ୍କୁ ଚରିତ୍ରସମୂହ ବର୍ଣ୍ଣନା କରିବା ଲାଭଜନକ ନୁହଁ ବରଂ ଏହା କେବଳ ଏକ ମତ ବୋଲି ସାବ୍ୟସ୍ତ ହେବ, ଯାହାକି ବହୁତ ସମୟରେ ଭୁଲ ଅଟେ, ବିଶେତଃ ଈଶ୍ବରଙ୍କୁ ବୁଝିବା ସକାଶେ (ଆୟୁବ ୪୨:୭) । ଈଶ୍ବର କି ଭଳି ତାହା ବୁଝିବା ଅତି ଆବଶ୍ୟକ, ଏହା କହିବା ବଡ଼ ଅବୋକ୍ତି । ଏହା କରିବାରେ ଯଦି ଆମେ ବିଫଳ ହେଉ, ତେବେ ଆମେ ମିଥ୍ୟା ଦେବତାମାନଙ୍କୁ ତିଆରି କରିବା ଓ ଆରାଧନା କରିବା ଯାହା କି ତାହାଙ୍କ ଇଚ୍ଛା ବିରୋଧୀ ଅଟେ । (ଯାତ୍ରା ୨୦:୩-୫)

ଯାହା ଈଶ୍ବର ପ୍ରକାଶ କରିଅଛନ୍ତି ତାହା ହିଁ ଆମେ ଜାଣି ପାରିବା । ଈଶ୍ବରଙ୍କ ଗୋଟିଏ ଗୁଣ ବା ଚରିତ୍ର ହେଉଛି, “ଜ୍ୟୋତି”, ଅର୍ଥାତ୍ ସେ ସ୍ବଂୟ ନିଜ ସମ୍ପର୍କରେ ସୂଚନା ଦିଅନ୍ତି (ଯିଶାୟ ୬୦:୧୯; ଯାକୁବ ୧:୭) । ଈଶ୍ବର ନିଜ ସମ୍ପର୍କରେ ପ୍ରକାଶ କରିଅଛନ୍ତି ଏହି ସତ୍ୟତାକୁ ଅବହେଳା କରାଯାଇ ନ ପାରେ (ଏବ୍ରୀ ୪:୧) । ସୃଷ୍ଟି, ବାଇବଲ ଓ ବାକ୍ୟ ଦେହବନ୍ତ (ଯୀଶୁ ଖ୍ରୀଷ୍ଟ), ଆମକୁ ଈଶ୍ବର କେଉଁ ପ୍ରକାର ଅଟନ୍ତି ତାହା ଜାଣିବାରେ ସାହାଯ୍ୟ କରିନ୍ତି ।

ଆମେ ପ୍ରଥମେ ବୁଝିବା’ ଆବଶ୍ୟକ ଯେ ଈଶ୍ବର ଆମର ସୃଷ୍ଟିକର୍ତ୍ତା ଏବଂ ଆମେ ତାହାଙ୍କ ସୃଷ୍ଟିର ଏକ ଅଂଶ (ଆଦି ୧:୧; ଗୀତସଂହିତା ୨୪:୧) ଏବଂ ଆମେ ତାହାଙ୍କ ପ୍ରତିମୁର୍ତ୍ତିରେ ନିର୍ମିତ । ମନୁଷ୍ୟ ଅନ୍ୟ ସୃଷ୍ଟିମାନଙ୍କ ମଧ୍ୟରୁ ଉନ୍ନତ ଓ ସୃଷ୍ଟି ଉପରେ କର୍ତ୍ତତ୍ବ କରିବା ପାଇଁ କ୍ଷମତାପ୍ରାପ୍ତ ହୋଇଅଛି (ଆଦି ୧:୨୬-୨୮) । ମନୁଷ୍ୟର ପାପରେ ପତ୍ତନ ଦ୍ବାରା ସୃଷ୍ଟି ନଷ୍ଟ ହୋଇଅଛି କିନ୍ତୁ ତଥାପି ସୃଷ୍ଟି ଈଶ୍ବରଙ୍କ କାର୍ଯ୍ୟର କ୍ଷଣିକ ଦୃଷ୍ଟି ଏବେ ସୁଦ୍ଧା ପ୍ରଦାନ କରେ (ଆଦି ୩:୧୭-୧୮; ରୋମୀୟ ୧:୧୯-୨୦) । ସୃଷ୍ଟିର ବିଶାଳତା, ଜଟିଳତା ଓ ସୁବ୍ୟବସ୍ଥିତାକୁ ଦେଖି, ଆମେ ଈଶ୍ବରଙ୍କ ସୌନ୍ଦର୍ଯ୍ୟକୁ ଜାଣିପାରିବା ।

