settings icon
share icon
Question

Ai mes ja ma fe en Jèsus... e ara qué?

Responsa


Òsca! Avètz pres una decision determinanta! Benlèu vos demandatz, “E ara qué fau? Cossí comenci mon viatge amb Dieu?” Los cinc passes citats çai-jos vos porgiràn una orientacion de la Bíblia. Quand auretz de questions sus vòstre viatge, per plaser anatz visitar www.GotQuestions.org/Occitan.

1. Asseguratz-vos de comprendre lo salut.

1 Joan 5:13 nos ditz, “Vos escrivi aquestas causas a vos que cresètz dins lo nom del Filh de Dieu perque poscatz saber qu’avètz la vida etèrna". Dieu vòl que comprengam lo salut. Dieu vòl qu’ajam fisança en saber de segur que sèm salvats. Brèvament, anam tornar veire los ponches clau del salut:

(a) Totes avèm pecat. Avèm fach totes de causas desplasentas per Dieu (Romans 3:23).

(b) A causa de nòstre pecat, nos meritam d’èsser castigats amb la separacion etèrna de Dieu (Romans 6:23).

(c) Jèsus moriguèt sus la crotz per pagar la pena per nòstres pecats (Romans 5:8; 2 Corintians 5:21). Jèsus moriguèt per nosautres, en recebre la punicion que meritam. La resurreccion demostrèt que la mòrt de Jèsus foguèt sufisenta per pagar nòstres pecats.

(d) Dieu autreja perdon e salut a totes aqueles que plaçan sa fe en Jèsus – en far fisança a Sa mòrt coma pagament de nòstres pecats (Joan 3:16; Romans 5:1; Romans 8:1).

Es aqueste lo messatge del salut! S’avètz plaçat vòstra fe en Jèsus Crist coma vòstre Salvaire, sètz salvats! Totes vòstres pecats son perdonats e Dieu promet que pas jamai non vos laissarà ne vos traïrà (Romans 8:38-39; Matieu 28:20). Remembratz, vòstre salut es segur amb Jèsus Crist (Joan 10:28-29). Se fasètz fisança sonque en Jèsus coma vòstre Salvaire, podètz èsser segurs que demoraretz etèrnament amb Dieu dins lo cèl!

2. Trobatz una bona glèisa qu’ensenhe la Bíblia.

Vos cal pas pensar a la glèisa coma un edifici. La glèisa es las gents. Es plan important que los que creson en Jèsus Crist se pòscan reunir e ajudar entre Eles. Es aqueste un dels objectius principals de la glèisa. Ara qu’avètz ja plaçat vòstra fe en Jèsus Crist, vos encoratjam a trobar una glèisa que crega en la Bíblia de vòstre airal e a parlar amb lo pastor. Li cal far saber vòstra fe novèla en Jèsus Crist.

Un segond objectiu de la glèisa es d’ensenhar la Bíblia. Podètz aprendre a aplicar los conselhs de Dieu dins vòstra vida. Comprendre la Bíblia es la clau per viure una vida crestiana potenta e satisfasenta. 2 Timotèu 3:16-17 ditz, “Tota l'Escritura es inspirada per Dieu e utila per ensenhar, refutar, corregir e educar dins lo ben, perque lo qu’es òme de Dieu arribe a la maturitat e siá de contunh preparat per tota òbra bona.”

Un tresen objectiu de la glèisa es lo culte. Lo culte es mercejar Dieu per tot çò qu’a fach! Dieu nos a salvat. Dieu nos aima. Dieu nos ajuda. Dieu nos orienta e nos dirigís. Cossí podriam li donar pas nòstra reconeissença? Dieu es sant, plen de bondat, aimant, misericordiós, e plen de gràcia. Revelacion 4:11 declara, “Sès digne, nòstre Sénher Dieu, de recebre la glòria, l'onor e lo poder, perque as creat tot l'univèrs. Quand res existissiá pas, volguères que tot foguèsse creat”.

