Mistoqsija
X’inhi ċ-ċavetta biex napplika l-Bibbja għal ħajti?
Tweġiba
L-applikazzjoni tal-Bibbja hi d-dover ta’ kull Kristjan. Jekk ma napplikawhiex, il-Bibbja ssir bħal kwalunkwe ktieb ieħor, kollezzjoni xejn prattika ta’ manuskritti antiki. Għalhekk Pawlu jgħid, “Kulma tgħallimtu u rċevejtu u smajtu u rajtu fija, dawn ipprattikaw; u Alla tas-sliem ikun magħkom” (Filippin 4:9). Meta napplikaw il-Bibbja, Alla nnifsu jkun preżenti magħna.
L-ewwel pass biex napplikaw Kelmet Alla f’ħajjitna hu li naqrawha. L-għan li naqrawha hu sabiex insiru nafu ’l Alla, nitgħallmu triqatu, u biex nifhmu l-għanijiet tiegħu għal din id-dinja u għal kull wieħed u waħda minna, individwalment. Meta naqraw il-Bibbja, nitgħallmu dwar il-mod kif Alla mexa mal-umanità tul l-istorja, il-pjan tiegħu tas-salvazzjoni, il-wegħdi tiegħu, u l-karattru tiegħu. Naraw kif għandha tkun il-ħajja Kristjana. L-għarfien t’Alla li nottienu mill-Iskrittura iservi ta’ pedament imprezzabbli biex napplikaw il-prinċipji tal-Bibbja għal ħajjitna.
Imbagħad, l-għan tagħna jkun dak li s-salmista jirreferi għalih bħala “l-ħabi” ta’ Kelmet Alla fi qlubna: “F’qalbi ħbejt kelmtek sabiex ma nidnibx kontrik” (Salmi 119:11). Il-mod li “naħbu” Kelmet Alla fi qlubna hu billi nistudjawha, nimmemorizzawha, u nimmeditaw fuq dak li nkunu qrajna. Dawn l-erba’ passi—taqra, tistudja, timmemorizza, u timmedita—jagħmluha possibbli li napplikaw l-Iskritturi għal ħajjitna b’suċċess.
Studja: Filwaqt li l-istudju ċertament jinvolvi l-qari, dawn m’humiex l-istess. Li tistudja Kelmet Alla jfisser li, fi spirtu ta’ talb, niddedikaw ħin u attenzjoni sabiex nakkwistaw tagħrif avvanzat fuq xi persuna, suġġett, tema, passaġġ, jew ktieb partikolari tal-Bibbja. Hawn ħafna riżorsi għall-istudju disponibbli, fosthom kummentarji bibliċi u studji tal-Bibbja ppubblikati li jgħinuna nagħmlu festa bil-“laħam” ta’ Kelmet Alla (Ebrej 5:12-14). Imissna niffamiljarizzaw irwieħna ma’ dawn ir-riżorsi, imbagħad nagħżlu topik, passaġġ, jew ktieb li jqanqlilna l-interess u nidħlu fih.
Immemorizza: Impossibbli napplikaw dak li ma niftakrux. Jekk se “naħbu” l-Kelma fina, l-ewwel irridu nwassluha fi qlubna permezz tal-immemorizzar. Meta timmemorizza l-Iskrittura tkun qed tibni bir li minnu tkun tista’ tixrob kontinwament, speċjalment fi żminijiet meta ma tkunx tista’ taqra l-Bibbja. Bl-istess mod li nġemmgħu l-flus u ħwejjeġ materjali oħra biex nużawhom fil-futur, hekk ukoll imissna “ndaħħlu dawn il-kelmiet tiegħi f’qalbkom, u f’ruħkom” (Dewteronomju 11:18). Oħloq pjan ta’ versi mill-Iskrittura li tixtieq timmemorizza kull ġimgħa.
Immedita: Il-kittieb u filosfu Edmund Burke darba qal, “Li taqra bla ma tirrifletti qisu li tiekol bla ma tiddiġerixxi.” Ma naffordjawx “nieklu” Kelmet Alla bla ma “niddiġeruha.” Fil-parabbola tal-erba’ tipi ta’ art (Mattew 13:3-9; ara wkoll 18-23), Ġesù jirrakkonta dwar żerriegħ li ħareġ jiżra’ ż-żerriegħa fl-għalqa tiegħu, u sab li xi żerriegħa – Kelmet Alla (Mattew 13:19) – waqgħet “fuq il-blati, fejn ma kellhomx ħafna ħamrija, u telgħet malajr minħabba li ma kellhiex fond ta’ ħamrija, imma kif telgħet ix-xemx, ix-xtieli nkwew, u minħabba li ma kellhomx għerq, dbielu” (13:5-6). Dan, jgħid Ġesù, hu dak li fih Kelmet Alla nżerat però ma ħaditx għerq (13:20-21).
