سوال
میں ہُن مسیح تے ایمان لے آندا ۔۔۔ ہُن کیہ کراں؟
جواب
میں ہُن مسیح تے ایمان لے آندا ۔۔۔ ہُن کیہ کراں؟
مبارک ہوئے! تسیں حیاتی نوں بدل دین والا اک فیصلہ کیتا ہے! خورے تسیں پچھ رہے ہو "ہُن کیہ کراں؟ میں رب دے نال اپنا پینڈا کیویں شروع کراں؟" ہیٹھاں دسے پنج طریقے تہاڈی پاک کلام چوں رہبری کرن گے۔ ایس پینڈے وچ جدوں تہاڈے کوئی سوال ہون، مہربانی کرکے https://www.gotquestions.org/P-Punjabi تے پھیرا پاؤ۔
1۔ یقینی بناؤ بئی تسیں مُکتی نوں سمجھدے ہو۔
1 یوحنا باب 5 آیت 13 سانوں دسدی ہے، " میں تہانوں جیہڑے رب دے پُتر دے ناں تے یقین رکھدے ہو ایہہ گلاں لکھیاں ہین تاں جے تہانوں پتہ لگ سکے بئی تہاڈی حیاتی سدا لئی رہن والی ہے۔" رب چاہوندا ہے بئی اسیں مکتی نوں سمجھیئے۔ رب چاہوندا ہے اسیں ایہہ جانن تے بھروسہ کریئے بئی سانوں مُکتی مل گئی ہے۔ تھوڑے لفظاں وچ، آؤ مکتی دے مڈھلے نقطیاں تے جھات پائیے:
(أ) اسیں ساریاں نے پاپ کیتے ہین۔ اسیں ساریاں نے اوہ کرتوت کیتے ہین جیہڑے رب نوں چنگے نہیں لگدے (رومیوں باب 3 آیت 23)۔
(ب) اپنے پاپاں دی وجہ توں، اسیں رب توں ہمیش دے وکھریویں دی سزا دے حقدار ہاں (رومیوں باب 6 آیت 23)۔
(ت) یسوع صلیب تے مویا ساڈے پاپاں دا کفارہ دین لئی (رومیوں باب 5 آیت 8؛ 2 کرنتھیوں باب 5 آیت 21)۔
یسوع ساڈٰی تھاں مویا، اوہ سزا سہندیاں جیہدے اسیں حقدار سی۔ اوہدا مُڑ جیونا ثابت کردا ہے بئی یسوع دا مرنا ساڈے پاپاں دے کفارے لئی کافی سی۔
(ث) رب اوہناں ساریاں نوں بخشدا اتے مکت کردا ہے جیہڑے یسوع تے ایمان رکھدے ہین – اوہدی موت نوں ساڈے پاپاں دا کفارہ ہون تے بھروسہ کردے ہین (یوحنا باب 3 آیت 16؛ رومیوں باب 5 آیت 1؛ رومیوں باب 8 آیت 1)۔
ایہہ مُکتی دا سنیہا ہے! جسے تسیں یسوع مسیح تے اپنے مکتی داتا ہون دا ایمان لے آندا ہے، تسیں مکت ہو گئے ہو! تہاڈے سارے پاپ بخشے گئے ہین، اتے رب تہانوں کدے نہ چھڈن تے کدے نہ وسارن دا وعدہ کردا ہے (رومیوں باب 8 آیت 38اتے 39؛ متی باب 28 آیت 20)۔ یاد رکھو تہاڈی مکتی یسوع مسیح وچ راکھویں ہے (یوحنا باب 10 آیت 28 تے 29)۔ جے تسیں اکلے یسوع نوں اپنا منجی من کے بھروسہ کردے ہو، تہانوں پورا وساہ ہونا چاہیدا ہے بئی تسیں ہمیش دی حیاتی رب دے نال بہشتاں وچ لنگھاؤ گے!
