Mistoqsija
Il-Kristjan jista’ jitlef is-salvazzjoni?
Tweġiba
L-ewwel nett, irridu niddefinixxu t-terminu Kristjan. “Il-Kristjan” mhuwiex xi ħadd li qal xi talba, jew xi darba ħa deċiżjoni, jew trabba f’familja Kristjani. Filwaqt li kull waħda minn dawn tista’ tkun parti mill-esperjenza Kristjana, fihom infushom dawn ma jagħmlux ’il xi ħadd Kristjan. Il-Kristjan hu persuna li emmen bis-sħiħ f’Ġesù Krisu bħala l-uniku Salvatur, u għaldaqstant għandu fih l-Ispirtu s-Santu (Ġwanni 3:16; Atti 16:31; Efesin 2:8–9).
Mela, b’din id-definizzjoni f’moħħna, jista’ Kristjan jitlef is-salvazzjoni? Din mistoqsija importanti u kruċjali. Forsi l-aħjar mod li nwiġbuha hu billi neżaminaw dak li l-Bibbja tgħid illi jiġri fis-salvazzjoni u nistudjaw x’inhu involut meta ngħidu li wieħed jitlef is-salvazzjoni.
Kristjan hu ħliqa ġdida. “Għalhekk, jekk xi ħadd hu fi Kristu, hu ħliqa ġdida; il-ħwejjeġ qodma għaddew; ara, saru ġodda” (2 Korintin 5:17). Il-Kristjan mhux sempliċement verżjoni “mtejba” ta’ persuna; il-Kristjan huwa ħliqa kompletament ġdida. Huwa xi ħadd “fi Kristu.” Biex il-Kristjan jitlef is-salvazzjoni, il-ħliqa ġdida trid tinqered.
Kristjan hu xi ħadd mifdi. “Billi tafu illi mhux bi ħwejjeġ korruttibbli – b’fidda jew b’deheb – kontu riskattati mill-manjiera ta’ ħajja futili tagħkom mgħoddija minn missirijietkom, iżda b’demm prezzjuż, bħal ta’ ħaruf bla difett u bla tebgħa, id-demm ta’ Kristu” (1 Pietru 1:18–19). Il-kelma riskattat tirreferi għal xiri li sar, għal prezz li tħallas. Inxtrajna bil-prezz tal-mewta ta’ Kristu. Biex Kristjan jitlef is-salvazzjoni tiegħu, Alla jkollu jirrevoka x-xirja li għamel tal-individwu li għalih kien ħallsa bid-demm prezzjuż ta’ Ibnu.
Kristjan hu xi ħadd iġġustifikat. “Mela, ladarba aħna ġustifikati bil-fidi, għandna s-sliem m’Alla permezz ta’ Sidna Ġesù Kristu” (Rumani 5:1). Li tiġġustifika jfisser li tiddikjara bħala ġust. Dawk kollha li jirievu lil Ġesù bħala s-Salvatur huma “dikjarati ġusti” minn Alla. Biex Kristjan jitlef is-salvazzjoni, Alla jrid jieħu lura Kelmtu u “jreġġa’ lura” dak li ddikjara qabel. Dawk li ġew meħlusa mill-ħtija ikollhom jerġgħu jiġu mixlija mill-ġdid u misjuba ħatja. Alla jkollu jirrevoka s-sentenza mogħtija mit-tribunal divin.
Il-Kristjan hu mwiegħed il-ħajja eterna. “Għax Alla hekk ħabb id-dinja, illi ta l-uniku Iben tiegħu, sabiex kull min jemmen fih ma jintilifx, iżda jkollu l-ħajja eterna” (John 3:16). Alla jwiegħed illi jekk temmen, ikollok il-ħajja ta’ dejjem. Biex Kristjan jitlef is-salvazzjoni, wieħed irid jiddefinixxi mill-ġdid il-ħajja eterna. Il-Kristjan hu mwiegħed li se jgħix għal dejjem. Allura eterna mhux “għal dejjem” tfisser?
Il-Kristjan hu xi ħadd immarkat minn Alla u ssiġillat mill-Ispirtu. “Fih intom ukoll, wara li smajtu l-kelma tal-verità, l-evanġelju tas-salvazzjoni tagħkom – malli wkoll emmintu kontu ssiġillati fih bl-Ispirtu s-Santu mwiegħed, li hu l-kapparra tal-wirt tagħna, sal-fidwa sħiħa tal-possediment t’Alla, għat-tifħir tal-glorja tiegħu” (Efsin 1:13–14). Fil-mument li jemmen, il-Kristjan ġdid huwa mmarklat u ssiġillat bl-Ispirtu, imwiegħed li se jaġixxi bħala kapparra li tiggarantixxi l-wirt smewwieti. Ir-riżultat finali hu li l-glorja t’Alla tingħata ġieħ. Biex Kristjan jitlef is-salvazzjoni, Alla jkollu jħassar dik il-marka, jirtira l-Ispirtu, jikkanċella l-kapparra, jikser il-wegħda tiegħu, jirrevoka l-garanzija, jitlef l-akkwist tiegħu, jirrinunzja l-ġieħ, u jnaqqas il-glorja tiegħu.