ଏହି ନାମଗୁଡିକୁ ପଢିବା ଦ୍ବାରା ଈଶ୍ବର କେଉଁ ପ୍ରକାରର, ତାହା ଜାଣିବା ସହଜସାଧ୍ୟ ହେବ । ନିମ୍ନରେ ତାହା ଦିଆଗଲା:

ଏଲୋହିମ୍- ଶକ୍ତିଶାଳୀ, ଦୈବିକ (ଆଦି ୧:୧)
ଏଡୋନାଇ- ପ୍ରଭୁ, ମାଲିକ-ଦାସର ସମ୍ପର୍କ (ଯାତ୍ରା ୪:୧୦,୧୩)
ଏଲ୍ ଏଲିଓନ- ମହା ଉର୍ଦ୍ଧ୍ବସ୍ଥ ସଦପ୍ରଭୁ, ଶକ୍ତିଶାଳୀ (ଆଦି ୧୪:୨୦)
ଏଲ୍ ରୋଇ- ଶକ୍ତିଶାଳୀ ଯିଏ ଦେଖନ୍ତି (ଆଦି ୧୬:୧୩)
ଏଲ୍ ଶାଡ଼ୟ- ସର୍ବଶକ୍ତିମାନ ପରମେଶ୍ବର (ଆଦି ୧୭:୧)
ଏଲ୍ ଓଲାମ୍- ଅନନ୍ତକାଳୀନ ପରମେଶ୍ବର (ଯିଶାୟ ୪୦:୨୮)
ଯିହୋବା- ସଦପ୍ରଭୁ “ସ୍ବଂୟମ୍ଭୁ” ଅର୍ଥାତ ଅନନ୍ତକାଳୀନ ସ୍ବଂୟ ବିଦ୍ୟମାନତା (ଯାତ୍ରା ୩:୧୩-୧୪)

ଈଶ୍ବର ଅନନ୍ତଜୀବୀ ଅଟନ୍ତି ଅର୍ଥାତ ତାହାଙ୍କ କୌଣସି ଆରମ୍ଭ ନାହିଁ ଏବଂ ତାହାଙ୍କ ବିଦ୍ୟମାନତା କଦାପି ସମାପ୍ତ ହେବ ନାହିଁ । ସେ ଅମର ଓ ଅସୀମ ଅଟନ୍ତି (ଦ୍ବିତୀୟ ବିବରଣ ୩୩:୨୭; ଗୀତସଂହିତା ୯୦:୨; ୧ ତିମଥୀ ୧:୧୭) । ଈଶ୍ବର ଅପରିବର୍ତ୍ତନୀୟ ଅର୍ଥାତ ସେ ପରିବର୍ତ୍ତନ ହୁଅନ୍ତି ନାହିଁ; ଏହାର ଆଉ ଏକ ଅର୍ଥ ହେଉଛି ଈଶ୍ବର ଭରସାଯୋଗ୍ୟ ଓ ନିର୍ଭରଯୋଗ୍ୟ ଅଟନ୍ତି (ମଲାଖି ୩:୬; ଗଣନା ପୁସ୍ତକ ୨୩:୧୯; ଗୀତସଂହିତା ୧୦୨:୨୬,୨୭) । ଈଶ୍ବର ଅତୁଳନୀୟ; ତାହାଙ୍କ ଭଳି ଓ ତାହାଙ୍କ କାର୍ଯ୍ୟ ଭଳି ଆଉ କେହି ନାହାଁନ୍ତି । ସେ କାହା ସହ ତୁଲ୍ୟ ନୁହଁନ୍ତି ଓ ସେ ସିଦ୍ଧ ଅଟନ୍ତି (୨ ଶାମୁୟେଲ ୭:୨୨; ଗୀତସଂହିତା ୮୬:୮; ଯିଶାୟ ୪୦:୨୫; ମାଥିଉ ୫:୪୮) । ଯଦି ଆମେ ତାହାଙ୍କୁ ସମ୍ପୂର୍ଣ୍ଣରୂପେ ଖୋଜିବାକୁ ଚେଷ୍ଟା କରୁ, ଈଶ୍ବର ରହସ୍ୟାବୃତ, ଅବୋଧ ଓ ଅଗମ୍ୟ (ଯିଶାୟ ୪୦:୨୮; ଗୀତସଂହିତା ୧୪୫:୩; ରୋମୀୟ ୧୧:୩୩,୩୪) ।

