Xana swi vula yini ku amukela Yesu tanihi Muponisi wa mina?




Xivutiso: Xana swi vula yini ku amukela Yesu tanihi Muponisi wa mina?

Nhlamulo:
Xana se u n’wi amukerile Yesu Kreste tanihi Muponisi wa wena? Leswaku u twisisa xivutiso lexi kahle, rhanga u twisisa marito lawa “Yesu Kreste,” “mina,” na “Muponisi.”

Yesu Kreste i mani? Vanhu lavanyingi va teka Yesu Kreste a ri munhu lonene, mudyondzisi lonkulu, kumbe muprofeta wa Xikwembu. Tinhlamuselo leti ti vula yena Yesu, kambe a ti n’wi hlamuseli hi ku helela leswaku i mani. Bibele yi hi byela leswaku Yesu i xiviri xa Xikwembu, i Xikwembu hi xivumbeko xa munhu (vona Yohane 1:1, 14). Xikwembu xi te emisaveni ku hi dyondzisa, xi hi hanyisa, xi hi laya, xi hi rivalela—ni ku hi fela! Yesu Kreste i Xikwembu, Muvumbi, Hosi ya hinkwakonkwako. Xana yena Yesu loyi se u n’wi amukerile?

Muponisi i yini, naswona hayini hi lava Muponisi? Bibele yi hi byela leswaku hinkwerhu hi dyohile; hinkwerhu hi yi endlile mintirho leyo biha (Varhoma 3:10-18). Hikwalaho ka leswi hi dyoheke, hi faneriwa hi vukarhi bya Xikwembu ni ku avanyisiwa hi xona. Xigwevo lexi lulameleke nandzu wa ku dyohela Xikwembu xo hetiseka, lexi hanyaka hi laha ku nga heriki, i xigwevo lexi nga heriki (Varhoma 6:23; Nhlavutelo 20:11-15). Hi swona swi endlaka hi lava Muponisi!

Yesu u te emisaveni ivi a hi fela. Rifu ra Yesu a ri ri hakelo leyi lulameleke swidyoho swa hina. (2 Vakorinto 5:21). Yesu u fele ku hakela xigwevo xa swidyoho swa hina (Varhoma 5:8). Yesu u hi ferile leswaku hi nga fi. Ku pfuxiwa ka Yesu ku tiyisekise leswaku rifu ra yena a ri ringene ku hakela xigwevo xa swidyoho swa hina. Xisweswo, Yesu hi yena ntsena a nga Muponisi (Yohane 14:6; Mintirho 4:12)! Xana wa n’wi tshemba Yesu ku va Muponisi wa wena?

Xana Yesu i Muponisi wa “wena?” Vo tala va teka Vukreste ku ri ku ya ekerekeni, ku endla magandzelo, ni ku nga endli swidyoho swo karhi. A hi byona Vukreste byolebyo. Vukreste bya ntiyiso i ku va ni vuxaka na Yesu Kreste. Ku amukela Yesu tanihi Muponisi wa wena swi vula ku veka ripfumelo ni ntshembo wa wena eka Yena. A nga kona loyi a ponisiwaka hi ripfumelo ra van’wana. A nga kona loyi a rivaleriwaka hi ku endla mintirho yo karhi. Ndlela yin’we ntsena ya ku ponisiwa i ku va wena hi wexe u amukela Yesu tanihi Muponisi wa wena, u tshembela eka rifu rakwe leswaku i hakelo ya swidyoho swa wena ni ku tshemba ku pfuxiwa ka Yena leswaku i xitiyisekiso xa wena xa vutomi lebyi nga heriki (Yohanw 3:16). Xana Muponisi wa wena hi yena Yesu ke?

Loko u lava ku amukela Yesu Kreste tanihi Muponisi wa wena, byela Xikwembu marito lawa. Tsundzuka leswaku ku vula xikhongelo lexi kumbe xikhongelo xihi ni xihi xin’wana a swi nge ku ponisi. I ku pfumela ka Kreste ni le ka rifu rakwe exihambanweni leswi nga ku ponisaka exidyohweni. Xikhongelo lexi xo va ndlela yo komba Xikwembu ripfumelo ra wena ni ku xi khensa hi ku ku ponisa. "Xikwembu, ndza swi tiva leswaku ndzi ku dyoherile naswona ndzi faneriwa hi xigwevo. Kambe ndza kholwa leswaku Yesu Kreste u suse xigwevo lexi ndzi fanelaka leswaku hi ku pfumela eka Yena ndzi kota ku rivaleriwa. Ndzi amukela ndzivalelo wa Wena naswona ndzi veka ntshembo wa mina eka wena leswaku u ndzi ponisa. Ndzi amukela Yesu tanihi Muponisi wa mina! Ndzi khensa nsovo wa wena lowunene ni ndzivalelo wa wena – ku nga nyiko ya vutomi lebyi nga heriki! Amen!"

Xana se u xi endlile xiboho xo amukela Kreste hikwalaho ka leswi se u swi hlayeke laha? Loko swi ri tano, tshikelela batheni la hansi leyi nge "Se ndzi amukele Kreste namuntlha."



Tlhelela eka tluka nkulu ra Xitsonga



Xana swi vula yini ku amukela Yesu tanihi Muponisi wa mina?