3. Servatz de temps cada jorn per lo consacrar a Dieu.

Es plan important que cada jorn consacrem de temps a Dieu. Qualques personas sonan aquò “temps de calma”. D’autres o sonan “devocion”, qu’es un moment pendent lo que nos consacram a Dieu. D’unes s’estiman mai de lo donar de temps de matin, e d’autres preferisson los vèspres. Es pas gaire important lo nom o lo moment qu’o fasètz. Çò qu’es important es de passar de temps regularament amb Dieu. Quines faches fan part de nòstre moment amb Dieu?

(a) Preguièras. Pregar es simplament parlar a Dieu. Parlatz a Dieu de vòstras inquietuds e problèmas. Demandatz a Dieu que vos done de saviesa e d’orientacion. Demandatz a Dieu que satisfaga vòstras necessitats. Digatz a Dieu cossí L'aimatz e cossí apreciatz tot çò que fa per vos. En aquò consistisson las preguièras.

(b) Legir la Bíblia. A mai d'aprendre la Bíblia a la glèisa, l’Escòla del Dimenge, e/o los estudis biblics – vos cal legir la Bíblia vosautres meteisses. La Bíblia conten tot çò que vos cal per viure una vida crestiana capitada. Conten totes los conselhs de Dieu sus cossí prendre de decisions importantas, cossí conéisser la volontat de Dieu, cossí ajudar los autres, e cossí créisser esperitalament. La Bíblia es la Paraula de Dieu per nosautres. La Bíblia es essencialament un manual d’instruccions sus Dieu, sus cossí viure nòstras vidas d'un biais agradiu per El e satisfactòri per nosautres.

4. Vos cal aver de relacions amb de gents que vos pòscan ajudar esperitalament.

1 Corintians 15:33 nos ditz: "Vos enganetz pas: ‘La marrida companhiá corromp lo bon caractèr.’” La Bíblia es cafida d'avertiments sus l’influéncia que las “marridas” gents pòdon aver sus nosautres. Consacrar de temps a aquelas personas que s'impliquen dins d’activitats pecadoiras nos causarà de temptacions cap a aquelas activitats. Lo caractèr d’aqueles que nos enviran nos afècta nosautres. Es per aquò qu”es tant important de nos envirar de personas qu’aimen lo Senhor e que son compromeses amb El.

Ensajatz de trobar un amic o dos, benlèu de vòstra glèisa, que vos pòscan ajudar e vos encoratjar (Ebrèus 3:13; 10:24). Demandatz a vòstres amics que vos fagan responsable de cap a vòstre temps liure, vòstras activitats, e vòstre camin amb Dieu. Demandatz se podètz far çò meteis per Eles. Aquò significa pas que vos calga laissar de caire totes vòstres amics que coneisson pas lo Sénher Jèsus coma lor Salvaire. Vos cal contunhar d’èsser lor amic e aimatz-los. Sonque los cal assabentar que Jèsus a cambiat vòstra vida e que podètz pas far tot çò que fasiatz abans. Demandatz a Dieu que vos done d’escasenças de partetjar Jèsus amb vòstres amics.

5. Batejatz-vos.

Fòrça gents comprenon pas coma cal lo bateg. Lo mot “batejar" vòl dire submergir dins l’aiga. Lo bateg es lo biais biblic de proclamar publicament vòstra fe novèla dins lo Crist e vòstre compromés de Lo seguir. L’accion de se submergir dins l’aiga illustra lo fach d’èsser enterrat amb lo Crist. L’accion de sortir de l’aiga illustra la resurreccion de Crist. Èsser batejat es s’identificar amb la mòrt de Jèsus, l’enterrament, e la resurreccion (Romans 6:3-4).

Lo bateg es pas çò que vos salvarà. Lo bateg empòrta pas vòstres pecats. Lo bateg es simplament un pas cap a l’obediéncia, la proclamacion publica de vòstra fe en Crist per lo salut. Lo bateg es important qu’es un pas d’obediència – declarar publicament sa fe en Crist e vòstre compromés amb El. Se sètz preparat per èsser batejat, ne deuriatz parlar amb un pastor.

English



Tornar a la pagina de debuta de l’occitan

Ai mes ja ma fe en Jèsus... e ara qué?
© Copyright Got Questions Ministries