2۔ اک چنگا گرجا لبھو جیہڑا بائبل سکھاؤندا ہوئے۔
گرجے نوں اک عمارت نہ سمجھو۔ گرجا گھر لوک نیں۔ ایہہ بڑا ضروری ہے بئی یسوع مسیح دے منن والے اک دوجے دے نال یاریاں لاؤن۔ ایہہ گرجے دے مڈھلے مقصداں وچوں اک ہے۔ ہن جدوں تسیں یسوع مسیح تے ایمان لے آئے ہو، اسیں تہانوں اک بھرواں تھاپڑا دیندے ہاں بئی تسیں اپنے علاقے وچ اک بائبل نوں منن والا گرجا بھالو اتے پادری نال گل کرو۔ اوہنوں یسوع مسیح تے اپنے سجرے ایمان بارے دسو۔
گرجے دا اک دوجا مقصد بائبل سکھاؤنا ہے۔ تسیں سکھ سکدے ہو کہ رب دیاں ہدائتاں نوں اپنی حیاتی تے کیویں لاگو کرنا ہے۔ بائبل نوں سمجھنا اک کامیاب اتے بھرویں مسیحی حیاتی لئی کنجی ہے۔ 2 تیموتھیس باب 3 آیت 16 تے 17 کہندی ہے، "ہر صحیفہ جیہڑا رب دے الہام نال ہے اوہ تعلیم دین، خبردار کرن، سدھارن اتے سدھے راہ پاؤن دی سکھلائی لئی لاہے وند ہے۔ تاں جے رب دا بندہ اینے جوگا ہوئے بئی ہر چنگے کم نوں کرن لئی تیار ہو جاوے۔"
گرجے دا اک تیجا مقصد عبادت ہے۔ عبادت اوس سارے کجھ لئی رب دا شکرانہ کرنا ہے جیہڑا اوہنے کیتا ہے! رب نے سانوں مکتی دتی ہے۔ رب سانوں پیار کردا ہے۔ رب ساڈیاں لوڑاں پوریاں کردا ہے۔ رب ساڈٰی اگوائی کردا ہے اتے سانوں راہ وکھاؤندا ہے۔ اسیں کیویں اوہدا شکر نہ کریئے؟ رب پاک ہے، سچا ہے، محبت كردا ہے، رحم کردا ہے تے بڑیاں مہراں والا ہے۔ مکاشفہ باب 4 آیت 11 اعلان کردی ہے، "اے ساڈے مالک تے ساڈے رب توں ہی سلاہے جان، عزت اتے قدرت دے لائق ہیں کیوں جے توں ہی ساریاں شیواں بنائیاں ہین تے اوہ تیری مرضی نال ہی بنیاں ہین"۔
3۔ ہر روز رب ول دھیان لاؤن لئی اچیچا ویلا کڈھو۔
ساڈے لئی ایہہ بڑا ضروری ہے بئی اسیں ہر روز رب ول دھیان لاؤن لئی ویلا لائیے۔ کجھ لوک ایہنوں "چپ دا ویلا۔" آکھدے ہین تے دوجے ایہنوں "عبادت" آکھدے ہین کیوں جے ایہو ویلا ہے جدوں اسیں اپنے آپ نوں رب دے حضور پیش کر دینے ہاں۔ کجھ سویر دا ویلا متھن نوں پہل دیندے ہین، جدوں کہ دوجے نماشیں ویلے نوں پہل دیندے ہین۔ ایہدے نال کوئی فرق نہیں پیندا بئی تسیں ایس ویلے نوں کیہ آکھدے ہو یا تسیں کدوں ایہہ ویلا رکھدے ہو۔ جیہڑی چیز معنے رکھدی ہے اوہ ایہہ ہے پئی تسیں روز رب دے نال ویلا لنگھاؤ۔ رب دے نال ساڈے ویلے وچ کیہ کیہ ہوندا ہے؟
(أ) دعا۔ دعا دا سادہ جیہا معنی رب نال گلاں کرنا ہے۔ رب دے نال اپنیاں پریشانیاں اتے مسئلیاں بارے گل کرو۔ رب نوں آکھو اوہ تہانوں مت اتے رہنمائی دیوے۔ رب کولوں اپنیاں لوڑاں پوریاں کرن لئی منگو۔ رب نوں دسو بئی تسیں اوہدے نال کنا پیار کردے ہو اتے کنا اوس سارے کجھ نوں سلاہوندے ہو جو جو اوہنے تہاڈے لئی کیتا ہے۔ بس ایہو دعا ہوندی ہے۔
