Aisea ua le pule ai i le ola?




Fesili: Aisea ua le pule ai i le ola?

Tali:
Ua momomo lo'u alofa mo i latou o loo manatunatu e faauma o latou soifua e ala i le pulea o o latou lava ola. Afai o oe lena i le taimi lava lenei, e le taumate o loo tautala leotele atu ou faalogona, e faapea ua leai sou faamoemoe ma ua le mautonu lou loto. Ua foliga foi o loo e tu i le ta'ele o se lua, ma ua leai lava sina faamoemoe o totoe e te mafai ona maua ai se to'afilemu. Ua foliga mai e leai lava se tasi o popole ia te oe pe malamalama foi i le mea o loo e lagonaina. Ua le taua foi lenei soifuaga ia to oe... pe sa'o ea?

E toatele tagata e oo i faalagona faapea i lea taimi ma lea taimi. O ni fesili e oo mai i lo'u mafaufau pe a oo mai taimi faapenei, e faapea, "O le finagalo ea lea o le Atua, o Le na faia a'u?" "Po ua itiiti tele le Atua ua Na le mafai ona fesoasoani ia te a'u?" "Ua tele tele ea o'u faafitauli mo Ia?"

Ou te fiafia e faailoa atu ia te oe, afai e te faaavanoa ni nai minute e te tuuina atu ai mea uma i le Atua seia faaali mai e Ia ia te oe o Ia lava o le Atua, Na te faamaonia ia te oe Lona mata'utia! "Aua e leai se mea e faigata i le Atua" (Luka 1:37). Pe mata o loo iai ni ou manu'a mai tulaga ua mavae sa matua ufitia ai oe i se manatu ua tuulafoaiina. O faalogona ia e faaosofia ai le manatu leaga, o le ita, loto fatu'atia, o mana'oga ia taui ma sui atu, o le mata'u e le aoga mo oe, ma isi lava mea faapena ua fai ma faafitauli i lou va feagai ma niisi e aoga mo lou olaga. Ae peita'i, o le pule i le ola e na ona oo mai ai le loto faavauvau i e o loo sili ona e alofa iai e te le'i manao e faatiga; ae oo ai ma ni faaletonu i o latou foi olaga atoa.

'Aisea e le tatau ai ona e pule i lou ola? La'u uo e, e tusa poo le a le leaga o lou olaga, o loo soifua lava le Atua alofa, o loo Ia faatali fo mo oe seia e faataga o Ia e ta'ita'i oe nai le ala pogisa seia e taunuu atu i Lona malamalama e matua matagofie. O Ia o lou faamoemoe a'ia'i. O Lona Suafa o Iesu.

O Iesu lea, le alo e le pona o le Atua, ua oulua tutu faatasi i taimi e te lagonaina ai lou tu toatasi ma le mamasagia. O le perofeta o Isaia sa faamatalaina o Ia e faapea, "Na tupu ae o Ia e pei o se tatupu i ona luma, e pei o le pogai i le nuu naumati; e le aulelei pe lalelei o ia; a tatou vaavaai ia te ia e leai sona matagofie, ina ia tatou mananao ai ia te ia. Ua inosia ma tuulafoaiina o ia e tagata; o le tagata faanoanoa, ua masani foi ma le tiga; e peiseai ua 'alo ese mata ia te ia; ua inosia o ia, ma ua tatou le manatua lava o ia. E moni, ua na tauave o tatou tiga, ma na tauave o tatou faanoanoa; a ua tatou manatu o ia ua taia, ua fasia e le Atua, ma ua faatigaina. A ua manu'a o ia ona o a tatou solitulafono, ua momomo o ia ona o a tatou amio leaga; o le aoaiga e filemu ai tatou sa i ona luga lea, o ona faalavalava foi ua malolo ai tatou. O i tatou uma ua se i tatou e pei o mamoe, ua taitasi ma faasaga i lona lava ala; a ua faaoo ia te ia e Ieova le amio leaga o i tatou uma" (Isaia 53:2-6).