Salm 1:2 jgħid li l-bniedem li jimmedita fuq Kelmet Alla huwa mbierek. Donald S. Whitney, fil-ktieb tiegħu Spiritual Disciplines for the Christian Life, jikteb, “Is-siġra tal-ħajja spiritwali tiegħek tiffjorixxi l-aħjar bil-meditazzjoni għaliex dan jgħinek tassorbi l-ilma ta’ Kelmet Alla (Efesin 5:26). Li tisma’ jew taqra l-Bibbja biss jixbah ħalba xita fuq art iebsa. Tkun kemm tkun qalila x-xita, il-parti l-kbira tal-ilma jintilef u ftit li xejn jinżel ’l isfel. Il-meditazzjoni jiftaħ l-art tar-ruħ u jħalli l-ilma tal-Kelma t’Alla jiffiltra fil-fond. Dan jirriżulta f’abbondanza straordinarju ta’ frott u għana spiritwali” (paġni 49-50).
Jekk nixtiequ li l-kelma “tieħu l-għerq” f’ħajjitna tant li nipproduċu ħsad li jogħġob ’l Alla (Mattew 13:23), jeħtieġ naħsbu, nirriflettu, u nimmeditaw fuq dak li naqraw u nistudjaw fil-Bibbja. Hekk kif nimmeditaw, nistgħu nistaqsu lilna nfusna xi mistoqsijiet tipo:
1. Dal-passaġġ x’jgħallimni dwar Alla? 2. Dal-passaġġ x’jgħallimni dwar il-knisja? 3. Dal-passaġġ x’jgħallimni dwar id-dinja? 4. Dal-passaġġ x’jgħallimni dwari nnifsi? Dwar ix-xewqat u l-motivi u tiegħi? 5. Dal-passaġġ jitlob minni li nieħu xi azzjoni? Jekk iva, xi jmissni nagħmel? 6. Hemm xi ħaġa li għandi bżonn nistqarr jew nindem minnha? 7. Minn dal-passaġġ, x’tgħallimt li se jgħinni niffoka fuq Alla u nirsisti biex nigglorifikah?
Applika: Daqskemm nistudjaw, nimmemorizzaw, u nimmeditaw fuq Kelmet Alla, daqshekk ieħor nifhmu kif din tapplika għal ħajjitna. Però mhux biżżejjed nifhmu kif din il-kelma tgħodd għal ħajjitna; jeħtieġ attwalment napplikawha (Ġakbu 1:22). “L-applikazzjoni” timplika azzjoni, u azzjoni t’ubbidjenza hija l-pass finali li bih l-Kelma t’Alla tieħu l-ħajja fina. L-applikazzjoni tal-Iskrittura tinforza u tillumina aktar l-istudju tagħna, u sservi wkoll biex issaħħah id-dixxerniment tagħna, u tgħinna niddistingwu aħjar bejn it-tajjeb u l-ħażin (Ebrej 5:14).
Finalment, importanti nkunu nafu li meta nipprovaw nifhmu u napplikaw Kelmet Alla għal ħajjitna, m’aħniex waħedna. Alla mliena bl-Ispirtu tiegħu (Ġwanni 14:16-17), li jkellimna, imexxina u jiggwidana fil-verità kollha (Ġwanni 16:13). Għal dir-raġuni, Pawlu għallem lill-fidili biex “jimxu fl-Ispirtu” (Galatin 5:16), għaliex hu r-refuġju u l-qawwa tagħna, għajnuna preżenti ħafna fl-għawġ (Salmi 46:1)! L-Ispirtu se jiggwidana fedelment fir-rieda t’Alla, u jikkawża li dejjem nagħmlu t-tajjeb (Eżekjel 36:26-28; Filippin 2:13). Min, aħjar minn dak li ispira l-Bibbja—ċoè l-Ispirtu s-Santu nnifsu—kapaċi jgħallimna kif ngħixu skont kulma hemm miktub fiha? Għaldaqstant, ħa nagħmlu l-parti tagħna billi naħbu l-Kelma fi qlubna, u nobdu lill-Ispirtu s-Santu li jiggwidana bl-istess Kelma divina.
English
X’inhi ċ-ċavetta biex napplika l-Bibbja għal ħajti?