सुआल
मैं मसां ह़ुन गै अपना विश्वास यीशु उप्पर रखेया ऐ- ह़ुन अग्गे केह़ ऐ?
जवाब
मुबारखां न! तुसें इक जीवन बदलने आला फैसला कित्ता ऐ! शायद तुस एह़ पुछा करदे ओ, "ह़ुन अग्गे केह ऐ? परमेसरे कन्ने अऊं अपना सफर किय्यां शुरू करां?" ह़ेठ लिखेदे पंज कदम तुसेंगी बाइबल च नर्देश देङन। जिस वेले तुसेंगी अपने सफर दे बारे च कोई सुआल औंदा ऐ, ता मेह़रबानी करिये www.GotQuestions.org/Dogri गी दिखो।
1. एह़ पक्का करी लैओ के तुस उध्दार गी समझ़दे ओ।
1 यूहन्ना 5:13 असेंगी दसदा ऐ के, "मैं तुसेंगी, जेके परमेसरे दे पुत्तरे दे ना उप्पर विश्वास करदे न, तां करी लिखेया ऐ के तुस जानो के अमर जीवन तुंदा ऐ।" परमेसर चाह़ंदा ऐ के अस उध्दार दे मतलब गी समझ़चे। परमेसर चाह़ंदे न के असेंगी इस पक्की गल्ला दा आतम विश्वास ह़ोए के अस बचाई लेत्ते गेदे आं। बखान च, आओ अस उध्दार दियें खास गल्लें गी दिखी लेचे:
(क) इस आस्ते के सारें पाप कित्ता ऐ। जे किश असें कित्ता ऐ ओह़ परमेसरे गी नाखुश करने आला ऐ। (रोमियों 3:23)
(ख) अपने पापें दी वजह़ कन्ने, अस परमेसरे शा म्ह़ेशा-म्ह़ेशा आस्ते बख ह़ोने दी सजा दे ह़कदार आं। (रोमियों 6:23)
(ग) साढ़े पापें दी सजा दा मुल्ल चुकाने आस्ते यीशु क्रूस दे उप्पर मरी गेया (रोमियों 5:8, 2-कुरिन्थियों 5:21)। यीशु साढ़ी जगह़ उप्पर, उस सजा गी लेंदे ह़ोऐ मरेया जिदे ह़कदार अस हे। उदे जींदा ह़ोने ने एह़ साबित करी ओड़ेया के साढ़े पापें दी सजा दा मुल्ल चुकाने आस्ते उदी मौत काफी ही।
(घ) परमेसरे उनें सारें गी माफी ते उध्दार दिंत्ता ऐ जेके अपना विश्वास यीशु च - उदी मौत दे उप्पर एह़ विश्वास करदे ह़ोए रखदे न केह़ साढ़े पापें दा मुल्ल चुकाने आस्ते ह़ोई ही (यूहन्ना 3:16, रोमियों 5:1, रोमियों 8:1)।
एह़ उध्दार दा सनेह़ा ऐ! जेकर तुसें अपने विश्वास गी यीशु मसीह उप्पर अपने मुक्तिदाता दे रूप च रखेदा ऐ, ता तुस बचाई लेत्ते गेदे ओ! तुंदे सारे पाप माफ करी दित्ते गेदे न ते परमेसर तुसेंगी कदे बी छुड़ने ते ना गै त्यागने दा वादा करदा ऐ (रोमियों 8:28-29, मत्ती 28:20)। चेत्ता रखेयो, यीशु मसीह़ च तुंदा स्भाव मह़फुज ऐ (यूहन्ना 10:28-29)। जेकर अपने मुक्तिदाता दे रूप च तुस अपना भ़रोसा सिरफ यीशु मसीह उप्पर रखदे ओ, ता तुस निश्चिंत ह़ोई सकदे ओ के सुर्गे च तुस परमेसरे कन्ने म्ह़ेशा-म्ह़ेशा आस्ते रौह़गे!
