Sungkunsungkun:
Ai Debata do Jesus i? Ai hea do Jesus i mandok na Debata do Ibana?
Tangiang:
UAngka na manulak Jesus Debata mambahen sidalian ndang hea Jesus mandok na Debata do Ibana. Toho do Bibel i ndang hea manggurithon Jesus mandok hata na tangkas, “Debata do Ahu.” Alai ndang na marlapatan on, ndang hea didok Jesus na Debata Ibana.
Ai Debata do Jesus i? — Jesus mandok Debata do Ibana.
Taida ma isarana hata ni Jesus di Johannes 10:30, “Sada do Ahu dohot Ama i.” Holan ringkot do idaonta pandapot ni angka halak Jahudi tu hataNa laho mamboto na didok Ibana do Debata Ibana. Naeng didangguri nasida do Ibana dohot batu apala alani hata on: “Holan jolma sambing do Ho, mandok na Debata do Ho” (Johannes 10:33, pangondolion i ditambai). Diantusi halak Jahudi do tangkas aha na nidok ni Jesus—hadebataon. Jesus mandok, “Sada do Ahu dohot Ama i,” Na mandok do Ibana Ibana dohot Ama i sada do di hadirion dohot di impolana. Johannes 8:58 ma tudosan na asing. Jesus mandok, “Hupaboa ma na sasintongna tu hamu … andorang so tubu dope si Abraham, nunga adong Ahu!” On ma pandokan na mulak tu II Musa 3:14 tingki dipatudu Debata diriNa “AHU DO AHU.” Halak Jahudi na mambege hata on mangalusi marhite na mambuat batu laho mamunu Ibana ala padoshon diriNa tu Debata (blasphemy), songon na diparentahon Patik ni si Musa (V Musa 24:16).
Ai Debata do Jesus i? — Angka PangihutNa mandok Debata do Ibana.
Diulakhon si Johannes do taringot tu hadebataon ni Jesus i: “Hata i [Jesus] do Debata ” jala “nunga gabe daging Hata i” (Johannes 1:1, 14). Angka ayat on tangkas do patuduhon na Debata di bagasan daging do Jesus i. Ulaon ni Apostel 20:28 paboahon tu hita, “Gabe parmahan ma hamu di huria ni Debata, na tinuhorNa dohot mudarNa sandiri.” Ise do na manuhor huria i dohot mudarNa sandiri? Jesus Kristus. Jala ayat na sarupa on mandok dituhor Debata do huriaNa dohot mudarNa sandiri. Alani i, Debata do Jesus i.
Sisean si Thomas mandok taringot tu Jesus, “Tuhanku jala Debatangku” (Johannes 20:28). Ndang dpinsang Jesus ibana. Titus 2:13 pagomoshon hita laho paimahon haroro ni Debatanta dohot Sipalua hita, Jesus Kristus (ida ma muse II Petrus 1:1). Di Heber 1:8, Ama i mandok taringot tu Jesus, “Alai taringot tu Anak i didok Ibana do, ‘HabangsaM, O Debata, na manongtong do saleleng ni lelengna, jala hasintongan i na manondangi harajaonMu do.’” Ama i mandok Jesus Debata, na patuduhon Debata do Jesus i.
Di Pangungkapon, sada surusuruan mamarentahon apostel Johannes holan pasangaphon Debata do (Pangungkapon 19:10). Manang na piga hali di Hata ni Tuhan i Jesus manjalo hasangapon (Mateus 2:11; 14:33; 28:9, 17; Lukas 24:52; Johannes 9:38). Ndang hea dipinsang Ibana jolma na mamuji Ibana. Molo ndang Debata Jesus i, nunga paboaonNa hinan tu jolma i asa unang mamuji Ibana, songon na binahen ni surusuruan di Pangungkapon i. Di ruar ni on, godang do angka turpuk di Hata ni Tuhan i na mandok Debata do Jesus i.
Ai Debata do Jesus i? — Hatorangan na ingkon Debata do Jesus i.
Hatorangan na rumingkot ai Debata do Jesus i i ma, molo so Debata Ibana, hamateanNa ndang na sae laho manggarar panguhuman alani dosa ni portibi on (I Johannes 2:2). Sada na tinompa, aut sugari ndang Debata Jesus i, ndang boi manggarar panguhuman na manongtong na ringkot tu dosa maradophon Debata na manongtong i. Holan Debata do na boi manggarar panguhuman na manongtong songon i. Holan Debata do na boi mambuat angka dosa ni portibi on (II Korint 5:21), mate, jala hehe, patuduhon hamonanganNa tu dosa dohot hamatean.
Ai Debata do Jesus i? I do. Jesus mandok Ibana sandiri do Debata. Angka pangihutNa porsea do na Debata do Ibana. Hatorangan taringot tu haluaon i holan boi mangula molo Debata do Jesus i. Jesus i i ma Debata na gabe jolma, Parmulaaan (Alpha) dohot Ujung (Omega) na manongtong (Pangungkapon 1:8; 22:13), jala Debata Sipalua hita (II Petrus 1:1).
English
Ai adong sungkunsungkunmu?