settings icon
share icon
Fesili

Pe iai ea se ola i talaatu o le oti?

Tali


Pe iai ea se ola i talaatu o le oti? Fai mai le Tusi Paia, "O le tagata ua fanau mai i le fafine, ua saasaa ona aso, mona ua tumu i le atuatuavale. E tupu ae o ia e pei o le fuga, a e salaeseina; e mavae atu foi o ia e pei o le ata, ma ua le tumau....Afai e oti le tagata, e toe ola mai ea o ia" (Iopu 14:1-2, 14)?

E pei o Iopu, ua lu'itauina le toatele i lea fesili. O le a tonu le mea e tupu i le tagata pe a uma lona ola? E gata ai ea iina o tatou ola? Pe mata e faatusa o tatou ola o se faitotoa i le lalolagi e ulufafo ma toe ulufale mai ai se'ia oo ina 'ausia le tapulaa o le olaga e sili atu nai lo le muamua? Tatou te o uma ea i se nofoaga e tasi, pe eseese nofoaga tatou te o iai? Pe moni ea e iai se lagi ma seoli, pe na o se vaaiga faalemafaufau o loo tatou iai?

O loo ta'utino le Tusi Paia e le gata ina iai le ola pe 'a mavae lenei olaga, ae o loo iai fo'i le ola e faavavau e sili lona matagofie "O mea e le'i vaaia e mata, e le'i lagona foi e taliga, e le'i oo foi i le loto o se tagata, o mea ia ua saunia e le Atua mo i latou o e alofa ia te Ia" (I Korinito 2:9). O Iesu Keriso, le Atua na liu tino tagata, sa afio mai i le lalolagi ma tuulima mai ia te i tatou le mea alofa o le ola e faavavau. "A ua manu'a o Ia ona o a tatou solitulafono, ua momomo o Ia ona o a tatou amio leaga; o le aoaiga e filemu ai tatou sa i ona luga lea, o Ona faalavalava foi ua malolo ai tatou" (Isaia 53:5).

Na amoina e Iesu le faasalaga sa tatau ona o'o ia i tatou uma ma ua osia e Ia le taulaga i Lona lava tino mo i tatou. I le aso tolu, Na faamaonia ai Lona manumalo a'ia'i i le oti e ala i Lona toe tu mai nai le tuugamau, i la le Agaga atoa ma le tino. E 40 aso na toe nofo ai o Ia i lenei lalolagi ma sa molimauina e afe o tagata ae le'i o'o ina toe fo'i atu o Ia i Lona nofoalii i le lagi e faavavau. Fai mai Roma 4:25, "Na tuuina mai o Ia ona o a tatou agasala, ma toe faatuina mai ina ia ta'uamiotonuina ai i tatou."

E matua lelei lava faamaumauga uma o le toe tu mai o Keriso nai e ua oti. Na lu'itauina e le Aposetolo o Paulo niisi tagata ia latou tuufesili i e na molimau i le toe tu mai o Keriso ina ia faamaonia ai tusitusiga uma, ae ua leai lava se tasi e faasagatau i nei molimau. O le toe tu o Keriso o le maa tulimanu o loo 'autu ai le talitonuga faa-Kerisiano; ona ua toe tu Keriso lava Ia nai e ua oti, ua ia te i tatou foi lea faatuatua, tatou te toe tutu foi.

Ua apoapoai Paulo i Kerisiano anamua o e sa le talitonu i lea mea: "Afai foi ua tala'iina Keriso ua Ia toe tu mai nai e ua oti, pe faapefea ona fai mai o isi o outou, e leai se toe tu mai o e ua oti? A e afai e leai se toe tu mai o e ua oti, po ua le toe faatuina mai Keriso" (I Korinito 15:12-13).

O Keriso o le Ulua'i Fua o le seleselega e matua tele o i latou uma e toe tutu mai nai e ua oti. Na oo mai le oti i la le tino ona o le tagata e toatasi, o Atamu, o le ua tatou aiga uma iai. A o i latou uma ua toe fanau i le aiga o le Atua e ala i le faatuatua ia Iesu Keriso ua latou maua le ola fou (I Korinito 15:20-22). E faapei ona faatuina e le Atua le tino o le Alii o Iesu, na te toe faaatuina foi i tatou i le toe afio mai o Iesu (I Korinito 6:14).

E ui ina toe tutu uma i tatou i se taimi, tatou te le o faatasi i le lagi. E ta'itoatasi ma fai lana lava filifiliga i le taimi nei poo fea e alu iai i le ola e faavavau. Fai mai le Tusi Paia ua tofia mo tagata ina ia tasi lo latou oti, a e mulimuli ane o le faamasinoga (Eperu 9:27). O e ua amiotonu e ulufale i le ola e faavavau i le lagi, a o e le talitonu e nofosala i le faalumaina e faavavau, poo seoli foi (Mataio 25:46).

