Question
Isá re nizor Basáiloya ísafe gosílo de yían or maáni ki?
Answer
Tuñí Isá re nizor Basáiloiya ísafe gosí loiyó ne? Suwál yían oré bála gorí buzíte, tuáñttú agé hotá iín or maáni re buzá foribóu: “Isá Moósi,” “Nizor,” edde “Basáiloiya.”
Isá Moósi hoóde Íba honnwá? Bicí maincé hoóibóu de, Íba ekzon bála Manúic, Íba ekzon dhoóñr ustát yatóu kessú ye Íba ekzon Allar Nobi uddwá hoóibóu. Isár baabute iín beggún sóyi, montor híin beggúne Isá honwá de yían sóyi gorí no dehá. Pak Kalame (Baibéle) añára re hoóde ki, Isá Alla montor insán boinné (Yuhúnna 1:1, 14). Alla duniyáit aiccé de: Añára re cikká ditóu, añárár biyáram gom goittóu, añára re sóyi rastat sola cikaitóu, añárár guná maf goittóu edde añárár guná llá moribólla! Isá Moósi óilde Alla, Foidagoróya, edde taakot óla Malik. Tuñí hé Isá Moósi re goiccó ne?
Basáiloiya hoóde Íba ki, edde añára ttú Basáiloiya re kiyólla lagé? Pak Kalame (Baibéle) añára re hoóde ki, añára fottí ekzone guná goijjí edde ziín Allar nozor ót horáf híin goijjí (Romiyól 3:10-18). Añára añárár gunár notizá faide, Allar gozzob edde bisár. Ofúrani Allar uldhá guná gorár insáfi cáñza óilde ofúrani cáñza (Zuzúk ot hámica llá zoloón) (Romiyól 6:23; Zahéri 20:11-15). Yían ólla añára ttú ekzon Basáiloiyar zorúl!
Isá Moósi duniyáit aái añára ttú mora foittóu de zagát moijjé. Isár moote añárár gunár dam fúiñjjé. (2 Kórintiyól 5:21). Isá ye añárár gunár dam fuñjitóu moijjé (Romiyól 5:8). Añára ttú fuñja foittóu de dam híin Isá ye fúiñjjé. Isá mora ottú zinda ói uiththe de yíane dehá de ki, Isár moot añárár gunár dam fuñjitóu kafi. Hetólla, siríf Isá Moósi óilde gunágar or Basáiloiya (Yuhúnna 14:6; Paráksis 4:12)! Tuñí Isá Moósi re nizor Basáiloiya ísafe gosó ne?
Isá tuáñr “nizor” Basáiloiya ne? Bicí maincé hoóde: Dormo gór ot zoón, rosóm ókkol falón gorón edde guná no gorón óilde Isáyí. Montor sóyi Isáyí óilde, Isá Moósi llói taalukot táka. Isá re nizor Basáiloiya ísafe gosón maáni nizor iman edde boracá Íbar uore rakón. Ek zon or iman llói oóinno ek zone honó din nejat no faa. Gom ham gorí honó kiyé gunár maf no faa. Nejat faibár rasta óilde: Isá re nizor Basáiloiya ísafe gosón, Isár moot gunár dam de yían biccác gorón edde Isá mora ottú zinda ói uiththé de yíane ofúrani zindigi dibóu de yián biccác gorón (Yuhúnna 3:16). Isá Moósi re tuáñr Basáiloiya ísafe gosó ne?
Zodi tuñí Isá re nizor Basáiloiya ísafe gositóu soó, tóoile lamát diyá giyé de dua híba Allar háñse goró. Monot raikkó dua ibá ye yatóu areggwá dua ye tuáñre basái no faribóu montor baná Isár uore iman raká ye edde Íba ye tuáñr guná lla kúruc or uore moijjé de yián biccác gorá ye tuáñre basái faribóu. dua íba eggwá endilla dua zibár duara tuñí Allar uore iman ainnó de yián Íba re zahér gorí faribá edde Íba ye tuáñre nejat diyé de yián ólla Íba re cúkuria zahér gorí faribá.
“Oú Alla, añí zani de ki, añí Tuáñr uldhá guná goijjí edde cáñza fáibar laayek boinní. Montor añí biccác gorí de ki, Isá Moósi ye añi faitám de cáñza híin Íbar uore loiyé zeéne añí Íbar uore iman ani gunár maf fai. Guná maf faibár mouka diyó de yían oré añí gosí edde añí nejat faibólla tuáñr uore iman ainní. Añí Isá re nizor Basáiloiya ísafe gosíloiyí! Tuáñr taajuippa rahámot ólla edde añár guná maf gorí añáre ofúrani zindigi diyó de yían ólla Tuáñre cúkuria! Amen!”
Eçé foijjó de híin ólla tuñí Moósi re gosí loibá hoói faiséla goijjó ne? Zodi goró, toóile doiya gorí “Añí Moósi re aijjá gosí loiyí” hoói lamát bothón asé de ibár uoré sibán maró.
English
Isá re nizor Basáiloya ísafe gosílo de yían or maáni ki?