2. इक खरी कलीसिया दी खोज करो जेकी बाइबल दी शिक्षा दिंदी ह़ोए।
कलीसिया गी इक गिरजा जां चर्च यानिके भ़वन दे रूप च नेई सोचो। कलीसिया ता लोग ह़ुंदे न। एह़ बड़ा गै जरूरी ऐ के यीशु उप्पर विश्वास करने आले इक दूए कन्ने संगती रखन। एह़ कलीसिया दे शरुआती मकसदें च इक ऐ। ह़ुन तुसें अपना विश्वास यीशु मसीह उप्पर उप्पर रखी ओड़ेया ऐ, ता अस तुसेंगी इस गल्ला किते जोर देईये उत्साहित करने आं के तुस अपनी जगह़ च इक बाइबल अधारित विश्वासी कलीसिया दी खोज करी लैओ ते उत्थुआं दे पास्टर कन्ने गल्ल करो। यीशु मसीह च अपने नमें विश्वास दे बारे च उंदे कन्ने गल्ल-बात करो।
कलीसिया दा इक दूआ मकसद बाइबल दी शिक्षा देना ऐ। तुस परमेसरे दे नियमें गी अपने जीवनें च किय्यां लागू करना सिखी सकदे ओ। बाइबल गी समझ़ना इक कामयाब ते शक्तिशाली मसीही जीवन गी अनुभव करने दी चाबी ऐ। 2-तीमुथियूस 3:16-17 ग्लांदा ऐ के, "पूरा पबित्तर शास्तर परमेसरे दी प्रेरना कन्ने रचेया गेदा ऐ ते उपदेश, ते समझ़ाने, ते सधारने, ते ध़ारमिकता दी सिख आस्ते फायदेमंद ऐ। किजे परमेसरे दा जन सिद्द बने, ते ह़र इक भ़ले कम्में गी करने आस्ते तेज ह़ोई जा।"
कलीसिया दा त्रीया मकसद ऐ अराधना करना। परमेसरे दे सारे कित्ते दे कम्में आस्ते शुकर करना अराधना ऐ!
परमेसरे असेंगी बचायेदा ऐ। परमेसर साढ़े कन्ने इरख करदा ऐ। परमेसर साढ़े आस्ते सारियें चीजें दा इंतजाम करदा ऐ। परमेसर असेंगी रस्ता दस्सने आला ऐ ते असेंगी नर्देश दिंदा ऐ। असेंगी कीं नेई उदा शुकर करना चाईदा? परमेसर पबित्तर, ध़रमी, प्रेमी, दयालू ते अनुग्रह कन्ने भ़रोचे दा ऐ। प्रकाशितवाक्य 4:11 एलान करदे न के, "हे साढ़े प्रभु ते परमेसर, तू गै म्ह़ैमा ते आदर ते शक्ति दे काबल ऐ, किजे तू गै सारी चीजें दी सरिश्टी कित्ती ते ओह़ तेरी गै इखी कन्ने हियां ते रची गेईयां।"
3. परमेसरे आले पास्से ध़्यान करने आस्ते रोजाना समा कड्डो।
साढ़े आस्ते रोजाना परमेसरे आले पास्से ध़्यान करना बड़ा जरूरी ऐ। किश लोग इस्सी "मौन समा" ग्लांदे न। किश लोग इसी "भ़क्ति ध़्यान" ग्लांदे न, किजे एह़ इक नेह़ा समा ह़ुंदा, जिस वेले अस अपने आप गी परमेसरे आस्ते अर्पन करने आं। किश लोग इसी भ़्याग च गै करदे न, ते किश लोग संजे वेले गी जादा दरजा दिंदे न। इदे कन्ने कोई फर्क नेई पौंदा के लोग इसी केह़ ग्लांदे न जां कुस वेले करदे न। जेकी गल्ल जरूरी ऐ ओह़ एह़ के तुस नियमित तौर उप्पर परमेसर कन्ने समा गुजारो। कोह़की गल्लां मिलीये परमेसरे कन्ने साढ़े समें गी बनांदियां न?
(क) पराथना- पराथना आसान तरीके कन्ने परमेसरे कन्ने गल्ल करना ऐ। अपनी चिंता ते समस्याऐं दे बारे च परमेसरे कन्ने गल्ल करो। परमेसरे गी तुसेंगी ज्ञान ते तुसेंगी रस्ता दस्सने आस्ते ग्लाओ। अपनी जरूरतें गी ह़ासल करने आस्ते परमेसरे गी ग्लाओ। परमेसरे गी सनाओ के तुस उसी किन्ना जादा इरख करदे ओ, ते जे किश ओह तुंदे आस्ते करदा ऐ, उदे आस्ते तुस उदी किन्नी सराह़ना करदे ओ। इनें सारी गल्लें गी गै पराथना ग्लांदे न।
