settings icon
share icon
Fesili

O soifua le Atua? O a ni mea e iloa ai o loo soifua le Atua?

Tali


O soifua le Atua? E malie ia te a’u le toatele o e o loo ‘auai i le faatalanoaina o lenei mataupu. I suesuega e faatatau i lenei mataupu ua ta'u mai ai e 90 pasene o tagata i le lalolagi e talitonu o loo soifua le Atua poo se mana foi e sili atu lona maualuga. Ae paga, ua faae'e le avega i luga o e talitonu ina ia latou faamaonia le soifua le Atua. Ou te manatu a’u, e tatau ona fesuia’i le vaega e tatau ona aumaia le faamaoniga.

Peita’i ane, o le soifua mai o le Atua e le tau faamaonia. Fai mai le Tusi Paia ia tatou talia Lona Soifua mai e ala i le faatuatua, “A leai foi se faatuatua e le mafai ona fiafia mai o ia; aua e tatau i le alu atu i le Atua ona talitonu o loo soifua o ia, o ia foi na te tauia mai o e matua saili ia te ia” (Eperu 11:6). Afai e finagalo iai le Atua, e mafai ona faaali mai o Ia i le lalolagi e faamaonia ai o loo soifua o Ia. Ae afai foi Na te faia lea mea, ua leai se aoga o lo tatou faatuatua. “Ua e talitonu, aua ua e vaai mai ia te au. Amuia o e le vaai mai, a e talitonu mai pea” (Ioane 20:29).

E le faapea la e leai ni faamaoniga o loo soifua le Atua. Ua ta'utino mai le Tusi Paia, “Ua tala mai e le lagi le mamalu o le Atua; ua faaalia foi e le va nimonimo le galuega a ona aao. O loo ta’u atu le upu e le tasi aso i le tasi aso, o loo faailoa foi le poto e le tasi po i le tasi po. E leai se gagana, e leai foi ni upu, e le lagona o latou leo. Ua oo atu lo latou leo i le lalolagi uma lava, ma a latou upu i tuluiga o le atu laulau” (Salamo 19:1-4). O se vaaiga i fetu, se malamalamaga i le lautele o le atulaulau, ma le manatunatu i le matagofie naua o lenei lalolagi, vaaiga foi o le manaia o le alu a'e o le la – o nei mea uma e faasino i Le na fausia, o le Atua. O le isi foi mea, o loo faamaonia le soifua o le Atua i o tatou lava loto. Fai mai le Failauga 3:11, “Ua tuuina foi e Ia le manatu i le lalolagi i o tatou loto...” O lagona loloto o loo taatia i totonu ia te i tatou e faamaonia ai o loo iai se tasi i tua atu o lenei olaga e sili atu i lo lenei lalolagi. E mafai ona tatou tetee i lea manatu faalemafaufau, ae o loo iai foi le mamalu o le Atua i totonu ia te i tatou. E tusa poo le a lava nei mea uma, o loo ta’u mai e le Tusi Paia e iai i latou o e faafitia le Atua, “Ua fai ifo le tagata valea i lona loto, E leai se Atua” (Salamo 14:1). Taluai ona e silia ma le 98 pasene o tagata talu le foafoaga o le lalolagi, i soo se atunuu, i soo se mea o loo iai le ola, i konetineta uma foi, e talitonu o loo soifua se ituaiga Atua – e tatau la ona iai ma se mea (poo se tasi) o loo faaosofiaina nei talitonuga i loto o nei tagata e toatele.

E le gata i mau mai le Tusi Paia e faamaonia ai o loo soifua le Atua, o loo iai foi faamaumaga faalemafaufau. Muamua, o le finauga ua sili lona faaaogaina, o le manatu e faamaonia le soifua o le Atua ia te Ia lava (ontological argument). E amata i se faamatalaga e uiga i le Atua e faapea, “o Ia o Le silisili ma e sili atu lava nai lo se tasi o loo iai.” Ona iai lea o se faatau e faapea, o le iai e sili atu nai lo le leai, ma o lea la o loo soifua Le e silisili. Afai e le o soifua le Atua o lona uiga e le silisili o Ia nai lo se isi lava o loo soifua – ae o iina e faaleaogaina ai la le uiga moni o le Atua. O lona lua o finauga e faa’autu i mea o loo iai i le va nimonimo (teleological argument). O lea finauga e faapea o le tula’i mai o nei malamalama mata’utia i le lagi, o lona uiga la e sapaia ai iina le soifua mai o Le na na foafoaina. Faata’ita’iga, afai o le lalolagi lenei e silia ma ni nai selau maila e latalata ai pe mamao foi ma le la, e le mafai la ona tau’aveina e le la ola uma o nei malamalama e pei ona iai i le taimi nei lava. Afai e iai foi sina eseesega itiiti lava o pasene o tulaga o nei malamalama iti e sasi ai, e feoti mea ola uma o loo iai i lenei lalolagi. O le eseesega o sina molekula faa-poroteni e tasi pe a fuafuaina i le 10243 (o le 10 e mulimuli iai 0 e 243). O se sela (cell) e tasi e aofia ai le miliona ma miliona o molekula faa-poroteni.

