Mistoqsija
X’tgħid il-Bibbja dwar id-demonji?
Tweġiba
Id-demonji huma anġli mwaqqgħa, kif inhu indikat fir-Rivelazzjoni 12:9: “U ntefa’ ’l barra d-dragun il-kbir, is-serpent l-antik, imsejjaħ ix-xitan u Satana, li jqarraq bid-dinja kollha; intefa’ ’l barra lejn l-art, u l-anġli tiegħu ntefgħu ’l barra miegħu.” Il-waqgħa ta’ Satana mill-ġenna hi deskritta b’mod simboliku f’Isaija 14:12–15 u Eżekjel 28:12–15. Meta waqa’, Satana ħa wħud mill-anġli miegħu – terz minnhom, skont ir-Rivelazzjoni 12:4. Ġuda 6 wkoll isemmi l-anġli li dinbu. Allura, biblikament, id-demonji huma anġli mwaqqgħa li flimkien ma’ Satana, għażlu li jirribellaw kontra Alla.
Ftit mid-demonji, minħabba dnubhom, diġà jinsabu miżmumin “fi dlumija, marbuta bi ktajjen dejjiema” (Ġuda 1:6). Oħrajn liberi li jħufu u l-Bibbja tirreferi għalihom bħala “l-potentati dinjija ta’ dad-dlam preżenti u … il-forzi spiritwali tal-ħażen fl-imkejjen smewwitin” (Efesin 6:12, ara wkoll Kolossin 2:15). Id-demonji għadhom isegwu lil Satana bħala l-kap tagħhom u qed jiggwerraw mal-anġli qaddisa f’tentattiv li jfixxklu l-pjan t’Alla u jostakolaw in-nies t’Alla (Danjel 10:13).
Id-demonji, bħala spirti, għandhom l-abbiltà li jippossiedu ġisem uman. Il-possessjoni demonika sseħħ meta ġisem xi ħadd ikun ikkontrollat kompletament minn demonju. Sintendi dan ma jistax jiġri lil ulied Alla, billi fil-qalb tal-fidil li hu f’Ġesù jgħammar l-Ispirtu s-Santu (1 Ġwanni 4:4).
Waqt il-ministeru tiegħu fuq l-art, Ġesù ltaqa’ ma’ bosta demonji. Sintendi, ħadd minnhom ma ġabha żewġ mas-setgħa ta’ Kristu: “Ġabulu ħafna indemonjati, u b’kelma xeħet ’il barra l-ispirti u kkura ’l dawk kollha li kellhom xi invalidità” (Mattew 8:16). L-awtorità ta’ Ġesù fuq id-demonji kienet waħda mill-provi li hu tabilħaqq kien Bin Alla (Luqa 11:20). Id-demonji li ltaqgħu ma’ Ġesù għarfu min kien, u beżgħu minnu: “U ara, [id-demonji] infexxew jgħajtu billi qalu: ‘X’għandna x’naqsmu miegħek, Bin Alla? Ġejt hawn biex tittorturana qabel iż-żmien?’” (Mattew 8:29). Id-demonji jafu li tmiemhom hu wieħed ta’ turment.
Bħalissa, Satana u d-demonji tiegħu qed jaraw kif se jġarrfu ħidmet Alla u jqarrqu b’min jistgħu (1 Pietru 5:8; 2 Korintin 11:14–15). Id-demonji huma deskritti bħala spirti malinni (Mattew 10:1), spirti impuri (Marku 1:27), spirti giddieba (1 Slaten 22:23), u anġli ta’ Satana (Rivelazzjoni 12:9). Satana u d-demonji tiegħu jqarrqu bid-dinja (2 Korintin 4:4), imexxu ’l quddiem dottrina falza (1 Timotju 4:1), jattakkaw lill-Kristjani (2 Korintin 12:7; 1 Pietru 5:8), u jiggwerraw kontra l-anġli qaddisa (Rivelazzjoni 12:4–9).
Id-demonji/anġli mwaqqgħa huma għedewwa t’Alla, imma huma għedewwa mirbuħa. Kristu “żarma lill-ħakkiema u l-awtoritajiet,” u “għamel spettaklu pubbliku bihom billi ttrijonfa fuqhom bih (bis-salib)” (Kolossin 2:15). Hekk kif nissottomettu rwieħna lejn Alla u nirreżistu x-xitan, m’għandna xejn minn xiex nibżgħu. “Ikbar min hu fikom milli min hu fid-dinja” (1 Ġwanni 4:4).
English
X’tgħid il-Bibbja dwar id-demonji?