(ख) बाइबल गी पड़ना - कलीसिया च, संडे स्कूल च, ते/जां बाइबल अध्ययन दी जमांते च बाइबल दी शिक्षा लेने दे अलावा तुसेंगी अपने आस्ते भी बाइबल गी पढ़ना जरूरी ऐ। बाइबल च इक कामयाब मसीही जीवन जीने दा ओह़ सारा समान ऐ जिसी तुसेंगी जानने दी लोड़ ऐ। इदे च परमेसरे दा ओह़ रस्ता दस्सेया गेदा ऐ के किय्यां सेह़ी फैसलें गी लेत्ता जा, किय्यां परमेसरे दी इखी गी जानचे, दूएं दी दिख-भ़ाल किय्यां करचे ते आत्मक तरक्की किय्यां करचे। बाइबल साढ़े आस्ते परमेसरे दा बचन ऐ। अस अपने जीवन गी जरूरी रूप च किस चाल्ली चलाचे, इदे बारे च बाइबल परमेसरे दी नर्देश कताब ऐ जिस कन्ने के ओह़ खुश ह़ोई जा ते अस संतुष्टि ह़ासल करचे।
4. नेह़ लोकें कन्ने रिश्ते बध़ाओ जेके तुंदी आत्मक तरक्की करी सकदे न।
1-कुरिन्थियों 15:33 असेंगी दसदा ऐ के, "ध़ोखा नेई खायो: 'बूरी संगत शैल चरित्तर गी खराब करी ओड़दी ऐ।" बाइबल साढ़े उप्पर पौने आले "बूरे" लोकें दे असर दे बारे दित्ती गेदी चेताबनी कन्ने भ़रोची दी पेदी ऐ। पापभ़री गल्लें कन्ने भ़रोचे दे लोकें दी संगत च समा गुजारना असेंगी बी उनें पाप आली गल्लें दे जरिये असेंगी परख च पाई देने दी बजह़ बनी जंदी ऐ। अस जिनें लोकें दे अग्गे-पिछे ह़ुन्ने आं, उंदा चरित्तर साढ़े उप्पर बी असर करना लगदा ऐ। इस आस्ते एह़ बड़ा जरूरी ऐ के नेह़ लोकें गी अपने अग्गे-पिछे रखचे जेके प्रभु कन्ने इरख करदे ते उदे आस्ते समर्पित ह़ोन।
इक्क जां दऊ दोस्तें गी, शायद अपनी कलीसिया च तुप्पने दा जतन करो, जेके तुंदी मदद करी सकदे ह़ोन ते तुसेंगी ह़ौंसला देन (इब्रानियों 3:13, 10:24)। अपने दोस्तें गी ग्लाओ के ओह़ बेह़ल्ले समे, तुंदी उठने-बौह़ने ते परमेसरे कन्ने तुंदे चाल-चलन दे बारे च तुसेंगी जवाबदार बनाई रखन। उनेंगी पुछो केह़ तुस बी उंदे आस्ते इय्यां करी सकदे ओ। इदा मतलब एह़ नेई के तुसें अपने उनें सारे दोस्तें गी छुड़ना पौना ऐ जेके यीशु गी अपने मुक्तिदाता दे रूप च नेई जानदे। उंदे कन्ने लगातार दोस्ती रखो ते उंदे कन्ने इरख करो। बस असानी कन्ने उनेंगी जानना देयो के यीशु ने तुंदे जीवने गी बदली ओड़ेया ऐ ते उन तुस उने सारे कम्में गी नेई करी सकदे जेके पैह़लैं करदे हे। परमेसर गी ग्लाओ के ओह़ तुसेंगी यीशु दे बारे च अपने मित्तरें गी सनाने आस्ते मौका देन।
5. बपतिस्मा लैओ।
बड़े सारे लोकें गी बपतिस्मा दे बारे च बैह़म ऐ। शब्द "बपतिस्मा" दा मतलब पानी च डुबकी मारना। बपतिस्मा यीशु च अपने नमें विश्वास ते उदे पिछे चलने दा तुंदे समर्पन गी सारें दे सामने एलान करने दा एक बाइबल अधारित तरीका ऐ। पानी च डूबकी मारने दी क्रिया एह दसदी ऐ के अस यीशु मसीह कन्ने दफनाए गेदे न। पानी चा बाह़र औने दी क्रिया यीशु दे जींदा ह़ोई जाने गी दसदी ऐ। बपतिस्मा लेने कन्ने अपने आप गी यीशु दी मौत, उदे दफनाए जाने ते जींदा ह़ोई जाने दी पच्छान कराना ऐ (रोमियों 6:3-4)।
बपतिस्मा ओह़ नेई ऐ जेका तुसेंगी बचांदा ऐ। बपतिस्मा तुंदे पापें गी नेई ध़ोंदा ऐ। बपतिस्मा ते बस इक ह़ुकम मनने दा कदम, उध्दार आस्ते सिरफ मसीह च गै तुंदे विश्वास दी इक सारें दे सामने एलान करने दा सबूत ऐ। बपतिस्मा इस आस्ते जरूरी ऐ किजे एह़ - मसीह़ च तुंदे विश्वास ते उदे आस्ते तुंदे समर्पन दी सारें दे सामने एलान करने दे सबूत दा इक कदम ऐ। जेकर तुस बपतिस्मा लेने आस्ते त्यार ओ ता तुसेंगी कुसे पास्टर कन्ने गल्ल करनी चाईदी।
English
मैं मसां ह़ुन गै अपना विश्वास यीशु उप्पर रखेया ऐ- ह़ुन अग्गे केह़ ऐ?