Question
Nejat or rasta honnán?
Answer
Tuáñttú búk laiggé ne? Añí hána haáde búk or hotá hoóidde no, bolke, tuñí tuáñr zibon ot lagé de héndilla sis híin or buká ne? Tuáñttú asé de híin loi tuñí kafi noó? Zodi héndilla óoile, buzi loo de ki, Isá óilde Rasta! Isá ye hoiyé de, “Añí óilam de zibon or ruthi. Zee Añár héçe aiyé tattú honó din búk no lagibóu, ar zee Añár uore iman ané tattú honó din tirác no lagibóu.” (Yuhúnna 6:35).
Tuñí oólzol óiyo neki? Tuáñr zibon ot honó rasta edde mossús nofor neki? Honó endilla ne, ki, honó kiye tuáñr serák niyái felaiyé edde tuñí ar dóraibólla serákkán tuwái nofor? Zodi héndilla óoile, buzi loo de ki, Nejat faibár Rasta óilde Isá! Isá ye hoiyé de, “Añí duniyáir Foór, zee Añár fisé-fisé aiyé tee andár ot nu áñçibóu, bólke zibon or foór faibóu.” (Yuhúnna 8:12)
Tuñí honó din endilla meésus goijjó ne, ki, tuñí zibon or baáre bondó asó? Tuñí góli bólla bicí duar ókkol tuáiyó, montor tuñí tuwái noó foó? Tuáñttú noiya zibon ot góiltóu mone hoór ne? Zodi héndilla óoile, buzi loo de ki, Nejat faibár Rasta óilde Isá! Isá ye hoiyé de, “Añí óilam dé duar. Zodi honó kiyé Añáddí bútore góle, íte basibóu. Íte bútore aibóu edde baáre zaibóu ar sori bólla zaga faibóu.” (Yuhúnna 10:9).
Tuáñre hámicá maincé nisó thaare ne? Tuáñr llói manúic ókkolé taalukot bicí hom goré neki? Ki fottí ek zone tuáñre loi faida tuiltóu saár? Zodi héndilla óoile, buzi loo de ki, siríf tuáñre Isá ye basái faribóu! Isá ye hoiyé de, “Añí óilam dé gom béra-sóol soroya. Gom soroya ye Íbar béra-sóol ókkol ólla nizor foran de. Añí óilam dé gom béra-sóol soroya; Añí Añár béra-sóol ókkol óre siní, edde ítara yó Añáre sine” (Yuhúnna 10:11,14).
Tuñí honó din e zibon yián baade ki oibóu de yían baifpó ne? Tuñí ki foñsí zagói de edde zoóñre ha de sis híin olla tuáñr zibon haçáite haçáite orán óiyo? Tuñí ki tuáñr zibon or honó mossús nái hoói cóuk goijjó ne? Tuñí mori baade tuáñttú abár ziáñta táitou mone hoór ne? Zodi taitóu mone hoó, tóoile buzi loo de ki, Nejat faibár Rasta óilde Isá! Isá ye hoiyé de, “Añí óilam dé háñcor edde zindigi. Zee Añár uore iman ané, íte morilé yó zinda tákibou, ar zee zinda asé edde Añár uore iman ané, íte honó din no moribóu” (Yuhúnna 11:25-26).
Rasta honnán? Sóyi ki? Zindigi ki? Isá ye zuwáb diyé de, “Añí rasta, sóiyi, edde zindigi, Añáddí no zailé kiyé Baf or héçe zai no faribóu”(Yuhúnna 14:6).
Tuáñttú ze búk laiggé hé búk óilde Ruú-hanir búk ar hé búk baná Isá ye furá gorí faré de. Isá óilde Úba Ziba ye tuáñr añdaijja zibon ot foór di faré. Isá óilde Duar edde Ofúrani Zindigi. Isá óilde Fuáiñjja edde Soroya ziba re tuñí tuwóor. Isá óilde Zibon – e zindigi llá yó edde aiyédde yían ólla yó. Isá re di guná ttú azad faade – Isá óilde nejat or Rasta!
Tuñí Alla ttú duré ói giyogói de yían ólla, tuáñtú búk lagedde, yían ólla tuñí añdar ot háñzi giyógoi de, yián ólla tuñí zibon or mossús tuwái no foódde. Añára re Pak Kalame (Baibéle) hoó de ki, añára fottí ekzone guná goijjí yían ólla añára Alla ttú duré óigiyígoi (Waázi 7:20; Romiyól 3:23). Tuñí Alla re hárai felaiyó de hétolla tuáñr zibon háli háli lagédde. Alla ye tuáñre banáiye de, siríf Íba lói taaluk taibólla. Tuñí guná goijjó de hetólla tuñí hé taalukot ottú duré ói giyóigoi. Yián aró bicí horáf de ki, tuáñr guná ye tuáñre hámicá llá, maáni e zobanat edde aiyédde zobanalla Alla ttú duré gorí felaibóu (Romiyól 6:23;Yuhúnna 3:36).
E maámela yián oré keéngori hotóm goijjúm? (Monot raikkó guná ttú muktí siríf Isá ye di faré de!) Isá ye tuáñr guná ókkol Íbar uore loiyé (2 Kórintiyól 5:21). Tuáñttú ze cáñza ókkol faa foittóu híin Isá nizor uore loi tuáñr zagat moijjé (Romiyól 5:8). Tin din baade Isá ye mora ttú zinda ói uçí guná edde moot ottú ziti aiccé de yían deháiye (Romiyól 6:4-5).
Isá ye iín beggún kiyólla goijjé de? Isá nize suwál yían or zuwáb diyé: “Ek zone nizor dustó ókkol ólla foran dede yían óttu aró ar dhoóñr muhábbot nái” (Yuhúnna 15:13). Isá ye moijjé zeéne tuñí basí taki faro. Zodi tuñí Isár uore iman anó ar Íba ye tuáñr gunár dam fúiñjjé de yían oré biccác goró, toóile Isá ye tuáñr guná ókkol maf gorí dibóu edde tuáñre duúi sáf goríbóu. Baade tuáñttú ze ruú-hanir búk laiggé he búk furáfuri goríbou. Tuáñr ze serák niyáai giílgoi yían oré dorái dibóu. Tuáñr zibon or mossús tuwái faibá. Tuñí tuáñr sóyi dustó re edde soroya re siníba . Tuñí zaníba de tuáñttu zibon yián mori zaigói baade aró-ekkán zibon asé, ze zibon abadulabad Isár fúañti haçáiba!
Eçé foijjó de híin ólla tuñí Moósi re gosí loibá hoói faiséla goijjó ne? Zodi goró, toóile doiya gorí “Añí Moósi re aijjá gosí loiyí” hoói lamát bothón asé de ibár uoré sibán maró.
English
Nejat or rasta honnán?