Icipusho
Umwina Christu cinshi?
Ukwasuka
Ubulondoloshi mu cibemba pa lwa mwina Christu bwingalosha mu cakuti “umuntu ukulumbula icisumino muli Yesu nga Christu nangula mu kupepo kwashintilila mu masambilisho yakwa Yesu.” Nangula ici cingabe ntampilo isuma, lelo nge fyo caba mu bulondoloshi bwa malembo ayengi, cili icapelebela mu kulondolola icishinka ce fyo icipingo cilondolola pa lwa kubo mwina Christu. Ishiwi lya “ubwina Christu” lyamonekela imiku itatu mu cipingo cipya (imilimo ya batumwa 11:26; 26:28; 1 Petro 4:16). Abasambi bakwa Yesu batampile ukwitwa “abena Christu” ku Antioki (imilimo ya batumwa 11:26) pamulandu wa kuti imisango, ificitwa ne nsoselo shabo fyapalile Christu. Ishiwi “umwina Christu” cipilibula, “ukuba kwi bumba lya kwa Christu” nangula “uukonka Christu.”
Icabulanda mu kupita kwa nshita, ishiwi lya “bwina Christu” lyalufya ubufinyo apakalamba kabili inshite shingi libonfiwo ku pilibulo muntu uupepa nangula uwakwate misango isuma, lelo uwaba nangulo uushabo musambi wa cine wa kwa Yesu Christu. Abantu abengi abashasumina no ku subila muli Yesu Christu baimona abene ukuti bena Christu, pa mulandufye wa kuti balalongana nangula bekala mu calo “cabena Christu”. Lelo ukulongana, ukwafwa abapina, nangula ukubo muntu umusuma teti filengo muntu ukubo mwina Christu. Ukulonganafye ku mapepo teti ku kulenge ube umwina Christu nge fyo kusangwa ku nchende ukusangwe myotoka teti kulenge umuntu ukuba ni motoka. Ukuba umo wa mucilonganino, ukusangwa ku mapepo cila nshita no kupela ku mulimo wa cilonganino teti cilengo muntu ukubo mwina Christu.
Icipingo cisambilisho kuti imilimo isuma teti itulenge abapokelelwa kuli Lesa. Tito 3:5 isose fyo, “alitupuswishe, te ku milimo ya bulungami iyo twacitile, lelo umwabelo luse lwakwe, ku kusamba kwa kufyalwa libili no kulengwa cipya cipya ku mupashi wa mushilo.” Kanshi umwina Christu ni uyo uwafyalwa cipya cipya muli Lesa (Yohane 3:3; Yohane 3:7; 1 Petro 1:23) kabili abike cisumino ne subilo muli Yesu Christu. Abena Efese 2:8 itwebe fyo ni ku “…kusenamina mwapusukila, mu cisumino—kabili te cintu cafuma kuli imwe, ca bupe ca kwa Lesa.”
Umwina Christu cine cine ni uyo uwabike cisumino ne subilo mu kubako no mulimo wakwa Yesu Christu, pamofye nemfwa yakwe pa lupanda nga malipilo ya lubembu. No kubūka kwakwe pa bushiku bwelenga shitatu. Yohane 1:12 itwebe fyo, “Lelo abo bene abamusekelele, abasumine ishina lyakwe, abapēle amaka aya kuba abana bakwa Lesa.” Icilangililo ca mwina Christu wine wine kukwata icitemwiko kuli bambi no kumfwila icebo cakwa Lesa (1 Yohane 2:4, 10). Umwina Christu wine wine mwana wakwa Lesa cine cine, umo wa mu lupwa lwakwa Lesa, elyo umo uwapelwo mweo upya muli Yesu Christu.
Bushe mwasala ukukonka Christu pamulandu wafyo mwabelenga kuno? Nga nifyo, saleni apalembelwe “Na pokelela Christu Lelo” paka kusalilapo panshi.
English
Umwina Christu cinshi?