O se finauga lona tolu e sapaia ai le Atua soifua o le mautinoa lea o soo se mea e tupu, e iai lava lona pogai (cosmological argument). E iai le pogai o mea uma o loo iai le ola. O lenei foi lalolagi ma mea ola uma o loo iai, e iai lona mafua'aga. E tatau ona iai lava se mea na pogai mai ai le soifua o mea uma o loo ola i lenei lalolagi. E faasilisili ai, e tatau ona iai se pogai e leai sona amataga e ala mai ai mea ola uma lava. O Lena Pogai o le Atua. O le finauga lona fa e faatatau i tulafono o le amio lelei (moral argument). I soo se aganuu, o loo iai ni tulafono e puipuia ai le amio lelei. O loo ia i tatou uma le faalogona e iloa ai le amio e sa’o atoa ma le amio e sese. O le fasioti tagata, pepelo, gaoi, ma le amio faaletaupulea e le mana’omia e le lalolagi atoa. O fea la na afua mai ai o tatou lagona o le sa’o ma le sese pe afai e le’i aumaia e le Atua paia?

Poo le a lava nei mea uma, ua tautino mai le Tusi Paia e iai lava tagata ua tetee i le malamalama ma le tomai moni o le Atua ae talitonu i le mea pepelo. Fai mai Roma 1:25, “O i latou ia o e ua fesuiai le upu moni i le Atua ma le upu pepelo; ua latou matatau foi ma auauna i mea na faia, a ua tuua o ia na na faia, o ia o le viia e faavavau. Amene.” O loo tautino mai foi e le Tusi Paia le leai o se avanoa o le tagata e le talitonu i le Atua, “aua o ana mea e le vaaia talu ona faia o le lalolagi, e vaaia lava ia i le mafaufau i mea na faia, o lona mana lava lea e faavavau ma lona Atua; o lea foi ua le mautali ai i latou” (Roma 1:20).

Ua fai mai niisi tagata latou te le talitonu i le Atua leaga e “le o se manatu faa saienitisi” poo le “leai foi o se faamaoniga.” O le mafuaaga moni lava, e ta’utino loa le tagata o loo iai se Atua, e tatau foi la ona faia lona tiute aga’i i le Atua ma iloa ua ia mana’omia le faamagaloga mai le Atua (Roma 3:23; 6:23). Afai o loo soifua le Atua, ua iai o tatou tiute e tatau ona faataunuu mo Ia. Afai e le o soifua le Atua, ona pule lava lea o le tagata i lana mea e fai e aunoa ma se popole pe faamasinoina i tatou e le Atua. Ou te talitonu o lena le mafua’aga ua tele ina taofiofi ai le toatele i le mataupu o le “ola faasolo (evolution)’ – ina iai se tasi manatu e ese mai e fai ai filifiliga a tagata pe afai ua le talitonu i le Atua, o Le Na faia mea uma. O le Atua o loo soifua ma e i’u lava ina iloa e tagata uma lea mea. O le mea moni lava, e a la ona taumafai niisi e faamalosia le faaleaogaina o mau e faasino i Lona soifua, aua ua faamaonia ai iina o loo Ia soifua.

Faataga mai a’u ona o se finauga lava lea e tasi e faatatau i le Atua o loo soifua. Ou te iloa faapea o loo soifua le Atua? Pi te iloa o loo soifua le Atua aua ou te talanoa ia te Ia i aso uma lava. Ou te le faalogoina lona siufofoga o loo tautala manino mai ia te a’u, ae ou te lagonaina lona mamalu, ou te lagonaina foi Lana ta’ita’iga, ua ou iloa Lona alofa, ma ou te momo'o i Lona alofa tunoa. Ua iai ni tulaga ua tutupu i lo’u olaga e matua leai ai lava se isi faamatalaga ua na o le Atua. O le faaolaina o a'u e le Atua o se matua vavega tele ua suia ai lo'u olaga tau ina ia ou faailoa ma vivii ia te Ia o Le soifua. E leai lava niisi o nei faamatalaga e mafai ona tosinaina se tasi e faafiti ma le talitonu i se mea ua matua manino lelei. I le i'uga, o le soifua mai o le Atua e tatau ona talia i le faatuatua (Eperu 11:6). O lou faatuatua i le Atua e le o lou osofa'ia lea o le pogisa, ae o se ala saogalemu e te taunuu ai i se potu ua malamalama lelei, o loo laulaututu mai ai niisi tagata pe a ma le 90 pasene.

English



Toe taga'i i le itulau ua faaliliuina i le gagana Samoa

O soifua le Atua? O a ni mea e iloa ai o loo soifua le Atua?
© Copyright Got Questions Ministries