(ب) پاک کلام پڑھنا۔ گرجے وچ بائبل سکھن دے نال نال، ایتوار سکول، اتے / یاں بائبل دیاں پڑھائیاں – تہانوں اپنے لئی بائبل پڑھدے رہن دی لوڑ ہے۔ پاک کلام وچ اوہ سارا کجھ ہے جیہڑا اک کامیاب مسیحی حیاتی جین لئی تہانوں جانن دی لوڑ ہے۔ ایہدے وچ رب ولوں رہنمائی رلتی ہے بئی عقل والے فیصلے کنج کرنے ہین، رب دی مرضی نوں کیویں جاننا ہے، دوجیاں دی اگوائی کیویں کرنی ہے، اتے روحانی ترقی کیویں کرنی ہے۔ بائبل ساڈے نال رب دا کلام ہے۔ بائبل رب ولوں آئیاں ہدائتاں دی اک بڑی ضروری کتاب ہے ایہہ جانن لئی بئی اسیں اپنیاں حیاتیاں کس طریقے لنگھائیے جیہڑا رب نوں خوش کر دیوے اتے ساڈے لئی تسلی دا ہوئے۔
4۔ اوہناں لوکاں نال سانگے بناؤ جیہڑے روحانی طور تے تہاڈی مدد کر سکدے ہین۔
1 کرنتھیوں باب 15 آیت 33 سانوں دسدی ہے، "کراہے نہ پائے جاؤ: 'بھیڑیاں دے نال اُٹھنی بہنی چنگے کردار نوں وگاڑ دیندی ہے۔'" بائبل خبرداری نال بھری پئی ہے اوس اثر توں جیہڑا "برے" لوک ساڈے تے پا سکدے ہین۔ اوہناں لوکاں دے نال ویلالنگھاؤنا جیہڑے پاپ دے کماں وچ رُجھے رہندے ہین، سانوں وی اوہ بھیڑے کم کرن لئی تھاپڑا دیوے گا۔ ساڈے آل دوالے دے لوکاں دا کردا ساڈے تے "بھاری" پے جاوے گا۔ ایہو وجہ ہے بئی اسیں اپنے آل دوالے اوہناں لوکاں نوں ہی رکھیئے جیہڑے رب نال پیار کردے ہین اتے اوہدے نال مخلص ہین۔
اک دو سجن ایہو جہے لبھن دا جتن کرو، تہاڈے گرجے چوں ہو سکدے ہین، جیہڑے تہاڈی مدد کر سکدے ہین اتے تہاڈی کنڈ تھاپڑ سکدے ہین (عبرانیوں باب 3 آیت 13؛ باب 10 آیت 24)۔ اپنے سجناں نوں کہو کہ اوہ تہاڈے چُپ دے ویلے، تہاڈے کماں کاراں، اتے رب نال تہاڈے حیاتی لنگھاؤن تے اکھ رکھن۔ اوہناں نوں پچھو بئی کیہ تسیں وی اوہناں نال انج ہی کر سکدے ہو۔ ایہدا ایہہ مطلب نہیں ہے بئی تہانوں اپنے سارے یار بیلی چھڈنے پے جان گے جیہڑے مالک خداوند یسوع نوں اپنے مکتی داتا دے طور تے نہیں جان دے۔ اوہناں نال یاری لائی رکھو تے اوہناں نال پیار کرو۔ بس اوہناں نوں ایہہ پتہ لگن دیو بئی یسوع نے تہاڈی حیاتی نوں بدل دتا ہے اتے تسیں اوہ سارے کم ہن نہیں کر سکدے جیہڑے کردے ہوندے سی۔ رب توں منگو بئی اوہ تہانوں یسوع نوں اپنے سجناں دے نال ونڈن دے موقعے دیوے۔
5۔ بپتسمہ کرواؤ۔
بہت سارے لوکاں نوں بپتسمہ بارے بھلیکھا ہے۔ لفظ "بپتسمہ کرنا" دا مطلب ہے پانی وچ ٹُبھی لاؤنا۔ بپتسمہ کرن دا عمل یسوع تے تہاڈے نویں ایمان اتے اوہدی پیروی کرن نال تہاڈے مخلص ہون دے سرعام اعلان کرن دا ڈھنگ ہے جیہڑا بائبل نے دسیا ہے۔ پانی وچ ڈبوئے جان دا عمل یسوع دے نال دبے جان دے عمل دا وکھالا کردا ہے۔ پانی چوں باہر آؤن دا عمل مسیح دی مُڑ جی اُٹھن دی تصویر ہے۔ بپتسمہ کرواؤنا یسوع دی موت، دفن، اتے مڑ جی اُٹھن نال اپنے آپ دی پچھان کروانا ہے (رومیوں باب 6 آیت 3 تے 4)۔
تہانوں مُکتی بپتسمہ نہیں دیندا۔ بپتسمہ تہاڈے پاپاں نوں نہیں دھو دیندا۔ بپتسمہ سادہ جہے طور تے تابعداری دا اک عمل ہے، مُکتی لئی اکلے مسیح تے تہاڈے ایمان دا سر عام اعلان۔ بپتسمہ ضروری ہے کیوں جے ایہہ تابعداری دا اک کم ہے – مسیح تے تہاڈے ایمان اتے اوہدے نال تہاڈے مخلص ہون دا سر عام اعلان۔ جے تسیں بپتسمہ لئی تیار ہو، تہانوں اپنے پادری نال گل کرنی چاہیدی ہے۔
English
میں ہُن مسیح تے ایمان لے آندا ۔۔۔ ہُن کیہ کراں؟