O Seoli, e le na o se nofoaga faalemafaufau, ae o se nofoaga moni lava e e pei o le lagi. Ae o se nofoaga e mau ai e amioletonu ma latou iloa ai le toasa o le Atua e faavavau, e leai se mea e gata mai ai. E faavavau foi ona latou faafeagai ma le faatama'ina o le mafaufau, o manatunatuga, o le faataugaina o le tino, o le faalumaina ma le ma, ma isi lava tulaga faapena.

Ua faatusaina seoli i se fafa, o le to e le gata (Luka 8:31; Faaaliga 9:1), o se lepa afi foi, ma le teio, e puapuagaina ai foi i latou o loo nonofo ai i le ao ma le po e faavavau faavavau lava (Faaaliga 20:10). E iai le tagiaue ma le lilivau o nifo i seoli, o lona uiga e tele le fatu'atia ma le ita (Mataio 13:42). O se nofoaga "e le mamate o latou ilo ma e le tineia foi le afi" (Mareko 9:48). E le fiafia lava le Atua "i le oti o le amio leaga, a ia liliu mai le amio leaga ai lona ala, ma ola ai" (Esekielu 33:11). Ae peita'i, Na te le avea faatagataotauaina i tatou; ae afai tatou te fulitua ia te Ia, ua leai se mea Na te toe mafaia na ona Ia faataunuuina le filifiliga a le tagata ua fai-o le ola lea e aunoa ma Ia.

O loo su'esu'eina i tatou o e ola i lenei lalolagi--ma e sauniuni ai foi mo mea e tutupu i le lumana'i. Mo e ua talitonu, o nei lava o loo ola ai i latou e faavavau i le mamalu o le Atua. E faapefea la ona tatou amiotonu ina ia talia ai lea ola e faavavau? E tasi lava le ala -- o le faatuatua ma le talitonu i le Alo o le Atua, o Iesu Keriso. Ua fetalai Iesu, "O a'u nei o le toe tu ma le ola; o le faatuatua mai ia te a'u, e ui lava ina oti, a e ola lava ia. O tagata ula uma o e faatuatua mai ia te A'u, e le oti lave e oo i le faavavau;" (Ioane 11:25-26).

O le meaalofa o le ola e faavavau e avanoa mo tagata uma, ae e ao ina ia tatou faafiti i mea o lenei lalolagi ma avea i tatou o taulaga ola mo le Atua. "O le faatuatua i le Alo, ua ia te ia le ola e faavavau; a o le le faatuatua i le Alo e le iloa e ia le ola, a o le toasa o le Atua o loo tumau lava i ona luga" (Ioane 3:36). E le toe iai se avanoa tatou te salamo ai i a tatou agasala pe a uma lenei olaga aua a tatou vaaia loa le Atua, ua i'u le taimi o filifiliga ae tau ina talitonu ia te Ia. O loo faatalitali mai o Ia ia i tatou ina ia ulu atu i le faatuatua ma alofa ia te Ia i le taimi lava lenei. Afai tatou te talia le maliu o Iesu Keriso o le tau lea o le tatou fulitua i le Atua, ona mautinoa lea le atoatoa o o tatou olaga i lenei lalolagi, ma le ola e faavavau i le mamalu o Keriso.

Afai ua e mana'o e talia nei lava Iesu Keriso e fai ma ou Faaola, vaai le tatalo faata'ita'i lea. Manatua, o lea tatalo poo se isi foi tatalo e le faaolaina ai oe. Ua ona o lou talitonu ia Keriso e faaolaina ai oe mai le agasala. O lea tatalo e mafai ona e faamatala ai i le Atua lou faatuatua ia te Ia atoa ma lau faafetai ia te Ia mo lou faaolataga. "Le Atua e, ua ou iloa ua ou agasala ia te oe ma ua tatau lava ia te a'u lo'u faasalaga. Ae ua avea e Iesu Keriso lo'u faasala ina ia ou magalo e ala i lo'u faatuatua ia te Ia. Ua ou fulitua nei ma a'u agasala ma tuuina atoa lo'u talitonuga ia te Ia mo lo'u faaolataga. Faafetai mo Lou alofa tunoa e matagofie atoa ma Lau faamagaloga -- o le meaalofa lea o le ola e faavavau! Amene!"

Ua fai sau filifiliga ma'oti mo Keriso ina ua e faitau malamalama i itulau nei? Afai o lea, asiasi i le "Ua ou talia Iesu i le Aso lenei" o loo iai i lalo.

English



Toe taga'i i le itulau ua faaliliuina i le gagana Samoa

Pe iai ea se ola i talaatu o le oti?
© Copyright Got Questions Ministries