Ինչպէ՞ս կարող եմ վստահ լինել, որ մեռնելուց յետոյ Երկինք կգնամ:



Հարց. Ինչպէ՞ս կարող եմ վստահ լինել, որ մեռնելուց յետոյ Երկինք կգնամ:

Պատասխան.
Վստա՞հ ես, որ յաւիտենական կեանք ունես եւ մահից յետոյ Երկինք կգնաս: Աստուած ուզում է, որ վստահ լինես: Աստուածաշունչն ասում է. «Այս բաները գրեցի ձեզ՝ Աստուծոյ Որդու անունին հաւատացողներիդ, որպէսզի իմանաք, որ Աստուծոյ Որդուն հաւատալով դուք յաւիտենական կեանք ունէք» (Ա Յովհ. 5.13): Ենթադրենք՝ այս պահին կանգնած ես Աստուծոյ առաջ, եւ Նա քեզ հարցնում է. «Ինչո՞ւ քեզ թոյլ տամ, որ Երկինք մտնես»: Ի՞նչ կասէիր Նրան: Թէրեւս պատասխան չգտնես: Իմացի՛ր, որ Աստուած սիրում է մեզ եւ հնարաւորութիւն է տուել հաստատ իմանալու, թէ որտեղ ենք անցկացնելու յաւիտենութիւնը: Աստուածաշունչն այսպէս է ասում դրա մասին. «Որովհետեւ Աստուած այնպէս սիրեց աշխարհը, մինչեւ Իր միածին Որդուն տուեց, որպէսզի ամէն Նրան հաւատացողը չկորսուի, հապա յաւիտենական կեանք ունենայ» (Յովհ. 3.16):

Նախ պէտք է հասկանանք, թէ ի՞նչն է մեզ խանգարում Երկինք գնալու: Խնդիրն այն է, որ մեր մեղաւոր բնութիւնը խանգարում մեզ յարաբերուելու Աստուծոյ հետ: Մենք մեղաւոր ենք մեր բնութեամբ եւ մեր կատարած ընտրութեամբ: «Որովհետեւ բոլորը մեղանչեցին եւ Աստուծոյ փառքից պակասեցին» (Հռոմ. 3.23): Մենք ինքներս չենք կարող փրկել մեզ, «որովհետեւ շնորհով փրկուած էք հաւատքի միջոցով, եւ այս ոչ թէ ձեզնից է, հապա Աստուծոյ պարգեւն է. ոչ թէ գործերից, որ մէկը չպարծենայ» (Եփես. 2.8-9): Մենք արժանի ենք մահուան եւ մեր տեղը դժոխքն է, «որովհետեւ մեղքի վարձքը մահ է» (Հռոմ. 6.23):

Աստուած սուրբ եւ արդար է, Նա պիտի պատժի մեղքը, բայց նաեւ սիրում է մեզ եւ թողութիւն է ապահովել մեր մեղքին: Յիսուս ասաց. «Ես եմ ճանապարհը, ճշմարտութիւնը եւ կեանքը. ոչ ոք Հօր մօտ չի գալիս, եթէ ոչ՝ Ինձնով» (Յովհ. 14.6): Յիսուս խաչի վրայ մեռաւ մեզ համար. «Որովհետեւ Քրիստոս էլ մէկ անգամ մեղքերի համար չարչարուեց, այն Արդարը՝ անարդարների համար, որպէսզի ձեզ Աստծուն մօտեցնի» (Ա Պետր. 3.18): Յիսուս յարութիւն առաւ մեռելներից. «Որ մատնուեց մեր յանցանքների համար եւ յարութիւն առաւ մեզ արդարացնելու համար» (Հռոմ. 4.25):

Եւ այսպէս՝ վերադառնանք սկզբնական հարցին. « Ինչպէ՞ս կարող եմ վստահ լինել, որ մեռնելուց յետոյ Երկինք կգնամ»: Պատասխանը հետեւեալն է. հաւատա՛ Յիսուս Քրիստոսին եւ փիտի փրկուես (Գործք 16.31): «Բայց ովքեր Նրան ընդունեցին, նրանց, որ հաւատում են Նրա անուանը, իշխանութիւն տուեց Աստուծոյ զաւակներ լինելու» (Յովհ. 1.12): Դու կարող ես ստանալ յաւիտենական կեանքը որպէս ձրի ՊԱՐԳԵՒ: «Աստուծոյ ձրի պարգեւը յաւիտենական կեանք է մեր Տէր Յիսուս Քրիստոսով» (Հռոմ. 6.23): Այս պահից կարող ես լիարժէք ու իմաստալից կեանք ապրել: Յիսուս ասաց. «Ես եկայ, որ կեանք ունենան եւ էլ աւելի ունենան» (Յովհ. 10.10): Կարող ես յաւիտենութիւնը Յիսուսի հետ անցկացնել Երկնքում, որովհետեւ Նա խոստացել է. «Եւ եթէ գնամ ու ձեզ համար տեղ պատրաստեմ, նորից պիտի գամ եւ ձեզ Իմ մօտ առնեմ, որպէսզի ուր որ ես եմ՝ դուք էլ այնտեղ լինէք» (Յովհ. 14.3):

Եթէ ուզում ես Յիսուս Քրիստոսին որպէս քո Փրկիչ ընդունել եւ թողութիւն ստանալ Աստծուց, ահա մի պարզ աղօթք քեզ համար: Յիշի՛ր. այս աղօթքը կամ որեւէ այլ աղօթք չի կարող փրկել քեզ: Միայն հաւատքն առ Քրիստոս կարող է մեղքերի թողութիւն ապահովել: Բառերը չեն, որ փրկելու են, այլ Քրիստոսին հաւատալը: Այս աղօթքը սոսկ միջոց է, որ արտայայտես Աստծուն քո հաւատը Նրա հանդէպ եւ շնորհակալութիւն յայտնես քեզ ներելու համար: «Աստուա՛ծ իմ, գիտեմ, որ մեղանչել եմ Քո դէմ եւ արժանի եմ պատժի: Բայց Յիսուս Քրիստոս առաւ այն պատիժը, որ ես պիտի կրէի, որպէսզի Նրա հանդէպ իմ հաւատքով ներում լինի ինձ: Հաւատում եմ Քեզ փրկութեանս համար: Գոհանում եմ Քո սքանչելի շնորհի եւ թողութեան համար: Ամէն»:

Քրիստոսին դառնալու վճիռդ այս էջը կարդալու պատճառո՞վ է: Եթէ այո՝ սեղմիր «Այսօր ընդունեցի Քրիստոսին» կոճակը ստորեւ:



Վերադառնալ հայերէն սկզբնաէջ


Ինչպէ՞ս կարող եմ վստահ լինել, որ մեռնելուց յետոյ Երկինք կգնամ: