Ano ang pitong nakamamatay na mga kasalanan?

Tanong: "Ano ang pitong nakamamatay na mga kasalanan?"

Sagot: Ang pitong nakamamatay na kasalanan ay isang listahan na ginamit ng mga unang kristiano sa kanilang pagtuturo upang ipabatid sa mga tagasunod ang patungkol sa pagkagawi ng taong mahulog sa kasalanan. Ang maling pakahulugan patungkol sa listahan ng pitong “nakamamatay” na kasalanan ay ito ang mga kasalanang hindi patatawarin ng Dios. Maliwanag sa Biblia na ang kaisa-isang kasalanan na hindi patatawarin ng Dios ay ang patuloy na kawalang-paniniwala, dahil sa tinatanggihan nito ang kaisa-isang pamamaraan upang magtamo ng kapatawaran – si Jesu-Kristo at ang Kanyang kamatayan doon sa krus bilang ating kahalili.

Ang palagay ba patungkol sa pitong nakamamatay na kasalanan ay may basehan sa Biblia? Oo at hindi. Ipinapahayag sa Kawikaan 6: 16-19, “Ang kinamumuhian ni Yahweh ay pitong bagay, mga bagay na kanyang kinasusuklaman: 1) kapalaluan, 2) kasinungalingan, 3) ang mga pumapatay sa walang kasalanan, 4) pusong sa kapwa’y walang mabuting isipan, 5) mga paang ubod tulin sa landas ng kasamaan, 6) saksing sinungaling, mapaglubid ng buhangin, 7) pag-awayin ang kapwa, laging gusto niyang gawin.” Datapwa’t, hindi ito ang listahan ng pitong nakamamatay na kasalanan ayon sa pang-unawa ng karamihan.

Ayon sa Dakilang Santo Papa na si Gregory noong ika-6 na siglo, ang pitong nakamamatay na kasalanan ay ang mga sumusunod: kayabangan, pagkainggit, katakawan; kalibugan, poot, kasakiman at katamaran. Kahit na ang mga nabanggit ay hindi maikakailang mga kasalanan, hindi ito naisalarawan bilang “ang pitong nakamamatay na kasalanan” sa Biblia. Ang pinagkaugaliang listahan ng mga nakamamatay na kasalanan ay maaring maging magandang pamamaraan upang mai-kategorya ang mga iba’t-ibang mga umiiral na kasalanan. Halos ang bawat uri ng kasalanan ay maaring maisailalim sa isa sa pitong kategoryang ito. Mas mahalaga na ating maunawaan na ang pitong kasalanang ito ay hindi “mas nakamamatay” kaysa ibang kasalanan. Lahat ng kasalanan ay hahantong sa kamatayan (Roma 6:23). Purihin ang Dios, dahil kay Kristo Jesus, lahat ng ating kasalanan, kabilang na ang “pitong nakamamatay na kasalanan,” ay maaring patawarin (Mateo 26:28; Gawa 10:43; Efeso 1:7).

Balik sa Tagalog Home Page