Hapot
Ano an sinasabi kan Biblia manongod sa pag kaag nin tattoo asin hikaw sa hawak?
Simbag
An Kasuratan sa Lumang Tipan nagsasabi sa mga Esraelita na, “Asin dai kamo maglugad kan saindong laman huli sa gadan, dai man kamo magtala nin anoman na tanda sa saindo: ako si Jehova” (Levitico 19:28). Alagad dawa mayo na sa irarom kan Kasuratan kan Lumang Tipan an mga paratubod ngunyan (Roma 10:4; Galacia 3:23-25; Efeso 2:15), an katotoohan na igwa nin kasuguan tumang sa pag pa tattoo masabi satuya na dapat sana kitang maghapot manogod kaini. An Bagong Tipan mayong sinabi manongod sa kun an sarong paratubod pwede o dai pwedeng magpatattoo.
In relasyon sa pagpatattoo asin pag hikaw sa hawak, sarong marhay na pagbalo an nakasurat sa 1 Corinto 10:31, “Kaya kun kamo kumakan, o uminom, o gumbibo kamo nin anoman, gibuha nindo an gabos manongod sa kamurawayan nin Dios.” An Bagong Tipan dai nagbawal kan pagpapatattoo o pag hikaw sa hawak, alagad dai man kita tinawan nin rason nganing magtubod na gusto kan Dios ni kita magpatattoo o mag hikaw sa hawak.
An importanteng biblikal na prinsipyo sa mga isyu na dai an Biblia nag tao nin eksaktong kasuguan iyo ini; kun dai kita sigurado sa sarong bagay kun ini makakatao nin kamurawayan sa Dios o dai, pinakamarhay na dai kita mag gibo kan bagay na iyan. Pinapagirumdom kita kan Roma 14:23 na anoman an bakong sa pagtubod kasalan. Kaipuhan tang tandaan na an satuyang mga hawak, pati na an satuyang kalag, tinubos asin sadiri kan Dios. Dawa ngani bakong direktang manongod sa pagpatattoo o paghikaw sa hawak an nakasurat sa 1 Corinto 6:19-20, igwa ini nin napakagayon na prinsipyo, “O dai kamo nakakaaram na an saindong hawak simbahan nin Espiritu Santo na nasa saindo, na iyan nakamtan nindo hale sa Dios? Asin kamo bakong sadiri nindo man sana; huli ta kamo binakal nin halaga: kaya pamurawaya nindo an Dios diyan sa saindong hawak.” An dakulang katotoohan na ini dapat magkaigwa nin kagabatan sa kun ano an ginigibo ta sa satuyang mga hawak. Kun an satuyang hawak sadiri kan Dios, dapat igwa kita nin malinaw na permiso bago kita magpatattoo o mag laag nin hikaw sa satuyang hawak.
English
Ano an sinasabi kan Biblia manongod sa pag kaag nin tattoo asin hikaw sa hawak?
