Bakit pinapahintulutan ng Diyos na may masamang mangyari sa mga mabubuting tao?

Tanong: "Bakit pinapahintulutan ng Diyos na may masamang mangyari sa mga mabubuting tao?"

Sagot: Bakit pinapahintulutan ng Diyos na may masamang mangyari sa mga mabubuting tao? Isa ito sa mga pinakamahirap na mga katanungan sa Teolohiya. Ang Diyos ay walang katapusan, walang hangganan, naroon sa lahat ng lugar at panahon, nakaka-alam sa lahat ng bagay at pinakamakapangyarihan sa lahat. Bakit tayong mga tao na (may hangganan, may katapusan, hindi naroon sa lahat ng lugar at panahon, hindi nakakaalam sa lahat ng bagay at walang kapangyarihan) ay umaasang lubos na mauunawaan ang Kanyang mga gawa? Ang ganitong isyu ay tinutugunan sa aklat ng Job. Pinahintulutan ng Diyos si Satanas na gawin ang lahat ng kanyang gustong gawin kay Job, ang hindi niya lang puwedeng gawin ay patayin ito. Ano ba ang naging reaksiyon ni Job? “Hindi ako matatakot kung ako man ay patayin, maiharap lamang sa Kanya itong aking usapin” (Job 13:15). “Hubad akong lumabas sa tiyan ng aking ina, hubad din akong babalik sa alabok, si Yahweh ang nagbibigay, Siya rin ang kukuha. Purihin si Yahweh!” (Job 1:21). Hindi nauunawaan ni Job kung bakit pinapahintulutan ng Diyos na mangyari ang lahat ng iyon sa kanya, subalit alam niyang ang Diyos ay mabuti kaya patuloy siyang nagtiwala sa Kanya. Sa Kahuli-hulihan, dapat ganoon din ang ating maging reaksiyon. Ang Diyos ay mabuti, walang kinikilingan, mapagmahal at maawain. Kung minsan may nangyayari sa ating buhay na hindi natin nauunawaan. Gayon man, sa halip na pagdudahan ang kabutihan ng Diyos, dapat ang ating magiging reaksiyon ay pagtiwalaan Siya. “Kay Yahweh ka magtiwala, buong puso at lubusan, at huwag kang mananangan sa sariling karunungan. Siya ay sangguniin sa lahat mong mga balak, at kanya kang itutumpak sa lahat ng iyong lakad” (Kawikaan 3:5-6).

Marahil ang mas mainam na katanungan ay, “Bakit maganda ang nagyayari sa hindi mga mabubuting tao?” Ang Diyos ay Banal (Isaias 6: 3; Pahayag 4: 8). Ang mga tao ay makasalanan (Roma 3: 23; 6: 23). Gusto mo bang malaman kung papaano tinitingnan ng Diyos ang sangkatauhan? Ito ay ayon sa nasusulat: Walang sinumang matuwid, wala kahit isa. Walang sinumang nakakaunawa, walang sinu-mang humahanap sa Diyos. Ang lahat ay lumihis ng daan, sama-sama silang naging walang pakinabang. Walang sinumang gumagawa ng mabuti, wala kahit isa. Ang kanilang lalamunan ay bukas na libingan. Sa kanilang mga dila ay ginagamit nila ang pandaraya. Ang kamandag ng mga ulupong ay nasa mga labi nila. Ang mga bibig nila ay puno ng pagsumpa at mapait na pananalita. Ang mga paa nila ay mabilis sa pagbuhos ng dugo. Pagkawasak at paghihirap ang nasa kanilang mga landas. Hindi nila alam ang landas ng kapayapaan. Ang pagkatakot sa Diyos ay wala sa kanila (Roma 3:10-18). Lahat ng tao sa mundong ito ay nararapat lamang na itapon sa impiyerno sa sandaling ito. Bawat segundo na tayo ay buhay ay dahil lamang sa grasya ng Diyos. Kahit na ang katakot-takot na hirap na nararanasan natin sa mundong ito ay mas mabuti pa kumpara sa nararapat na kaparusahan natin sa walang katapusang lawa ng apoy o impiyerno.

Ngunit ipinakita ng Diyos ang Kaniyang pag-ibig sa atin na noong tayo ay makasalanan pa, si Kristo ay namatay para sa atin. (Roma 5:8). Sa kabila ng pagiging makasalanan ng tao sa mundong ito, minahal pa rin tayo ng Diyos. Napakalaki ng pagmamahal ng Diyos sa atin dahil inako Niya mismo ang parusa sa ating mga kasalanan (Roma 6: 23). Ang tanging gagawin na lang natin ay maniwala sa ating Panginoong Hesu Kristo (Juan 3: 16; Roma 10: 9) upang mapatawad tayo sa ating mga kasalanan at matamo ang pangakong magkakaroon tayo ng tahanan sa langit (Roma 8: 1). Ang karapatdapat sa atin = Impiyerno. Ang ibinigay sa atin = Buhay na walang hanggan sa langit kung tayo’y mananampalataya. Sinasabi nga, ang mundong ito ay ang tanging impiyerno na mararanasan ng mga mananampalataya, at ang mundong ito ay ang tanging langit na mararanasan ng mga hindi mananampalataya. Sa susunod na tinatanong natin, “Bakit pinapahintulutan ng Diyos na may masamang mangyari sa mga mabubuting tao?” marahil ang dapat itanong natin ay, “Bakit pinapahintulutan ng Diyos na may magandang mangyari sa masasamang tao?”

Balik sa Tagalog Home Page