سوال
قائن دی ووہٹی کون سی؟ کیہ قائن دی ووہٹی اوہدی بھین سی؟
جواب
کلام پاک صاف طور تے نہیں کہندا کہ قائن دی ووہٹی کون سی۔ چھڑا ہو سکن والا جواب ایہہ سی کہ قائن دی ووہٹی اوہدی بھین سی یاں بھتیجی یاں پوتی سی۔ کلام پاک قائن دی عمر دے پاروں وی کجھ نہیں دسدا کہ کدوں اوہنے ہابل نوں قتل کیتا (پیدایش 4 باب 8 آیت)۔ اوہ دوویں کسان سی، اوہ دوویں پورے طور تے جوان ہو چکے سن، ہو سکد اے کہ اوہ اپنے اپنے ٹبر یا کنبے نوں چلا رہے ہون۔ آدم تے حوا دے یقینی طور تے ہور وی بچے سی قائن تے ہابل توں اڈ جدوں ہابل نوں قتل کیتا گیا۔ اوہناں دے یقینی طور تے مگروں وی بہت سارے بچے سی (پیدایش 5 باب 4 آیت)۔ اصل وچ قائن ہابل نوں مارن توں بعد اپنی حیاتی دے پاروں فکر مند سی (پیدائش 4 باب 14 آیت) ایہہ ظاہر کردا اے کہ اوہناں دے ہور وی بچے ہون گے یاں خورے اوہناں دے پوتے یاں اوس ویلے آدم تے حوا دے پڑپوتے ہون۔ قائن دی ووہٹی (پیدائش 4 باب 17 آیت) آدم تے حوا دی دھی یاں پوتی سی۔
جدوں آدم تے حوا پہلے (تے صرف) انسان سی، اوہناں دے بچیاں دے کول آپس وچ ویاہ کرن توں اڈ ہور کوئی راہ نہیں ہوئے گی۔ رب نے آپوں وچ ویاہ کرن دی اوس ویلے تیکر مناہی نہیں کیتی سی جدوں دنیا وچ بہت سارے لوک ہو گئے سی تے آپوں وچ ویاہ کرن دی لوڑ نہیں سی (احبار 18 باب 6 توں 18 آیت)۔
نیڑلے ساکاں نال ہمبستری کرن دے سٹے وچ پیدائشی طور تے ذہنی طور تے کمزور بچے پیدا ہوندے نیں تے دو لوک وراثتی طور تے اک ای گُن رکھن (مثال دے طور تے اک بھائی یاں بھین) اوہناں دے بچیاں وچ وراثتی طور تے بہتیاں خامیاں ہوندیاں نیں کیونجے دوہاں دے ماپیاں وچ اکو جہیاں ای خامیاں ہوندیاں نیں۔ جدوں وکھرے وکھرے ٹبراں توں بچے پیدا ہوندے نیں۔ ایہہ کدی کیتے ہوندا اے کہ دوہاں ماپیاں وچ اک ای طرحاں دیاں خامیاں ہون۔ بندے دی وراثتی بنتر بہت چھیتی دے نال صدیاں وچ "خراب" ہوندی اے جیہدے توں وراثتی بیماریاں وی ودھ گئیاں نیں، تے اک نسل توں دوجی نسل وچ جا رہیاں نیں۔ آدم تے حوا وچ کسے طرحاں دی وراثتی کجی نہیں سی، ایس لئی اوہ بہت چنگے سی تے اوہناں دیاں پہلیاں کجھ نسلاں بہت صحت مند سی جدوں کہ ہن اسیں اوس طرحاں دے نہیں۔ آدم تے حوا دے کجھ بچے انج سی جیہناں وچ وراثتی کجیاں سن۔ جیہدے سٹے وچ اک دوجے دے نال ویاہ کرنا اوہناں لئی نقصان دین والا نہیں سی۔ ایہہ عجیب لگدا اے تے وچار کرن نال ای نفرت ہوندی اے کہ قائن دی ووہٹی اوہدی بھین سی۔ شروع وچ جدوں رب نے اک بندے تے اک زنانی توں مڈھ رکھیا، دوجی نسل دے کوئی ہور پسند نہیں سی کہ اوہ آپوں وچ ویاہ کرن۔
English
قائن دی ووہٹی کون سی؟ کیہ قائن دی ووہٹی اوہدی بھین سی؟
