Ano ang ibig sabihin ng pagtanggap kay Jesus bilang Sariling Tagapagligtas?

Tanong: "Ano ang ibig sabihin ng pagtanggap kay Jesus bilang Sariling Tagapagligtas?"

Sagot: Tinanggap mo na ba si Jesu-Cristo bilang sarili mong Tagapagligtas? Bago ka sumagot, hayaan mong ipaliwanag ko muna ang tanong. Para maunawaan mong mabuti ang tanong na ito, kailanggang maunawaan mo muna ang mga salitang “Jesu-Cristo”, “sarili”, at “tagapagligtas.”

Sino si Jesu-Cristo? Maraming tao ang nagsasabing si Jesu-Cristo ay isang mabuting tao, dakilang guro, at propeta ng Diyos. Totoo ang lahat ng ito, ngunit hindi sapat na paliwanag kung sino siya talaga. Sinasabi ng Biblia na si Jesus ay Diyos na nagkatawang tao. Ang Diyos ay naging isang tao (Juan 1:1,14). Naparito ang Diyos sa mundo upang tayo ay turuan, ituwid, patawarin, pagalingin at higit sa lahat mamatay para sa ating mga kasalanan. Tinanggap mo na ba sa iyong puso ang Jesus na ito?

Ano ang ibig sabihin ng tagapagligtas at bakit kailangan natin ang tagapagligtas? Sinasabi sa Roma 3:10-18, na lahat tayo ay nagkasala at nakagawa ng kasamaan kung kaya nararapat lamang sa atin ang galit mula sa Panginoon. Ang tanging nararapat na parusa para sa kasalanan laban sa walang hanggang Diyos ay ang walang hanggang kaparusahan (Roma 6:23; Pahayag 20:11-15). Dahil dito, kailangan natin ng isang tagapagligtas!

Naparito si Jesu-Cristo sa mundo at namatay para sa atin. Ang kamatayan ni Jesus, bilang Diyos na nagkatawang tao, ay isang walang hanggang kabayaran para sa ating mga kasalanan (2 Corinto 5:21; Roma 5:8). Tiniis ni Jesus ang parusa na para sana sa atin nang sa gayon ay hindi na tayo maparusahan. Ang muling pagkabuhay ni Jesus mula sa mga patay ay nagpapatunay na ang kanyang kamatayan ay sapat na bayad sa ating mga kasalanan. Kaya nga si Jesus lamang ang natatanging tagapagligtas nating lahat (Juan 14:6; Mga Gawa 4:12). Ikaw ba’y nagtitiwala na kay Jesus bilang iyong tagapagligtas?

Si Jesus ba ang iyong tagapagligtas? Sa akala ng maraming tao, ang pagiging kristyano ay ang pagdalo sa simbahan, pagsagawa ng mga ritwal, at ang hindi paggawa ng masama o kasalanan. Hindi ganyan ang kristyano. Ang tunay na kristyano ay ang pagkakaroon ng isang mabuting relasyon kay Jesu-Cristo. Ang pagtanggap kay Cristo bilang sariling tagapaligtas ay nangangahulugan ng pagsampalataya at pagtitiwala sa kanya. Walang sinumang maliligtas dahil sa pananampalataya ng iba, at wala ring sinumang mapapatawad dahil lamang sa kanyang mabubuting gawa. Ang tanging paraan para maligtas ay ang pagtanggap natin kay Jesu Cristo bilang sariling tagapagligtas, at ang pagtitiwala na ang kanyang kamatayan sa krus ay siyang kabayaran sa ating mga kasalanan, at ang kanyang muling pagkabuhay ang katiyakan na tayo ay may buhay na walang hanggan (Juan 3:16).

Kung nais mong tanggapin si Jesu Cristo bilang sarili mong tagapagligtas, narito ang isang panalangin na maaari mong ipanalangin sa Diyos. “O Panginoon, alam kong nagkasala ako laban sa iyo at nararapat lamang na ako’y parusahan mo. Ngunit inako ni Jesus ang aking kasalanan at tiniis ang parusang dapat ay sa akin. Patawarin mo ako sa aking mga kasalanan. Tinatalikuran ko ang aking mga kasalanan at magtitiwala ako ngayon kay Jesus para sa aking kaligtasan. Tinatanggap ko si Jesus bilang sarili kong tagapagligtas. Salamat po sa iyong kahanga-hangang biyaya at kapatawaran. At salamat din sa buhay na walang hanggan! Amen!”

Ikaw ba ay gumawa ng desisyon para kay Kristo dahil sa iyong mga nabasa dito? Kung Oo, I-Klick ang “Tinanggap ko si Kristo ngayon” sa ibabang kahon

Balik sa Tagalog Home Page