ଈଶ୍ବର ନ୍ୟାୟବାନ ଅଟନ୍ତି; ସେ ପକ୍ଷପାତ କରନ୍ତି ନାହିଁ (ଦ୍ବିତୀୟ ବିବରଣ ୩୨:୪; ଗୀତସଂହିତା ୧୮:୩୦) । ଈଶ୍ବର ସର୍ବଶକ୍ତିମାନ ଅଟନ୍ତି; ସେ ଯାହା ଇଚ୍ଛା ତାହା କରିପାରନ୍ତି, କିନ୍ତୁ ତାହାଙ୍କ କାର୍ଯ୍ୟ ସର୍ବଦା ତାହାଙ୍କ ଚରିତ୍ର ସହ ଅନୁରୁପ ହୋଇଥାଏ (ପ୍ରକାଶିତ ୧୯:୬; ଯିରିମିୟ ୩୨:୧୭,୨୭) । ଈଶ୍ବର ସର୍ବବିଦ୍ୟମାନ ଅଟନ୍ତି, କିନ୍ତୁ ଏହାର ଅର୍ଥ ନୁହେଁ ଯେ ସେ ସବୁକିଛି ଅଟନ୍ତି (ଗୀତସଂହିତା ୧୩୯:୭-୧୩; ଯିରିମିୟ ୨୩:୨୩) । ଈଶ୍ବର ସର୍ବଜ୍ଞାନୀ, ଅର୍ଥାତ୍ ସେ ଅତୀତ, ବର୍ତ୍ତମାନ ଓ ଭବିଷ୍ୟତ ଜାଣନ୍ତି ଏବଂ ଆମେ ବର୍ତ୍ତମାନ ଏହି କ୍ଷଣରେ ସୁଧା ଯାହା ଚିନ୍ତା କରୁଅଛୁ, ସେ ତାହା ଜାଣନ୍ତି । ସେ ସମସ୍ତ ବିଷୟ ଜାଣିଥିବା ହେତୁ, ତାହାଙ୍କ ନ୍ୟାୟ ସର୍ବଦା ନ୍ୟାୟସଂଗତ ହୋଇଥାଏ (ଗୀତସଂହିତା ୧୩୯:୧-୫; ହିତୋପଦେଶ ୫:୨୧) ।

ଈଶ୍ବର ଏକ ଅଟନ୍ତି; କେବଳ ଏହା ନୁହେଁ ଯେ ସେ ଏକ ଅଟନ୍ତି, ବରଂ ସେ ହିଁ ଏକମାତ୍ର ଯେ ଆମ ହୃଦୟର ଅନ୍ତରସ୍ଥ ଆବଶ୍ୟକତା ଓ ବେଦନାକୁ ସମାଧାନ କରିପାରିବେ । ଇଶ୍ବର ଏକାକୀ ଆମ ଆରାଧନା ଓ ଭକ୍ତିର ଯୋଗ୍ୟ ଅଟନ୍ତି (ଦ୍ବିତୀୟ ବିବରଣ ୬:୪) । ଈଶ୍ବର ଧାର୍ମିକ ଅଟନ୍ତି ଅର୍ଥାତ୍ ଈଶ୍ବର କଦାପି ଭୁଲ କାର୍ଯ୍ୟ କରିବେ ନାହିଁ । ଈଶ୍ବରଙ୍କ ଧାର୍ମିକତା ଓ ନ୍ୟାୟ ସକାଶୁ, ଆମ ପାପର ମୋଚନ ପାଇଁ, ଯୀଶୁଙ୍କୁ ଈଶ୍ବରଙ୍କ କ୍ରୋଧର ସମ୍ମୁଖୀନ ହେବାକୁ ପଡିଲା ଯେବେ ଆମ ପାପ ତାହାଙ୍କ ଉପରେ ଦିଆଗଲା (ଯାତ୍ରା ୯:୨୭; ମାଥୀଉ ୨୭:୪୫-୪୬; ରୋମୀୟ ୩:୨୧-୨୬) ।

