Mistoqsija
Xi tfisser li Alla ma jixtieqx li xi wħud jintilfu, iżda li kulħadd jiġi għall-indiema?
Tweġiba
Dejjem importanti illi nistudjaw vrus mill-Bibbja fil-kuntest tagħhom. Dan jgħodd b’mod speċjali għat-2 Pietru 3:9, li jgħid, “Is-Sid ma jiddewwimx dwar it-twettiq tal-wegħda tiegħu, bħalma xi wħud jikkonsidraw id-dewmien, iżda hu paċenzjuż magħkom, billi ma jixtieqx li xi wħud jintilfu, iżda li kulħadd jiġi għall-indiema.” It-tieni parti tal-vers, “Ma jixtieqx li xi wħud jintilfu, iżda li kulħadd jiġi għall-indiema,” spiss hu kkwotat biex isir argument kontra d-dottrina tal-għażla u l-ħatra sovrana t’Alla.
Il-kuntest tat-2 Pietru 3:9 jagħtina deskrizzjoni ta’ dawk iż-żeblieħa li jiddubitaw li Ġesù għad jerġa’ jiġi biex jiġġudika d-dinja bin-nar (2 Pietru 3:3–7). Iż-żeblieħa jitmellħu, “Fejn hi l-wegħda tal-miġja tiegħu?” (vers 4). F’versi 5 u 6, Pietru jfakkar lill-qarrejja li fil-passat, fi żmien Noè, Alla qered id-dinja bid-dulluvju. F’vers 7, jinformana li s-smewwiet u l-art preżenti għad jinqerdu bin-nar. Imbagħad, Pietru jwieġeb mistoqsija li kien jaf illi se jistaqsu l-qarreja: “Kemm se jiddewwem Alla?” F’vers 8, jgħid lill-qarrejja li Alla hu ’l fuq u lil hinn mill-kunċett ta’ żmien. Abbli jidher qisu li ilna żmien twil nistennew, però, għal Alla, kienet biss teptipa tal-għajn. Imbagħad, f’vers 9 jispjega r-raġuni għala Alla dam daqshekk (kif narawha aħna). Hija l-ħniena t’Alla li tittardja l-ġudizzju tiegħu. Alla qed jistenna biex jagħti l-opportunità lin-nies biex jindmu. Imbagħad, fil-vers ta’ wara, Pietru jħeġġeġ lill-qarrejja sabiex jgħixu ħajja qaddisa b’antiċipazzjoni tal-fatt li xi darba Ġesù se jerġa’ jiġi.
Il-kuntest tat-2 Pietru 3:9 juri kif Alla qed itawwal il-miġja tiegħu sabiex ikompli jagħti lill-bnedmin aktar opportunitajiet biex jindmu. Ftit mill-konfużjoni li għandha x’taqsam mat-tifsira tat-2 Pietru 3:9 ġej minħabba t-traduzzjoni tal-Verżjoni Awtorizzata: “ma jridx li xi wħud jintilfu.” Ma jridx tinstema’ qisu Alla mhux se jħalli lil xi wħud jintilfu. Verżjonijiet oħra wkoll ttraduċew dal-vers b’dan il-mod skorrett.
It-2 Pietru 3:9 b’ebda mod ma jikkontradixxi l-idea li Alla jaħtar nies għas-salvazzjoni. L-ewwel, fil-kuntest, il-vers mhuwiex jitkellem dwar l-għażla t’Alla. It-tieni, jekk ninterpretaw “ma jixtieqx li xi wħud jintilfu” bħala “ma jħallix lil xi wħud jintilfu” nispiċċaw bid-dottrina falza tal-universaliżmu. Però Alla jista’ “ma jixtieqx” li xi wħud jintilfu u li l-maħturin biss jaslu għas-salvazzjoni. M’hemm xejn barra minn postu f’dan. Alla ma xtaqx li d-dnub jidħol fid-dinja permezz tad-dnub t’Adam u Eva, madankollu ppermettih. Fil-fatt, kien parti mill-pjan sovran tiegħu. Alla ma xtaqx li l-uniku Iben tiegħu jiġi ttradut, ikun ittorturat brutalment, u jinqatel, madanakollu ppermettih. Dan ukoll kien parti mill-pjan sovran t’Alla.
Bl-istess mod, Alla ma jixtieqx li xi wħud jintilfu. Jixtieq li kulħadd jasal għall-indiema. Fl-istess waqt, Alla jaf li mhux kulħadd se jindem. M’hemmx dubju li xi wħud se jintilfu (Mattew 7:13–14). Aktarx milli kontradizzjoni tat-2 Pietru 3:9, il-fatt li Alla jaħtar lil xi wħud u jiġbidhom lejn is-salvazzjoni hi evidenza li tabilħaqq ma jixtieqx li niesu jintilfu. Li kieku mhux għall-ħatra t’Alla u s-sejħa effikaċi tiegħu, il-bnedmin kollha jintilfu (Ġwanni 6:44; Rumani 8:29–30).
English
Xi tfisser li Alla ma jixtieqx li xi wħud jintilfu, iżda li kulħadd jiġi għall-indiema?