Mistoqsija
X’inhuma s-seba’ Spirti t’Alla?
Tweġiba
Is-“seba’ spirti t’Alla” jisemmew diversi drabi fil-Ktieb tar-Rivelazzjoni:
• Rivelazzjoni 1:4–5, “Ġwanni, lis-seba’ knejjes li huma fl-Asja: il-grazzja lilkom u s-sliem mingħand hu li hu, u hu li kien, u hu li ġej, u mingħand is-seba’ Spirti li huma quddiem it-tron tiegħu, u mingħand Ġesù Kristu, ix-xhud, il-fidil, il-primoġenitu tal-mejtin, u l-ħakkiem tas-slaten tal-art.”
• Rivelazzjoni 3:1, “Lill-anġlu tal-knisja f’Sardi ikteb: ‘dawn il-ħwejjeġ jgħid dak li għandu s-seba’ Spirti t’Alla.”
• Rivelazzjoni 4:5, “Mit-tron joħorġu beraq u tkarwit u ragħad; u quddiem it-tron kienu mqabbdin seba’ lanterni tan-nar, li huma s-seba’ Spirti t’Alla.”
• Rivelazzjoni 5:6, “U rajt f’nofs it-tron u l-erba’ ħlejjaq ħajjin u f’nofs l-anzjani Ħaruf wieqaf, bħallikieku kien maqtul; għandu seba’ qrun u seba’ għajnejn, li huma s-seba’ Spirti t’Alla mibgħutin fl-art kollha.”
L-identità tas-“seba’ Spirti” mhix daqshekk espliċita f’dawn il-passaġġi, però biex naslu għall-interpretazzjoni korretta mhux daqshekk diffiċli. Is-“seba’ Spirti” ma jistgħux ikunu seba’ kreaturi anġeliċi bħas-serafini jew kerubini minħabba l-kuntest tar-Rivelazzjoni 1:4. Ġwanni jgħid li l-“grazzja u s-sliem” ġejjin lill-knejjes minn tliet sorsi: mingħand “hu li hu, u hu li kien, u hu li ġej” (vers 4), mingħand “is-seba’ Spirti li huma quddiem it-tron tiegħu,” (vers 4), u mingħand “Ġesù Kristu” (vers 5). Din deskrizzjoni tat-Trinità Maddsa: il-grazzja u s-sliem huma mogħtija mill-Missier, mill-Iben, u mill-Ispirtu s-Santu, it-Tliet Persuni tad-Divinità, ugwali fl-essenza divina.
Fir-Rivelazzjoni 3:1 Ġesù “għandu” s-seba’ Spirti t’Alla. Fi Ġwanni 15:26, Ġesù “jibgħat” l-Ispirtu s-Santu mingħand il-Missier. Iż-żewġ passaġġi jissuġġerixxu r-rwol superjuri tal-Iben u r-rwol subordinat tal-Ispirtu.
Fir-Rivelazzjoni 4:5 is-seba’ Spirti t’Alla huma simbolizzati bħala seba’ lanterni tan-nar li jinsabu quddiem it-tron t’Alla. Din l-istampa taqbel mal-viżjoni ta’ Żakkarija fejn jara l-Ispirtu s-Santu ssimbolizzat bħala “kandelabru kollu deheb … bil-bieqja tiegħu fuq rasu u seba’ msiebaħ fuqu” (Żakkarija 4:2).
Fir-Rivelazzjoni 5:6 is-seba’ Spirti huma “s-seba’ għajnejn” tal-Ħaruf, u huma “mibgħutin fl-art kollha.” Dawn is-seba’ għajnejn jirrefru għall-omnixjenza tal-Ispirtu (u tal-Ħaruf), u l-fatt li hu mibgħut fid-dinja kollha jirreferi għall-omnipreżenza tiegħu.
Ladarba nidentifikaw is-“seba’ Spirti” bħala l-Ispirtu s-Santu, il-mistoqsija tibqa’, għaliex hemm “seba’” minnu? Il-Bibbja, u speċjalment il-Ktieb tar-Rivelazzjoni, tuża n-numru sebgħa biex tirreferi għall-perfezzjoni u l-kompletezza. Il-viżjoni ta’ Ġwanni hija stampa tal-Ispirtu s-Santu li hu perfett u komplut.
Isaija 11:2 wkoll jagħmel referenza għall-Ispirtu s-Santu billi juża deskrizzjoni ta’ sebgħa: “U l-Ispirtu tal-Mulej joqgħod fuqu, l-ispirtu tal-għerf u tad-dehen, l-ispirtu tal-fehma u tal-qawwa, u l-ispirtu tal-għarfa u tal-biża’ tal-Mulej.” Il-profezija hi li l-Messija kellu jingħata s-setgħa mhux minn seba’ spirti individwali imma minn Spirtu wieħed, deskritt b’seba’ modi:
1) L-Ispirtu tal-Mulej 2) L-Ispirtu tal-għerf 3) L-Ispirtu tad-dehen 4) L-Ispirtu tal-fehma 5) L-Ispirtu tal-qawwa 6) L-Ispirtu tal-għarfa 7) L-Ispirtu tal-biża’ tal-Mulej
Mela, is-“seba’ Spirti t’Alla” fil-Ktieb tar-Rivelazzjoni huma referenza għall-Ispirtu s-Santu fil-perfezzjoni tal-ministeru varju tiegħu.
English
X’inhuma s-seba’ Spirti t’Alla?