Pumunta ba si Hesus sa impiyerno sa pagitan ng Kanyang kamatayan at muling pagkabuhay?

Tanong: "Pumunta ba si Hesus sa impiyerno sa pagitan ng Kanyang kamatayan at muling pagkabuhay?"

Sagot: Ang kaluluwa ba ni Hesus ay pumunta sa impiyerno noong panahon sa pagitan ng Kanyang kamatayan at muling pagkabuhay? Mayroong malaking kalituhan o kaguluhan hinggil sa katanungang ito. Ang konseptong ito ay pangunahing nagmula sa “Apostle’s Creed”, na nagsasabing, “Siya ay pumanaog sa impiyerno.” Mayroon ding ilang mga kasulatan na kung saan, nakadepende sa kung papaano ito isinalin sa ibang wika, na naglalarawan kay Hesus na pumunta sa “impiyerno.” Sa pag-aaral sa ganitong isyu, napaka-importante na unang maunawaan muna kung ano ang itinuturo ng Bibliya tungkol sa lugar ng mga namatay.

Sa Hebreong Kasulatan, ang salitang ginamit sa paglalarawan sa lugar ng mga namatay ay ang “Sheol.” Nangangahulugan itong “lugar ng mga patay” o “lugar ng mga lumisan na mga kaluluwa/espiritu.” Ang Griyegong salita sa Bagong Tipan na ginamit sa katagang impiyerno ay “Hades,” na tumutukoy din sa “lugar ng mga patay.” Ang ibang mga Kasulatan sa Bagong Tipan ay nagpapakita na ang Sheol/Hades ay isang temporaryong lugar, kung saan ang mga kaluluwa ay inilalagak habang sila ay naghihintay sa kahuli-hulihang muling pagkabuhay at paghuhukom. Malinaw na ibinibigay ng aklat ng Pahayag 20: 11-15 ang kaibahan sa pagitan ng dalawa. Impiyerno (Lawa ng apoy) ay isang permanente at kahuli-hulihang lugar ng mga hinatulang hindi mananampalataya. Ang Hades naman ay isang temporaryong lugar. Dahil dito, Hindi. Si Hesus ay hindi pumunta sa “impiyerno” dahil ang “impiyerno” ay isang lugar na darating pa, mangyayari lamang ito matapos ang paghuhukom ng Dakilang Puting Trono (Pahayag 20: 11-15).

Ang Sheol/Hades ay isang lugar na mayroong dalawang pagkakahati (Mateo 11:23; 16:18; Lucas 10:15; 16:23; Mga Gawa 2:27-31), ang mga lugar ng mga ligtas at hindi mananampalataya. Ang lugar ng mga ligtas na ay tinatawag na “Paraiso.” Ang mga lugar ng mga ligtas at ng mga hindi mananampalataya ay pinaghihiwalay ng “Bukod sa lahat ng mga bagay na ito, sa pagitan namin at sa iyo ay mayroong malaking bangin. Dahil dito, sila na maghahangad na tumawid mula rito patungo sa iyo ay hindi makakatawid. Maging sila na maghahangad tumawid mula riyan patungo sa amin ay hindi makatatawid.” (Lucas 16:26). Noong si Hesus ay umakyat sa langit, dinala Niya ang mga nasa Paraiso (mananampalataya) kasama Niya (Efeso 4: 8-10). Ang lugar naman ng mga hindi mananampalataya sa Sheol/Hades ay nanatiling walang pagbabago. Ang lahat ng mga namatay na hindi mananampalataya ay pupunta doon at maghihintay ng kanilang darating na kahuli-hulihang paghuhukom. Si Hesus ba ay pumunta sa Sheol/Hades? Oo, ito ay ayon sa Efeso 4:8-10 at 1 Pedro 3:18-20.

Ang ilan sa mga kalituhan ay lumabas mula sa talata ng Awit 16:10-11, "Pagkat di mo tutulutang ang mahal mo ay malagak, sa balon ng mga patay upang doon ay maagnas. Ituturo Mo ang landas na buhay ang hahantungan, sa piling Mo’y madarama ang lubos na kagalakan; ang tulong Mo’y nadudulot ng ligayang walang hanggan.” Ang salitang “Impiyerno” ay hindi tamang pagsasalin-wika sa talatang ito. Ang tamang pagsasalin-wika dito ay “ang libingan” o “Sheol.” Makalipas ang ilang taon sinabi ni Hesus sa isang magnanakaw na nakapako sa krus katulad Niya, “Ngayong araw na ito, makakasama mo Ako sa Paraiso” ang Kanyang katawan ay nasa libingan ; ang Kanyang kaluluwa/espiritu ay pumunta sa “Paraiso” sa lugar ng Sheol/Hades. Saka Niya kinuha ang mga namatay na mananampalataya mula sa Paraiso at dinala Niya ang mga ito sa Langit. Nakakalungkot, karamihan sa mga pagsasalin-wika ng Bibliya, ang mga taong nagsasalin-wika ay nagkakamali sa kung papaano nila isalin sa salitang Hebreo at Griyego ang “Sheol,” “Hades,” at “Impiyerno.”

Ang ilan ay mayroong pananaw na si Hesus ay pumunta sa “Impiyerno” o ang lugar ng mga nagdurusa sa Sheol/Hades upang mas lalo pang maparusahan dahil sa ating mga kasalanan. Ang ganitong ideya ay ganap na hindi Biblikal! Ang kamatayan ni Hesus sa krus at ang Kanyang pagdurusa bilang kapalit natin ay ang nagbigay ng ating katubusan. Ang Kanyang umagos na dugo ay ang nagbigay katibayan sa ating pagkalinis mula sa kasalanan (1 Juan 1:7-9). Habang Siya ay nakabitin sa krus, inako Niya ang kasalanang pasan ng buong sangkatauhan. Sinasabi ng 2 Corinto 5:21 : “Ito ay sapagkat siya na hindi nagkasala ay ginawang kasalanan para sa atin upang tayo ay maging katuwiran ng Diyos sa kaniya.” Ang ganitong bintang ng kasalanan ay tinutulungan tayong maunawaan ang pagpupunyagi ni Kristo sa hardin ng Getsemane kalukob ng pursuwelo ng ksaalanan na ibubuhos sa Kanya sa krus.

Noong sumigaw si Hesus sa krus, “Ama, bakit Mo Ako pinabayaan?” ito ang panahong nahiwalay Siya mula sa Ama dahil sa mga kasalanan na ibinuhos sa Kanya. Habang ibinibigay Niya ang Kanyang Espiritu, sinabi Niya, “Ama, sa Iyong mga kamay ibinibigay Ko ang Aking Espiritu.” Ang Kanyang pagdurusa ay nakumpleto bilang kapalit natin. Ang Kanyang kaluluwa/espiritu ay pumunta sa Paraisong parte ng Hades. Si Hesus ay hindi pumunta sa impiyerno. Ang pagdurusa ni Hesus ay natapos noong Siya ay namatay. Ang kabayaran sa kasalanan ay nabayaran na. Saka Niya hinintay ang muling pagkabuhay ng Kanyang katawan at ang Kanyang pagbabalik sa kaluwalhatian. Pumunta ba si Hesus sa impiyerno? Hindi. Pumunta ba si Hesus sa Sheol/Hades? Oo.

Balik sa Tagalog Home Page