La'u Uo e, o mea una nei na oo ia Iesu Keriso lenei ma ua Ia manumalo ai ina ia faamagaloina au agasala uma lava! Poo le a lava le mamafa ma le maualalo o manatu o loo e tauamoina, ia e iloa e faamagalo o Ia ia te oe pe afai e te faamaulalo ma salamo (liliu ese mai au agasala ae aga'i i le Atua). "Ia e valaau foi ia te au i le aso e i ai le puapuaga; ou te laveaiina ai oe, ona e vivii mai ai lea ia te a'u" (Salamo 50:15). E leai se mea leaga ua e faia e le mafai e Iesu ona faamagalo. O isi o Ana auauna filifilia i le Tusi Paia sa matua leaga na'ua a latou agasala, e pei o le fasioti tagata (Mose), mulilua (le Tupu o Tavita), faataugaina tagata i le tino atoa ma le mafaufau (o le Aposetolo o Paulo). Ae sa faamagaloina i latou ma maua se olaga ua sili ona alualu i le Alii. "Ia e matua fufulu mai ia te au i la'u amio leaga, ma ia e faamama mai ia te au i la'u agasala" (Salamo 51:2). "O lenei, afai o ia Keriso se tasi, o le tagata fou ia; ua mavae mea tuai, faauta, ua faafouina mea uma" (2 Korinito 5:17).

Aisea e le tatau ai ona e pule i lou ola? La'u uo e, o loo tula'i sauni le Atua e toe faaleleia mea uma ua 'faaleagaina" ... faatatau tonu lava i le olaga o loo e ola ai i le taimi nei, lea o loo e mana'o e faamuta i lou pule ai. Ua tusia e le perofeta o Isaia e faapea: "Ua i o'u luga le Agaga o le Alii o Ieova; aua ua faauuina a'u e Ieova e tala'i le tala lelei i e ua tigaina, ua ia auina mai a'u e fufusi i e loto momomo, e tala'i le saolotoga i le tafeaga, ma le matua tatalaina o e ua fusifusia. E tala'i le tausaga e talileleia mai ai e Ieova, ma le aso e taui ai ma sui e lo tatou Atua; e faamatalaloto i e faanoanoa uma lava; e avatu le fiafia i e faanoanoa i Siona, e foaiina atu ia i latou le matagofie e sui a'i le lefulefu, o le u'u o le olioli e sui a'i le faanoanoa, o le ofu e fai a'i viiga e sui a'i le loto faavaivai; e igoa i latou, o laau o le amiotonu, o le faatoaga a Ieova, e fai mona viiga" (Isaia 61:1-3).

Sau ia Iesu, seia tago atu o Ia e toe faafou lou olioli ma faamausali lou aoga a o e talitonu ia te Ia ina ia amataina se galuega fou i lou olaga. "Ia e faafoisia mai ia te au le olioli o le olataga mai ia te oe; ia e taofimauina foi o a'u ma le loto fiafia. "Le Alii e, ia e faamatala mai o'u laugutu; ona ta'uta'u atu lea e lo'u gutu lou viiga. Aua ua e le finagalo i se taulaga; ana e finagalo i ai po ua ou avatu lava; ua e le fiafia i se taulaga mu" (Salamo 51:12; 15-17).

E te talia nei ea le Alii e fai ma ou Faaola ma Leoleo Mamoe? Na te leoleo i ou manatunatuga ma ou ala, i aso taitasi, e ala i Lana Upu, le Tusi Paia. "Ou te a'oa'o ia te oe, ma faasino ia te oe i lea lava ala e te savali ai; ou te faatonu ia te oe, ma ou vaai ia te oe" (Salamo 32:8). "O ia o le e tumau ai ou tausaga, o le tele o le faaolataga, o le poto ma le malamalama; o le mata'u ia Ieova, o lana oloa lea" (Isaia 33:6). Ia Keriso, e iai lava ou faafitauli, ae ua iai nei foi ma lou FAAMOEMOE. O Ia o se "Uo e sili ona pipii mai i lo le uso" (Faataoto 18:24).

Afai ua e mana'o e talitonu ia Iesu Keriso e fai ma ou Faaola, tautalagia upu nei i lou lava loto i le Atua. "Le Atua e, ou te mana'omiaina Oe i lo'u olaga. Faamolemole faamagalo mai au i mea uma lava ua ou faia. Ua ou tuuina atu nei lo'u faatuatua ia Iesu Keriso ma talitonu o Ia o lo'u Faaola. Faamolemole faamama a'u, faamalolo ia te a'u, ma ia toe faafoisia mai le olioli i lo'u olaga. Faafetai ona o Lou alofa mo a'u atoa foi mo Iesu o Le na maliu e sui ai a'u."

Ua fai sau filifiliga ma'oti mo Keriso ina ua e faitau malamalama i itulau nei? Afai o lea, asiasi i le "Ua ou talia Iesu i le Aso lenei" o loo iai i lalo.


Toe taga'i i le itulau ua faaliliuina i le gagana Samoa

Aisea ua le pule ai i le ola?