Il-Kristjan hu assigurat mill-glorifikazzjoni. “Lil min ippredestina, lil dawn ukoll sejjaħ; u ’l min sejjaħ, lil dawn ukoll iġġustifika; u ’l min iġġustifika, lil dawn ukoll igglorifika” (Rumani 8:30). Skont Rumani 5:1, il-ġustifikazzjoni hi tagħna appena nemmnu. Skont Rumani 8:30, il-glorifikazzjoni tiġi mal-ġustifikazzjoni. Dawk kollha li Alla ġġustifika huma mwiegħda li għad ikunu gglorifikati. Dil-wegħda titwettaq meta l-Kristjani jirċievu l-iġsma perfetti u gglorifikati fil-ġenna. Kieku l-Kristjan jista’ jitlef is-salvazzjoni, allura Rumani 8:30 żbaljata, għaliex Alla ma jkunx jista’ jiggarantixxi l-glorifikazzjoni li dawk kollha li predestina, sejjaħ, u ġġustifika.
Kristjan ma jistax jitlef is-salvazzjoni. Dak kollu li l-Bibbja tgħid li jiġrilna meta nirċievu ’l Kristu ikun invalidat kieku s-salvazzjoni tista’ tintilef. Is-salvazzjoni hi d-don t’Alla, u d-doni t’Alla huma “irrevokabbli” (Rumani 11:29). Kristjan ma jistax ma jkunx ħolqien ġdid. Il-prezz tal-fidwa ma jistax jittieħed lura. Il-ħajja eterna ma tistax tkun temporanja. Alla ma jistax imur lura minn Kelmtu. L-Iskrittura tgħid li Alla ma jigdibx (Titu 1:2).
Żewġ oġġezzjonijiet kontra t-twemmin li Kristjan ma jistax jitlef is-salvazzjoni huma kwestjonijiet sperimentali: 1) Xi ngħidu għal dawk il-Kristjani li jgħixu ħajja ta’ dnub, u stil ta’ ħajja bla ndiema? 2) Xi ngħidu dwar dawk il-Kristjani li jwarrbu l-fidi u jiċħdu ’l Kristu? Il-problema b’dawn l-oġġezzjonijiet hi l-assunzjoni li dawk kollha li jsejħu lilhom infushom “Kristjani” attwalment huma mwielda mill-ġdid. Il-Bibbja tiddikjara li Kristjan ġenwin ma jgħixx fi stat ta’ dnub kontinwu, u mingħajr indiema (1 Ġwanni 3:6). Il-Bibbja tgħid ukoll li xi ħadd li jabbanduna l-fidi qed juri biċ-ċar li fil-fatt qatt ma kien Kristjan (1 Ġwanni 2:19). Abbli kien reliġjuż, abbli għamel xow tajjeb, però qatt ma kien imwieled mill-qawwa t’Alla. “Mill-frott tagħhom tagħrfuhom” (Mattew 7:16). Il-mifdija t’Alla huma ta’ Kristu, l-irxoxtat mill-imwiet, “sabiex nipproduċu l-frott għal Alla” (Rumani 7:4).
M'hemm xejn li jista’ jifred wild t’Alla mill-imħabba tal-Missier (Rumani 8:38–39). Xejn mhu se jaħtaf lill-Kristjan minn id Alla (Ġwanni 10:28–29). Alla jiggarantixxi l-ħajja eterna u jżomm is-salvazzjoni li tana. Ir-Ragħaj it-Tajjeb ifittex in-nagħġa l-mitlufa, u, “meta jsibha, iqegħidha fuq spallejh ferħan, u jmur lejn id-dar” (Luqa 15:5–6). In-nagħġa mitlufa nstabet, ir-Ragħaj iġorrha bil-ferħ; Sidna jieħu r-responsabbiltà kollha jwassalha lura d-dar qawwija u sħiħa.
Ġuda 1:24–25 ikompli jenfasizzalna t-tjubija u l-fedeltà tas-Salvatur tagħna: “Issa ’l dak li kapaċi jgħassiskom milli togħtru, u jippreżentakom bla difett fil-preżenza glorjuża tiegħu b’eżultanza, lill-uniku Alla Salvatur tagħna, permezz ta’ Ġesù Kristu Sidna, tkun il-glorja, il-maestà, il-qawwa u l-awtorità, qabel iż-żmien kollu, u issa u għal dejjem. Ammen.”
English
Il-Kristjan jista’ jitlef is-salvazzjoni?