Question
Isá Moósi hoóde Íba honnwá?
Answer
"Alla asé ne" hoóde suwál yían bicí manúice fusár goré montor Isá asé ne hoóde suwál yían bicí hom manúice fusár goré. Bicí manúice báfe de Isá ekzon Manúic zibá 2,000 bosór agé Isárail dec ot accíl. Isár guñçá sinnór baabute bicí torkatorki yó oóil.
Béc-bak, dhoóñr dormo ókkolé, Isá ekzon nobi accíl, yatóu ekzon bála ustat accíl yatóu ekzon Alla re mani solé de manúic accíl hoói cikká de. Montor añára re Pak Kalame (Baibéle) ciká de, Isá ekzon nobi, ekzon bála ustat, yatóu ekzon Alla mani solé de manúic ottú aró uñsól tokkát accíl.
C.S Lewisé íbar boói Mere Christianity ot íba ye iín leikké: “añí zetará Isár baabute fool or dhoilla hotá hoó, zendilla niki: “añí Isá re ekzon dhoóñr edde bála ustat ísafe gosíbolla razi así montor Isá Alla de yían añí no gosí” hoó ítara re ítarár fooilla hotá híin bon goittó saáir. Yían añára ttú ebbe bon gorá foríbou. Ekzon manúic zee nize manúic íte zodi Isá ye hoiyé de hendilla hotá hoó, tóoile íte ekzon bana dhoóñr ustat noó. Oitóu faré íte ekzon fool - zee eén ekzon manúic or fúañti, zee nizore adá iñza andhá hoó - noóile ité zuzúk or cóitan oibóu. Tuáñttu tuáñr faiséla luwa foríbou ki hoóile, ki manúic íba Allar fua accíl edde Allar fua ar naki fool manúic noóile naki íba ekzon bicí horáf manúic. Tuñí íba re fool or dhoilla bon gorí rakí faríba, íba re sép mari faríba edde cóitan or dhoilla íba re marifeli faríba yatóu íbar theng ot forí íba re Mallik edde Alla hoói matai faríba. Montor Íba ekzon insan or dhoóñr ustat de yián ólla añára ttú íbar baabute horáf edde abazaba hotá no huwá foríbou. Añára heén goríbolla íba ye honó rasta noó raké ar íba ttú híin fuintóu yo honó eredá nái.” (Macmillan, 1952, p. 55–56).
Isá nize honnwá hoói dabi goijjé? Pak Kalame (Baibéle) Isá honnwá bóuli hoó? Pak Kalame (Baibéle) ciká de, Isá Alla montor Insán or jisím loiyé. Isá ye Yuhúnna 10:30 ayát ot hoiyé de, “Añí edde Añár Baf Ek.” Tuáñra ttú iíñyót Isá ye Alla dabi noó goré fáñn laibóu montor Isár fúañti Yuhúdi ókkol accíl de ítarár halót oré soó, Isá ye zeéñtte ‘Añí edde Añár Baf Ek’ hoiyé héeñtte Yuhúdi ókkolé Isá re mari bólla cílor dola feñçái loóil. Kiyólla hoilé Yuhúdi ókkole bála gorí buijjíl de, Isá ye Nizore Allar fuán gorí Nize Alla dabi gorér. “Yuhúdi ókkolé zuwab dedde, “Gom ham ólla añára Tuáñre cíl or dola maridde noó, montor Tuñí Allar kuféri goijjó dé hétolla. Tuñí ek zon manúic ói, Nizoré Nize Alla dabi gorór” (Yuhúnna 10:33) Iíñyot mazé añára dekí de Isár fúañti asé de Yuhúdi ókkolé Isá nize Alla dabi goijjé de yían buijjé.
Zeéñtte Yuhúdi ókkolé Isá re hoiyé, ‘Tuñí Allar uldha kuféri gorór edde Nizore Nize Alla dabi gorór’ héeñtte Isá ye Yuhúdi ókkol oré ‘Añí Alla dabi no gorír noó hoó.’ Isá ye zeéñtte ‘Añí edde Añár Baf Ek’ hoiyé héeñtte Isá ye Íba Nize Alla de yían dabi goijjé.
Yuhúnna 8:58 ayát ot Isá ye Íba beggún or agé loti asé de yían dabi goijjé, ziyán Alla ye dabi goijjíl. Isá ye tará re hoódde, “Añí tuáñra ré sóiyi-sóiyi hoóir, Ibrahím zormo óibar age lóti Añí así!” Yuhúdi ókkolé Isár hotá yián fúni, Isá re mari bollá cílor dola feñçái loóil (Yuhúnna 8:59).
Isá ye zeéñtte “Añí beggún or age lóti así” hoiyé héeñtte Íba nize Allar nam estemál goijjé ziyán ‘AÑÍ’ (Hízorot 3:14 ot loot faa) Yuhúdi ókkolé Isá re Alla hoói no gosíle yó montor ítará bála gorí buijjé de, Isá nize Alla dabi goijjé.
Pak Kalam (Baibél) or saabut ókkol, ziíne, Isá Alla de yían dehá: Yuhúnna 1:1, “Hé Kalam nize Alla accíl.” Yuhúnna 1:14, “Hé Kalam insán boni aiccé.” Isár saábi Toómase Isá re hoiyé de, “Añár Malik edde Añár Alla” (Yuhúnna 20:28), Toómase zeéñtte Isá re ‘Añár Malik edde Añár Alla’ hoiyé héeñtte Isá ye Toómas oré, Añáre Alla no dhakís noó hoó. Isár Aasaf Paulé hoiyé de “Isá Moósi añárár dhoóñr Alla edde Basáiloiya” (Titus 2:13). Aasaf Fitore yó Isá re “Añárár Alla edde Basáiloiya” hoói dhaikké (2 Fitor 1:1).
Baf Alla ye Isá Alla de yían hoiyé: ‘Montor Íba ye Fua ré hoóde ki, “Ó Alla, Tuáñr toktó abadulabad táke, Ar Tuáñr raijjor loçí óilde insáf or loçí”’ (Híbraniyól 1:8 zibá Zobúr 45:6 ot faa za).
Furána Niyom ot óu Isár baabute agún hotá hoiyé. Zendilla Esáya 9:6 ayát ot Isár Alla girír baabutte hoiyé: “Añára llá ekzon morot Fua zormo oiyé, añára re ekzon morot Fua diyé, ar hokumot or bár Íbar haáñdot táibóu. Edde Íba re dhaká zaibóu de: Taajuippa Mocuwára doiya, Muhán Alla, Ofúrani Baf, edde Cántir Baáñcca”.
Isá Alla yó edde Manúic ó boná foijjé. Alla ísafe guná maf goijjé edde Manúic ísafe moijjé.
Isá Alla-Manúic, yían ólla Isá óilde manúic ókkol oré Alla llói sóyi Bonáidoiya (1 Timoti 2:5). Nejat Isár uore iman aníle faade. Zendillá Isá ye hoiyé de, “Añí rasta, sóiyi, ar zindigi, Añáddí no zailé kiyé Baf or héçe zai no faribóu” (Yuhúnna 14:6).
English
Isá Moósi hoóde Íba honnwá?