Xivutiso
Se ndza pfumela eka Yesu…xana ku laveka yini swin’wana?
Nhlamulo
Se ndza pfumela eka Yesu…xana ku laveka yini swin’wana?
Ha ku khensisa! U teke goza leri hundzulaka vutomi! Kembexana wa tivusa leswaku, “Xana ku laveka yini swin’wana? Ndzi nga sungula njhani ku famba ni Xikwembu?” Magoza ya ntlhanu lama xaxametiweke la hansi ma ta ku nyika nkongomiso lowu kumekaka eBibeleni. Loko u va ni swivutiso endleleni ya wena, hi kombela u endzela www.GotQuestions.org/Xitsonga.
1. Tikarhatele ku twisisa ku ponisiwa.
1 Yohane 5:13 ya hi byela, “Ndzi mi tsalela swilo leswi mi ta tiva leswaku mi ni vutomi lebyi nga heriki, n’wina lava pfumelaka evitweni ra N’wana wa Xikwembu.” Xikwembu xi lava hi twisisa ku ponisiwa. Xikwembu xi lava hi swi tiva naswona hi tiyiseka leswaku hi ponisiwile. Hi ku komisa, a hi kambisise tinhla ta ku ponisiwa:
(a) Hinkwerhu hi dyohile. Hinkwerhu hi swi endlile swilo leswi nga xi tsakisiki Xikwembu (Varhoma 3:23).
(b) Leswi hi dyoheke, hi faneriwa hi xigwevo xa ku hi hambananisa ni Xikwembu hilaha ku nga heriki (Varhoma 6:23).
(c) Yesu u fele exihambanweni a hakela nandzu wa swidyoho swa hina (Varhoma 5:8; 2 Vakorinto 5:21). Yesu u hi ferile, a susa xigwevo lexi a xi hi fanela. Ku pfuka ka yena ku kombisa leswaku rifu rakwe a ri ringana ku riha swidyoho swa hina.
(d) Xikwembu xi tiyimiserile ku rivalela ni ku ponisa hinkwavo lava pfumelaka eka Yesu – lava tshembaka leswaku rifu rakwe hi rona ri rihaka swidyoho swa hina (Yohane 3:16; Varhoma 5:1; Varhoma 8:1).
Lawa hi wona mahungu ya ku ponisiwa! Loko u pfumela eka Yesu leswaku i Muponisi wa wena, se u ponisiwile! Swidyoho swa wena hinkwaswo swi rivaleriwile, naswona Xikwembu xi tshembisa leswaku xi nge ku siyi kumbe ku ku fularhela (Varhoma 8:38-39; Matewu 28:20). Tsundzuka, ku ponisiwa ka wena eka Yesu Kreste ku tiyile (Yohane 10:28-29). Loko u tshembela eka Yesu ntsena tanihi Muponisi wa wena, tiyiseka leswaku u ta tshama ni Xikwembu hilaha ku nga heriki etilweni!
2. Kuma kereke yinene leyi dyondzisaka Bibele.
Kereke a hi muako. Kereke i vanhu. I swa nkoka leswaku lava pfumelaka ka Yesu Kreste va khongela swin’we. Lexi i xikongomelo xin’wana lexikulu xa kereke. Leswi se u vekeke ripfumelo ra wena eka Yesu Kreste, hi ku khutaza swinene ku tikumela kereke leyi dyondzaka Bibele swinene endhawini ya ka n’wina ivi u vonana ni mufundhisi wa kona. N’wi tivise hi ta ripfumelo ra wena lerintshwa eka Yesu Kreste.
Xikongomelo xa vumbirhi xa kereke i ku dyondzisa. U nga dyondza ndlela yo hanya hi milawu ya Xikwembu. Ku twisisa Bibele hi xona xilotlelo xa ku hanya vutomi bya xikreste lebyi humelelaka ni lebyi tiyeke. 2 Timotiya 3:16-17 yi ri, “Matsalwa hinkwawo ma huhuteriwe hi Xikwembu, ma pfuna ku dyondzisa, ku tshinya, ku laya ni ku letela leswo lulama, leswaku munhu wa Xikwembu a hlomela hi ku helela ntirho wun’wana ni wun’wana lowunene.”
Xikongomelo xa vunharhu xa kereke i ku gandzela. Ku gandzela i ku khensa Xikwembu ka hinkwaswo leswi xi hi endleleke swona! Xikwembu xi hi ponisile. Xikwembu xa hi rhandza. Xikwembu xa hi phamela. Xikwembu xa hi tsundzuxa ni ku hi kongomisa. Hi nga tsandzekisa ku yini ku xi khensa? Xikwembu xa kwetsima, xi lulamile, xi ni rirhandzo, ni tintswalo naswona xi tele nsovo. Nhlavutelo 4:11 yi ri, “Swa ku fanela, Hosi ni Xikwembu xa hina, ku amukela ku vangama, ku dzuneka ni matimba, hikuva u tumbuluxe swilo hinkwaswo, naswona hi ku rhandza ka wena hinkwaswo swi tumbuluxiwile naswona swa hanya.”
