Xivutiso
Xana Yesu i Xikwembu? Xana Yesu u tshame a tivula Xikwembu ke?
Nhlamulo
Bibele yi hava marito ya Yesu laha a vulaka hi yexe a ku, “Hi mina Xikwembu.” Hambswiritano, sweswo a swi vuli leswaku a nga vulanga leswaku hi Yena Xikwembu. Hi xikombiso, xiya marito ya Yesu eka Yohane 10:30, “Mina na Tatana hi un’we.” Ku va hi vona leswaku a vula leswaku Yena i Xikwembu, a hi langute leswaku Vayuda va angule njhani. Va lave ku n’wi khandla hikwalaho ka sweswo. “…u tiendla xikwembu, kasi u munhu” (Yohane 10:33). Vayuda va swi twile leswaku Yesu u ri hi yena mani—xikwembu. Xiya leswaku Yesu a nga ma kaneti marito yakwe ya leswaku Yena i Xikwembu. Loko Yesu a ku, “Mina na Tatana hi un’we” (Yohane 10:30), A vula leswaku Yena na Tatana va ni miri wun’we ni xiviri xin’we. Xikombiso xin’wana i Yohane 8:58. Yesu u te, “Ndzi tiyisile ndzi ri eka n’wina, Abrahama a nga si velekiwa, mina a ndzi ri kona!” Vayuda lava tweke marito lawa va nambe va rhola maribye leswaku va n’wi dlayela ku rhukana, hikuva Nawu wa Muxe a wu va lerisa sweswo (Levhetika 24:15).
Yohane u tlhele a vulavula hi mhaka ya vukwembu bya Yesu: “Rito a ri ri Xikwembu” naswona “Rito ri va munhu” (Yohane 1:1, 14). Tindzimana leti ti komba khwatsi leswaku Yesu i Xikwembu lexi nge nyameni hi xiviri. Mintirho 20:28 ya hi byela, “Mi va varisi va nhlengeletano ya Xikwembu, leyi a yi xaveke hi ngati yakwe.” I mani la xaveke nhlengeletano—nhlengeletano ya Xikwembu—hi ngati yakwe? I Yesu Kreste. Mintirho 20:28 yi vula leswaku Xikwembu xi xave nhlengeletano ya xona hi ngati ya xona. Hikwalaho, Yesu i Xikwembu!
Mudyondzisiwa Tomasi u vule leswi malunghana na Yesu, “Hosi yanga ni Xikwembu xanga” (Yohane 20:28). Yesu a nga n’wi vonanga xihoxo. Tito 2:13 yi hi khutaza ku rindzela ku ta ka Xikwembu ni Muponisi werhu, Yesu Kreste (nakambe vona 2 Petro 1:1). Eka Vaheveru 1:8, Tatana u vule leswi ka Yesu, “Malunghana ni N’wana: ‘Xikwembu i xiluvelo xa wena hi masiku ni masiku, naswona nhonga ya vuhosi ya mfumo wa wena i nhonga ya vuhosi ya vululami.’” Tatana u vula Yesu a ku “Xikwembu” leswi kombaka leswaku Yesu i Xikwembu.
Eka Nhlavutelo, ntsumi yi byele muapostola Yohane ku gandzela Xikwembu ntsena (Nhlavutelo 19:10). Ko tala ematsalweni Yesu a gandzeriwa (Matewu 2:11, 14:33, 28:9, 17; Luka 24:52; Yohane 9:38). A nga va holovelanga vanhu loko va n’wi gandzela. Loko Yesu a nga ri Xikwembu, a ta va byela vanhu leswaku va nga n’wi gandzeli, a endla leswi endliweke hi ntsumi eka Nhlavutelo. Ku ni tindzimana ni matsalwa man’wana yo tala lama kombisaka leswaku Yesu i Xikwembu.
Xivangelo lexikulu lexi endlaka Yesu a va Xikwembu hileswaku loko a nga ri Xikwembu, rifu ra yena a ri nga ta ringana ku riha xigwevo xa swidyoho swa misava (1 Yohane 2:2). Munhu la vumbiweke, loyi Yesu a ta va a ri yena loko a nga ri Xikwembu, a nga ta kota ku riha xigwevo lexi nga riki na makumu xa ku dyohela Xikwembu lexi nga riki na makumu. I Xikwembu ntsena lexi a xi ta kota ku hakela xigwevo xonghasi lexi nga heriki. I Xikwembu ntsena lexi nga susaka swidyoho swa misava (2 Vakorinto 5:21), lexi nga faka, ivi xi pfuxiwa, xi kombisa ku hlula ka xona xidyoho ni rifu.
English
Xana Yesu i Xikwembu? Xana Yesu u tshame a tivula Xikwembu ke?