Mistoqsija
X’tgħid il-Bibbja dwar il-kuntentizza?
Tweġiba
Id-dizzjunarju jiddefinixxi l-kelma kuntentizza bħala “l-istat ta’ sodisfazzjon mentali u emozzjonali bl-affarijiet kif inhuma.” Illum rari tiltaqa’ ma’ xi ħadd li jinsab verament kuntent bil-kundizzjoni tal-ħajja tiegħu. Il-Bibbja għandha ħafna xi tgħid dwar il-kuntentizza – li tkun kuntent b’dak li għandek, b’min int, u b’fejn sejjer. Ġesù qal, “Minħabba f’hekk ngħidilkom, tinkwetawx għal ħajjitkom, x’se tieklu jew x’se tixorbu, lanqas għal ġisimkom, x’se tilbsu. Il-ħajja mhix iżjed importanti mill-ikel, u l-ġisem mill-ilbies?” (Mattew 6:25).
Essenzjalment, Ġesù qed jgħidilna biex inkunu kuntenti b’dak li għandna. Mhux biss, imma tana wkoll kmand dirett biex ma ninkwetawx fuq dawk il-ħwejjeġ tad-dinja. Imbagħad iżid jgħid, “Għax dawn il-ħwejjeġ kollha l-Ġentili jfittxuhom bil-ħerqa, għax Missierkom is-smewwieti jaf illi għandkom bżonn dawn il-ħwejjeġ kollha. Imma fittxu l-ewwel is-Saltna t’Alla u l-ġustizzja tiegħu, u dawn il-ħwejjeġ kollha se jiżdidulkom” (Mattew 6:32–33). Minn kliem Ġesù, nistgħu nikkonkludu li n-nuqqas ta’ kuntentizza hi dnub, u tpoġġina fl-istess kategorija ta’ dawk li ma jafux ’l Alla.
Ħafna nies lanqas biss jimmaġinaw kemm l-appostlu Pawlu bata, u għadda mingħajr ħafna mill-kumditajiet tal-ħajja (2 Korintin 11:23–28). Madankollu kien jaf is-sigriet tal-kuntentizza: “Naf ngħaddi kemm f’qagħdiet umli, naf ukoll noktor; f’kull sitwazzjoni u f’kollox jien tgħallimt is-sigriet kemm li nkun sodisfatt kif ukoll inġuħ, kemm noktor kif ukoll ngħaddi bin-nieqes. Kollox niflaħ nagħmel permezz ta’ dak li jiffortifikani” (Filippin 4:12–13). L-awtur tal-Epistola lill-Ebrej iżid, “Ħa tkun il-manjiera ta’ ħajjitkom mingħajr imħabba għall-flus, u kunu kuntenti bil-ħwejjeġ li għandkom, għax hu nnifsu qal, ‘Żgurament mhux se nħallik, lanqas qatt mhu se nabbandunak’ – biex hekk aħna nistgħu ngħidu kunfidentement, ‘Is-Sid jgħini; u mhux se nibża’. X’jista’ jagħmilli l-bniedem?’” (Ebrej 13:5–6).
Madankollu l-bnedmin ikomplu jiġru wara l-ħwejjeġ ta’ did-dinja, bla ma jikkuntentaw b’dak li għandhom u bil-qagħda tagħhom. L-istiker, “Dak li għandu l-aktar ġugarelli jirbaħ!” tiddeskrivi eżattament il-kilba tad-dinja biex dejjem takkwista aktar u aktar. Salamun, bniedem għaref u sinjur, qal, “Min iħobb il-flus ma jixbax bil-flus; u min iħobb l-għana ma jixbax bil-qligħ. Dan ukoll frugħa” (Ekkleżjasti 5:10).
“Ikkuntenta b’dak li għandek,” tfisser li l-fidili jmisshom ipoġġu l-fiduċja u l-kunfidenza tagħhom f’Alla, għax jafu li hu d-Donatur ta’ kull ħaġa tajba (Ġakbu 1:17), u li hu juża anke ż-żminijiet iebsa biex tintwera l-ġenwinità tal-fidi tagħna, “allavolja hi ttestjata bin-nar – tinstab ġenwina u tirriżulta għat-tifħir u l-glorja u l-unur fir-rivelazzjoni ta’ Ġesù Kristu” (1 Pietru 1:7). Nafu b’ċertezza illi Alla se jieħu ħsieb jaħdem il-ħwejjeġ kollha għall-ġid ta’ dawk li jħobbuh (Rumani 8:28).
Meta tinkwieta ma tkunx qed tafda ’l Alla. Is-sigriet biex nirbħu fuq l-iskuntentizza tagħna u n-nuqqas ta’ fidi hu li niskopru min tassew hu Alla. Ħarsa fil-passat malajr turina kif minn dejjem kien fidil biex jipprovdi l-bżonnijiet kollha ta’ niesu. B’dan tiżdied il-kunfidenza tagħna u l-fiduċja għall-futur. L-appostlu Pietru fil-qosor qal hekk: “Umiljaw erwieħkom, mela, taħt l-id potenti t’Alla, sabiex jgħollikom fi żmien propizju. Waddbu l-ansjetà kollha tagħkom fuqu, għax hu jimportah minnkom” (1 Pietru 5:6–7).
English
X’tgħid il-Bibbja dwar il-kuntentizza?