Sungkunsungkun:
Nunga dapotmu ngolu salelengna i?
Alus:
Tangkas do dipatorang Bibel i dalan laho tu ngolu salelengna i. Parjolo, ingkon angkuanta na pardosa do hita maradophon Tuhan i: "Ai nunga mardosa sude jala nunga dao sian hasangapon ni Tuhan i" (Rom 3:23). Sude hita nunga mambahen na so pasonanghon Tuhan i, na mambahen hita tama hona uhum. Ala sude angka dosanta i ujungna na mangalo Tuhan na manongtong i do, holan panguhumon salelengna do na hombar tusi. "Ai hamatean do upa ni dosa i, alai silehonlehon ni Tuhan i i ma ngolu salelengna marhite Jesus Kristus Tuhanta i" (Rom 6:23).
Alai, Jesus Kristus, na so mardosa i (I Petrus 2:22), Anak ni Tuhan na manongtong i nunga gabe jolma (Johannes 1:1, 14) jala mate laho manggarar panguhumonta i. "Dipatudu Tuhan i do holongNa tu hita dison: tingki pardosa dope hita, nunga mate Kristus i tu hita" (Rom 5:8). Jesus Kristus nunga mate di silang i (Johannes 19:31-42), mambuat panguhuman na tama jaloonta (II Korint 5:21). Tolu ari muse nunga hehe Ibana sian hamatean (I Korint 15:1-4), na patuduhon hamonanganNa tu dosa dohot hamatean i. "Di dengganbasaNa na balga i nunga dilehon Ibana tu hita hatutubu na imbaru tu panghirimon na mangolu marhite haheheon ni Jesus Kristus sian hamatean" (I Petrus 1:3).
Marhite haporseaon, ingkon paubaonta do pamingkirionta taringot tu Kristus - ise do Ibana, aha naung binahenNa, jala boasa - tu haluaon (Ulaon ni Apostel 3:19). Molo tabahen haporseaonta tu Ibana, manghaporseai hamateanNa di silang i laho manggarar angka dosanta, sesa ma angka dosanta i jala jaloonta ma padan ni ngolu salelengna di surgo i. "Ai songon on do holong ni roha ni Jahowa di portibi on pola do AnakNa na Sasada i dilehon asa unang mago ganup na porsea di Ibana alai asa dapotan hangoluan na saleleng ni lelengna" (Johannes 3:16). "Molo diangkui ho dohot pamanganmu, 'Tuhan do Jesus i,' jala porsea di bagasan roham ai nunga dipahehe Jahowa Ibana sian hamatean, malua ma ho" (Rom 10:9). Haporseaon sambing di ulaon naung pinasidung ni Kristus di silang i holan i do dalan na tutu tu ngolu salelengna! "Ai alani dengganbasa do umbahen na malua ho, marhite haporseaon - jala ndang alani dirim, silehonlehon ni Tuhan i do - ndang alani pambahenan, asa unang adong na mamuji diri" (Epesus 2:8-9).
Molo lomo rohaM manjalo Jesus Kristus i gabe Sipalua ho, on ma tangiang na jempek. Ingot ma, molo manangianghon tangiang on manang tangiang na asing dia pe ndada na paluahon ho i. Holan marhite na porsea do di Kristus i na paluahon ho sian dosa. Tangiang on holan sada dalan do na patuduhon tu Tuhan i haporseanmu di Ibana jala mandok mauliate tu Ibana na paradehon laho tu haluaonta. "Tuhan, huboto do nunga mardosa ahu maradophon Ho jala tama do hona uhum ahu. Alai nunga dibuat Jesus Kristus panguhumon na tama tu ahu i asa marhite haporseaon di Ibana boi ma ahu disesa. Huhaporseai ma Ho asa malua ahu. Mauliate ma alani basabasaM na sumurung i dohot panesaonMu - silehonlehon ngolu salelengna! Amen!"
Nunga dibahen ho haputuson tu Kristus ala naung manjaha na dison? Molo songon i, klik ma di "Nunga hujalo Kristus i sadaraion" di toru on.
English
Ai adong sungkunsungkunmu?