Mistoqsija
Sejjer il-ġenna - Kif nista’ niggarantixxi d-destinazzjoni eterna tiegħi?
Tweġiba
Għid is-sewwa. Il-jum li fih nidħlu fl-eternità jista’ jasal qabel ma naħsbu. Bi tħejjija għal dak il-mument, jeħtieġ inkunu nafu dil-verità - mhux kulħadd sejjer il-ġenna. Kif nistgħu nkunu nafu fiċ-ċert aħniex sejrin il-ġenna jew le? Xi elfejn sena ilu, l-appostli Pietru u Ġwanni kienu qed jippritkaw il-vanġelu ta’ Ġesù Kristu lil ġemgħa nies f’Ġerusalemm. Pietru għamel dikjarazzjoni profonda li għadha tidwi anke fid-dinja postmoderna tal-lum: “U m’hemmx salvazzjoni f’xi ħadd ieħor, għax m’hemm ebda isem ieħor taħt is-sema mogħti fost il-bnedmin li bih jeħtieġ inkunu salvati” (Atti 4:12).
Issa, bħal dakinhar, Atti 4:12 mhux politikament korrett. Illum ħaġa popolari li tgħid, “Kulħadd sejjer il-ġenna,” jew, “It-toroq kollha jwasslu sal-ġenna.” Ħafna jaħsbu li jistgħu jkollhom il-ġenna mingħajr ma jkollhom lil Ġesù. Iridu l-glorja, però ma jinteressahomx mis-salib, wisq inqas minn dak li miet fuqu. Ħafna ma jridux jaċċettaw lil Ġesù bħala l-uniku triq biex imorru l-ġenna u huma determinati li jsibu mogħdija oħra. Però Ġesù javżana li ebda mogħdija oħra ma teżisti. Il-konsegwenza li wieħed jirrifjuta dil-verità hija eternità fl-infern. Il-messaġġ hu ċar: “Min jemmen fl-Iben għandu l-ħajja eterna; imma min ma jobdix lill-Iben mhux se jara l-ħajja, iżda r-rabja t’Alla tibqa’ fuqu.” (Ġwanni 3:36). Il-fidi fi Kristu hi ċ-ċavetta biex tmur il-ġenna.
Xi wħud abbli jargumentaw li trid tkun moħħok magħluq wisq biex tgħid li Alla provda triq waħda biss għall-ġenna. Però, frankament, fid-dawl tar-ribelljoni tal-bnedmin kontra Alla, hi xi ħaġa wiesa’ wisq illi hu provda mqar triq waħda għall-ġenna. Jistħoqqilna l-ġustizzja, imma Alla jagħtina mezz biex neħilsuha billi bagħat l-Iben uniku tiegħu biex imut għal dnubietna. Din hi l-verità, sew jekk xi ħadd iqisha bħala dejqa jew wiesa’. L-aħbar it-tajba hi li Ġesù miet u reġa qam; dawk kollha li sejrin il-ġenna rċevew dal-vanġelu bil-fidi.
Ħafna bnedmin illum iħaddnu vanġelu “mifqugħ bl-ilma” li jevita l-bżonn tal-indiema. Iridu jemmnu f’Alla kollu “mħabba” li ma jiġġudikax u li jinjora d-dnub. Jgħidu ħwejjeġ bħal, “Alla tiegħi qatt mhu se jibgħat lil xi ħadd l-infern.” Però Ġesù spiss tkellem dwar l-infern, u ppreżenta lilu nnifsu bħala s-Salvatur li joffri l-uniku mezz biex wieħed imur il-ġenna: “Jien hu t-triq, u l-verità, u l-ħajja; ħadd ma jiġi għand il-Missier, ħlief permezz tiegħi” (Ġwanni 14:6).
Min se jidħol attwalment f’saltnet Alla? Kif nista’ jkolli garanzija li jien sejjer il-ġenna? Il-Bibbja tiddistingwi bejn dawk li għandhom il-ħajja eterna u dawk li m’għandhomx: “Min għandu l-Iben għandu l-ħajja; min m’għandux lil Bin Alla m’għandux il-ħajja” (1 Ġwanni 5:12). Kollox hu marbut fuq il-fidi. Dawk li jemmnu fi Kristu jsiru wlied Alla (Ġwanni 1:12). Dawk li jaċċettaw is-sagrifiċċju ta’ Ġesù bħala l-pagament għal dnubiethom u jemmnu fir-resurrezzjoni tiegħu sejrin il-ġenna. Dawk li jirriġettaw lil Kristu mhumiex. “Min jemmen fih mhux iġġudikat, imma min ma jemminx hu diġà ġġudikat, għax m’emminx fl-isem tal-Iben uniku t’Alla” (Ġwanni 3:18).
Daqskemm il-ġenna għad tkun mill-isbaħ għal dawk li jaċċettaw lil Ġesù Kristu bħala s-Salvatur tagħhom, daqshekk ieħor l-infern għad ikun tal-waħx għal dawk li jirriġettawh. Ma tistax taqra l-Bibbja bis-serjetà mingħajr ma tara dan ripetutament - il-linja diviżorja hemmhekk qiegħda. Il-Bibbja tgħid li triq waħda biss hemm għall-ġenna - Ġesù Kristu. Segwi l-kmand ta’ Ġesù: “Idħlu mix-xatba d-dejqa, għax wiesa’ x-xatba u spazzjuża t-triq li twassal għad-distruzzjoni, u ħafna huma dawk li jinsabu deħlin minnha; kemm hi dejqa x-xatba, u fistretta t-triq li twassal għall-ħajja, u ftit huma dawk li qed isibuha!” (Mattew 7:13–14).
Il-fidi f’Ġesù hi l-uniku mezz biex tmur il-ġenna. Dawk kollha li għandhom dil-fidi huma garantiti li jidħlu hemm. Qed tafda f’Ġesù?
English
Sejjer il-ġenna - Kif nista’ niggarantixxi d-destinazzjoni eterna tiegħi?