Fesili
O le a le uiga o le Kerisiano ua fanaufouina?
Tali
O loo maua le tali o lea fesili i le Ioane 3:1-21. O loo talanoa Iesu Keriso ma Nikotemo, o so le au Faresaio ma o ia foi o se tasi o faipule o Iutaia. Sa alu ane Nikotemo ia Iesu i le po. Na tuu fesili foi Nikotemo ia Iesu.
A o la talanoa Iesu ma Nikotemo, sa Ia faapea atu ia te ia, "E moni, e moni, ou te fai atu ia te oe, a le toe fanau le tagata, e le mafai ona iloa e ia o le malo o le Atua. Ua fai mai Nikotemo ia te ia, E mafai ea faapefea ona fanau o le tagata ua toeaina? E mafai ea ona toe ofi i le manava o lona tina, e fanau mai ai? Ua tali atu Iesu, E moni, e moni, ou te fai atu ia te oe, afai e le fanau se tasi i le vai ma le Agaga, e le mafai ona sao o ia i le malo o le Atua. O le ua fanau mai i la le tino, o le tino lea; o le ua fanau mai foi i la le Agaga, o le agaga lea. Aua e te ofo aua na ou fai atu ia te oe, E ao ina toe fanau mai outou." (Ioane 3:3-7).
O le uiga o le "toe fanaufouina" o le "fanau mai luga". Sa iai se mana'oga tele ia Nikotemo. Ua ia mana'omia se fesuiaiga fou faaleagaga. O le ola fou po'o le fanaufouina, o le ala ua saunia e le Atua ina ia tulu'i ai le ola e faavavau i le tagata ua talitonu (2 Korinito 5:17; Tito 3:5; I Peteru 1:3; I Ioane 2:29; 3:9; 4:7; 5:1-4, 18). I le Ioane 1:12, 13 o loo ta'ua ai le "toe fanaufouina" ma le manatu e "avea ma fanau a le Atua" e ala i le talitonu o le tagata i le suafa o Iesu Keriso.
O le fesili faalemafaufau e sosoo ai, "O le a le mafuaaga e mana'omia ai e se tasi le toe fanaufouina?" Fai mai le Aposetolo o Paulo i le Efeso 2:1, "O outou foi lava o e na oti i amio leaga ma agasala..." Ma lana tusi i tagata Roma i le Roma 3:23, o loo faapea atu ai le Aposetolo, "Aua ua agasala tagata uma lava, ma ua le oo i le viiga mai le Atua." O lona uiga, e manaomia e tagata le toe fanaufouina mo le faamagaloina o agasala ma amata ai se mafutaga va lalata ma le Atua.
E faapefea la ona faataunuuina lea mea? Fai mai le Efeso e 2:8, 9: "Aua o le alofa tunoa ua faaolaina ai outou i le faatuatua; e le mai ia te outou foi lea, a o le mea ua foaiina mai e le Atua; e le ona o galuega, ina ne'i mitmita se tasi." A oo ina "faaolaina" se tasi, o lona uiga ua toe fanaufouina, ua faafouina faaleagaga, ma ua avea nei o ia ma fanau a le Atua i le aia tatau o le ua fanaufouina. O le faatuatua ia Iesu Keriso, o Le na maliu e totogi ai le tau o a tatou agasala, o le uiga moni lea o le "toe fanau" faaleagaga. "O lenei, afai o ia Keriso se tasi, o le tagata fou ia..." (2 Korinito 5:17).
Afai e te le'i talitonu lava i le Alii o Iesu Keriso e avea ma ou Faaola, pe e te le talia nei le musumusuga a le Agaga Paia i lou loto? O loo mana'omia e oe le toe fanaufouina. E te le tatalo ea le tatalo o le salamo ma avea ai oe o se tagata fou ia Keriso, i le aso? "A o i latou uma e na talia o ia, ma faatuatua i lona suafa, na ia avatu i ai o lea manuia, ia avea i latou ma fanau a le Atua. O i latou, e le o le toto na fanau ai, e le o le manao foi o le tino e le o le loto foi o le tagata, a o le Atua lava." Ioane 1:12, 13.
Afai ua e mana'o e talia nei Iesu Keriso e fai ma ou Faaola ma fanaufouina ai oe, o se tatalo faata'ita'i lea e mafai ona e faia. Manatua, e le faaolaina oe ona o se tatalo. Ua na o lou talitonu ia Keriso e faaolaina ai oe mai le agasala. O lea tatalo ua na o se ala faigofie e faailoa atu ai i le Atua lou faatuatua ia te Ia, atoa ma lau faafetai mo le faaolataga ua Ia saunia. "Le Atua e, ua iloa nei ua ou agasala ia te Oe ma ua tatau lava ia te a'u se faasalaga tele. Ae ua totogiina e Iesu Keriso la'u sala ina ia mafai ona ou faatuatua e ala ia te Ia, ma faamagaloina ai a'u. O nei lava ua ou fulitua ai i a'u agasala ae tuuina atu lo'u talitonuga atoa ia te Oe mo lo'u faaolataga. Faafetai tele mo Lou alofa tunoa matagofie ua ou magalo ai nei -- o le meaalofa o le ola e faavavau lea! Amene!
Ua fai sau filifiliga ma'oti mo Keriso ina ua e faitau malamalama i itulau nei? Afai o lea, asiasi i le "Ua ou talia Iesu i le Aso lenei" o loo iai i lalo.
English
O le a le uiga o le Kerisiano ua fanaufouina?