3. Tivekele nkarhi wa anakanyisisa hi Xikwembu siku ni siku.
I swa nkoka leswaku hi tinyika nkarhi wa ku anakanyisisa hi Xikwembu. Leswi vanhu van’wana va swi vula “nkarhi lowu rhuleke.” Van’wana va ri i “ku tinyiketa,” hikuva i nkarhi lowu hi tinyiketelaka ha wona eka Xikwembu. Van’wana va hlawula ku tivekela nkarhi wa nimpundzu, kasi van’wana va rhandza wa nimadyambu. A hi swa nkoka leswaku wena u wu vula yini kumbe u tivekela wona rini. Xa nkoka i ku hamba u va ni nkarhi wa Xikwembu. Hi swihi leswi swi lavaka hi va ni nkarhi wa swona eka Xikwembu?
(a) Xikhongelo. Xikhongelo i ku vulavula ni Xikwembu. Vulavula ni Xikwembu hi swikarhato ni swirhalanganya leswi u nga na swona. Kombela Xikwembu xi ku nyika vutlhari ni nkongomiso. Kombela Xikwembu xi ku pfuna eka swilaveko swa wena. Byela Xikwembu leswaku wa xi rhandza swinene naswona u tlangela hinkaswo leswi xi ku endlelaka swona. Xikhongelo xi tirha sweswo.
(b) Ku Hlaya Bibele. Handle ka ku dyondza Bibele ekerekeni, ka xikolo xa sonto, kumbe eka xikolo xa Bibele – u fanele u tihlayela Bibele. Bibele yi tamele hinkwaswo leswi u faneleke u swi tiva leswaku u hanya vutomi lebyi humelelaka bya Xikreste. Yi tamele switsundzuxo swa Xikwembu leswi pfunaka ku endla swiboho swa vutlhari, ku tiva ku rhandza ka Xikwembu, ku dyondzisa van’wana Rito, ni ndlela yo kula hi tlhelo ra moya. Bibele i Rito ra Xikwembu eka hina. Kahle-kahle Bibele i buku ya swiletelo swa Xikwembu leyi yi hi kombaka ku hanya hi ndlela leyi tsakisaka xona ni leyi enerisaka hina.
4. Aka vuxaka ni vanhu lava nga ta ku aka emoyeni.
1 Vakorinto 15:33 ya hi byela, “Mi nga hambukisiwi: ‘Vanghana lavo biha va onha mahanyelo lamanene.’” Bibele yi hi lemukisa ko tala hi nkucetelo lowu tisiwaka eka hina hi vanhu “lavo hiha.” Ku tolovelana ni vanhu lava endlaka leswo biha swi ta endla leswaku hi ringiwa hi leswi va swi endlaka. Mahanyelo ya lava hi tolovelanaka na vona ma ta hi “sulela.” Hikwalaho, i swa nkoka leswaku hi tolovelana ni vanhu van’wana lava rhandzaka Hosi naswona va tinyiketeleke eka Yona.
Ringeta ku kuma munghana un’we kumbe vambirhi, hambi ko va ekerekeni ya wena, loyi a nga ta ku pfuna, a ku khutaza. (Vaheveru 3:13; 10:24). Kombela vanghana va wena va nga ku kavanyeti ka nkarhi wa wena lowu rhuleke, ka swikhongelo swa wena ni le ka ndlela ya wena ni Xikwembu. Va byele leswaku na wena u nge va kavanyeti. Leswi a swi vuli leswaku u fanele u hambana ni vanghana va wena hinkwavo lava nga n’wi amukelangiki Yesu Kreste tanihi Muponisi wa vona. Tama u va munghana wa vona, u va rhandza. Va tivise leswaku Yesu u hundzule vutomi bya wena naswona a wa ha swi endli hinkwaswo leswi a wu swi endla na vona. Kombela Xikwembu xi ku pfuna ku byela vanghana va wena ha Yesu.
5. Khuvuriwa.
Vanhu vo tala va ni vonelo leri hoxeke hi nkhuvulo. Rito “khuvula” ri vula ku nyuperisa ematini. Nkhuvulo i endlelo leri humaka eBibeleni ra ku vula erivaleni ripfumelo ra wena lerintshwa eka Kreste ni ku tiboha ka wena ku n’wi landzela. Ku nyuperisiwa ematini swi kombisa ku yimberiwa swin’we na Kreste. Ku pfumbuka ematini swi fanekisela ku pfuxiwa ka Kreste. Loko u khuvuriwa u kombisa ku amukela rifu, ku lahliwa ni ku pfuxiwa ka Yesu (Varhoma 6:3-4).
Nkhuvulo a hi wona wu ku ponisaka. Nkhuvulo a wu swi hlantswi swidyoho swa wena. Nkhuvulo wo va goza ro komba ku yingisa, xikombisa xa le rivaleni xa ku pfumela ka wena eka Kreste ntsena leswaku u ponisiwa. Nkhuvulo i wa nkoka hikuva i goza ra lava yingisaka – wu vula erivaleni leswaku u ni ripfumelo eka Kreste naswona u tiyimisele ku N’wi landzela. Loko u lulamele ku khuvuriwa, vulavula ni mufundhisi.
English
Se ndza pfumela eka Yesu…xana ku laveka yini swin’wana?