ଈଶ୍ବର ସାର୍ବଭୌମିକ ଅର୍ଥାତ୍ ସେ ସର୍ବୋଚ ଅଧିକାରୀ ଅଟନ୍ତି । ସମସ୍ତ ସୃଷ୍ଟି ଏକାଠି ହେଲେ ହେଁ ତାହାଙ୍କ ଯୋଜନାକୁ ବ୍ୟର୍ଥ କରିପାରିବେ ନାହିଁ (ଗୀତସଂହିତା ୯୩:୧, ୯୫:୩; ଯିରିମିୟ ୨୩:୨୦)! ଈଶ୍ବର ଆତ୍ମା ଅଟନ୍ତି ଅର୍ଥାତ୍ ସେ ଅଦୃଶ୍ୟ ଅଟନ୍ତି (ଯୋହନ ୧:୧୮; ୪:୨୪) । ଈଶ୍ବର ତ୍ରିଏକ ପରମେଶ୍ବର ଅଟନ୍ତି । ସେ ଏକ ପରମେଶ୍ବର ତିନି ବ୍ୟକ୍ତି, ଉପାଦାନରେ ସମାନ, କ୍ଷମତା ଓ ଗୌରବରେ ସମାନ ଅଟନ୍ତି । ଈଶ୍ବର ସତ୍ୟ, ସେ ଅକ୍ଷୟ ଓ ସେ କଦାପି ମିଥ୍ୟା କହନ୍ତି ନାହିଁ (ଗୀତସଂହିତା ୧୧୭:୨; ୧ ଶାମୁୟେଲ ୧୫:୨୯) ।

ଈଶ୍ବର ପବିତ୍ର, ସମସ୍ତ ମନ୍ଦରୁ ପୃଥକୀକୃତ ଓ ସେ ତାହାର ବିରୋଧୀ ଅଟନ୍ତି । ଈଶ୍ବର ସମସ୍ତ ମନ୍ଦ ଦେଖନ୍ତି ଓ ଏହା ତାହାଙ୍କୁ ଅତିଶୟ କ୍ରୋଧିତ କରେ । ଈଶ୍ବରଙ୍କୁ ଗ୍ରାସକାରୀ ଅଗ୍ନିରୂପେ ବ୍ୟାଖ୍ୟା କରାଯାଇଛି (ଯିଶାୟ ୬:୩; ହବକୂକ ୧:୧୩; ଯାତ୍ରା ୩:୨,୪-୫; ଏବ୍ରୀ ୧୨:୨୯) । ଈଶ୍ବର ଦୟାଳୁ ଅଟନ୍ତି ଏବଂ ତାହାଙ୍କ ଅନୁଗ୍ରହରେ, ତାହାଙ୍କ ଦୟା, କରୁଣା ଓ ପ୍ରେମ ସାମିଲ୍ ଅଟେ । ଯଦି ଈଶ୍ବରଙ୍କ ଅନୁଗ୍ରହ ହୋଇନଥାନ୍ତା, ତେବେ ତାହାଙ୍କ ସାନିଧ୍ୟରୁ ଆମକୁ ବହିର୍ଭୁତ ହେବାକୁ ପଡନ୍ତା । ଈଶ୍ବରଙ୍କ ଧନ୍ୟବାଦ ହେଉ ଯେ ସେହି ପ୍ରକାର ଆମ ପ୍ରତିଘଟି ନାହିଁ, କାରଣ ସେ ଆମକୁ ବ୍ୟକ୍ତିଗତ ଭାବରେ ଜାଣିବାକୁ ଚାହାଁନ୍ତି (ଯାତ୍ରା ୩୪:୬; ଗୀତସଂହିତା ୩୧:୧୯; ୧ ପିତର ୧:୩; ଯୋହନ ୩:୧୬; ୧୭:୩) ।

ଈଶ୍ବର ଅସୀମ ହୋଇଥିବା ହେତୁ, କୌଣସି ମନୁଷ୍ୟ ଏହି ଈଶ୍ବରଙ୍କ ଆକାରର ପ୍ରଶ୍ନର ଉତ୍ତର ଦେଇପାରିବ ନାହିଁ, କିନ୍ତୁ ଈଶ୍ବରଙ୍କ ବାକ୍ୟ ଦ୍ବାରା, ଆମେ ବହୁତ କିଛି ବୁଝିପାରିବା ଯେ ଈଶ୍ବର କିଏ ଏବଂ ସେ କେଉଁ ପ୍ରକାରର ଅଟନ୍ତି । ଆମେ ହୃଦୟର ସହ ତାହାଙ୍କୁ ଅବିରତ ସନ୍ଧାନ କରୁ (ଯିରିମିୟ ୨୯:୧୩) ।



ଓଡ଼ିଆ ପେଜ୍ କୁ ଫେରି ଯାଅନ୍ତୁ



ଈଶ୍ବରଙ୍କ ଚରିତ୍ରସମୂହ କଅଣ? ଈଶ୍ବର କେଉଁ ଭଳି?