Mistoqsija
Il-Kristjani għandhom jiġġudikaw it-tagħlim tal-għalliema tagħhom?
Tweġiba
Bħala Kristjani, aħna kmandati: “ittestjaw kollox; żommu sħiħ mat-tajjeb” (1 Tessalonkin 5:21), u mhux nimxu wara l-għalliema b’għajnejna magħluqin. Fit-2 Pietru 2:1-3 l-appostlu Pietru jgħidilna li fi żmienna għad jiġu għalliema foloz l-istess bħalma kien hemm fi żmienu. Fost it-tagħlim falz tagħhom insibu ċ-ċaħda tas-suffiċjenza tas-sagrifiċċju ta’ Kristu fuq is-salib biex ineħħi d-dnub, tema komuni fost is-setet tal-lum. Karatteristika komuni oħra tal-għalliema foloz hi r-regħba li timmotivahom f’kulma jagħmlu. Pawlu jagħti twissija simili lill-presbiteri ta’ Efesu fl-Atti 20:29-31, u l-għalliema foloz isejħilhom “ilpup feroċi” li jipprovaw ikissru l-fidi tal-merħla u jiġbduhom ’il bogħod mir-Ragħaj. Pawlu wissa kontinwament lill-knisja. Talabhom bil-ħerqa lejl u nhar biex jgħassu kontra għalliema qarrieqa bħal dawn.
Minn dawn il-passaġġi nistgħu naraw biċ-ċar illi jeħtieġ niddistingwu bejn l-għalliema veri u dawk foloz. Kif se nagħmlu dan? L-ewwel, Pawlu struwixxa lill-Efesin; “sabiex ma nkunux iżjed infantili, imwaddbin ’l hawn u ’l hinn mill-imwieġ, u mġorrijin minn kull riħ ta’ dottrina, bil-brikkunaġni tal-bnedmin, bil-malizzja tagħhom fl-ittrikkjar seduċenti” (Efesin 4:14). Aktarx, wieħed imissu jirsisti biex ikun “raġel komplut, għall-kejl tal-istatura li tappartieni għall-milja tal-Kristu.” Dan nagħmluh “bit-tagħrif ta’ Bin Alla” (v. 13). L-għarfien ta’ Kristu nottienuh biss permezz tal-Kelma t’Alla, u hi permezz ta’ dik l-istess Kelma li jirnexxielna niddistingwu bejn il-veru u l-falz.
F’Mattew 7:15-20, Ġesù joffri parir kritiku li jgħinna niddixxernu min tabilħaqq hu profeta falz: “Oqogħdu attenti mill-profeti foloz, li jiġu għandkom fi lbies in-nagħaġ, imma minn ġewwa huma lpup ħattafin. Mill-frott tagħhom tagħrfuhom. Jaqaw in-nies jiġbru l-għeneb mix-xewk, jew it-tin mill-għolliq? Hekk, kull siġra tajba tagħmel frott tajjeb, imma s-siġra mħassra tagħmel frott ħażin. Ma tistax siġra tajba tagħmel frott ħażin, lanqas siġra mħassra ma tista’ tagħmel frott tajjeb. Kull siġra li ma tagħmilx frott tajjeb tinqata’ u tinxteħet fin-nar. Hekk, immela, mill-frott tagħhom tagħrfuhom.” Fi kliem sempliċi, il-ħajja tal-predikatur hi mmarkata b’xebħ mal-immaġni ta’ Kristu? L-għalliem qed juri l-frott tal-Ispirtu? Hekk kif is-siġar tajbin biss jipproduċu frott tajjeb, bl-istess mod l-għalliema tajba biss jevidenzjaw il-frott tal-Ispirtu – l-imħabba, il-ferħ, is-sliem, il-paċenzja, il-benevolenza, it-tjieba, il-fedeltà, il-manswetudini u l-awtokontroll (Galatin 5:22-23). Għall-kuntrarju, il-profeti u l-għalliema foloz juru l-atti tan-natura midinba tagħhom (Galatin 5:19-21). Minn dan il-frott nagħrfu l-għalliema veri minn dawk foloz.
It-tieni, it-tagħlim ippreżentat jaqbel mal-messaġġ ipproklamat mill-knisja bikrija u mill-appostli? Pawlu jikteb hekk lill-knisja fil-Galazja; “Niskanta illi hekk malajr qed tabbandunaw lil dak li sejħilkom bil-grazzja ta’ Kristu u dduru għal evanġelju differenti – li fir-realtà mhu evanġelju ieħor xejn; biss evidentement hemm xi wħud li qegħdin jiddisturbawkom, u jridu jgħawġu l-evanġelju tal-Kristu. Iżda mqar jekk aħna jew anġlu mis-sema jxandrilkom evanġelju kuntrarju għal dak li xandarnielkom, ħa jkun misħut. Bħalma għidna qabel, nerġa’ ngħid anke issa: jekk xi ħadd qed ixandrilkom evanġelju kuntrarju għal dak li rċevejtu, ħa jkun misħut.” Pawlu kellu kliem iebes għall-għalliema foloz, però huma stess qed jaħżnu għalihom infushom il-qirda eterna fil-jum tal-korla t’Alla (Galatin 1:6-9).
Fl-ewwel epistola tiegħu l-appostlu Ġwanni jgħidilna kif nagħrfu dawk l-ispirti li huma minn Alla. “Maħbubin, temmnux kull spirtu, iżda ttestjaw l-ispirti biex taraw jekk humiex minn Alla, għax ħafna profeti foloz ħarġu fid-dinja. B’dan tagħrfu l-Ispirtu t’Alla: kull spirtu li jistqarr illi Ġesù Kristu ġie fil-laħam hu minn Alla; imma kull spirtu li ma jistqarrx lil Ġesù mhuwiex minn Alla; infatti dan hu l-ispirtu tal-antikrist, li smajtu illi ġej, u issa hu diġà fid-dinja. Intom minn Alla, tfal ċkejknin, u għelibtuhom, għax ikbar min hu fikom milli min hu fid-dinja. Huma mid-dinja; minħabba f’hekk jitkellmu mid-dinja, u d-dinja tismagħhom. Aħna minn Alla; min jaf ’l Alla jisma’ lilna; dak li mhuwiex minn Alla ma jismagħniex. Minn dan nagħrfu l-Ispirtu tal-verità u l-ispirtu tal-errur” (1 Ġwanni 4:1-6).
Huwa importantissmu li bħala Kristjani jkollna għeruqna fl-Iskritturi, sabiex inkunu kapaċi niddixxernu bejn dawk l-għalliema li jitkellmu minn Alla u dawk li fil-proklamazzjoni tagħhom huma foloz. Hekk biss jirnexxilna niċħdu dak li hu falz u “nżommu sħiħ mat-tajjeb” (1 Tessalonkin 5:21).
English
Il-Kristjani għandhom jiġġudikaw it-tagħlim tal-għalliema tagħhom?