Question
Existís Dieu? Existisson de pròvas de l’existéncia de Dieu?
Responsa
Existís Dieu? Me sembla interessant que se consacre tant d’atencion sus aqueste debat. Las darrièras enquestas nos dison que mai de 90% dels abitants del mond entièr creson actualament a l’existéncia de Dieu o d’un poder superior. Pasmens, d’un cèrt biais an mai d’importància los que creson que Dieu existís pas, al moment de demostrar s’existís a debon. Pensi que deuriá èsser lo contrari.
Pr’aquò, l’existéncia de Dieu non se pòt demostrar ni desmentir. La Bíblia nos ditz a mai que nos cal acceptar amb fe lo fach que Dieu existís “Pasmens, sens la fe es impossible de li èsser agradiu, que lo que se sarra de Dieu deu creire qu’existís e que recompensa los que lo cèrcan” (Ebrèus 11:6). Se Dieu o volguèsse, apareisseriá e demostrariá a tot lo mond qu’existís. Pr’aquò s’o faguèsse, nos caldriá pas aver cap de fe. "Alara Jèsus li diguèt ‘Perque m'as vist, i as cregut; benesits sián aqueles qu’an pas vist mas que i an cregut” (Joan 20:29).
Aquò vòl pas dire, pasmens, qu’existisca pas cap de pròva de l’existéncia de Dieu. La Bíblia declara “Lo cèl parla de la glòria de Dieu, l'estelada anóncia çò qu’an fach las siás mans. Los jorns, l'un a l'autre se transmeton lo messatge, l'una a l'autra se lo revèlan las nuèches” (Psalm 19:1-4). En agachar las estelas, en compréner la vastitud de l'univèrs, en observar las meravilhas de la natura, en veire la beltat d'un colcar de solelh - totas aquestas causas indican un Dieu Creador. Se tot aquò non foguèsse pro, tanben i a una pròva de Dieu dins nòstres còrs. Coelèt 3:11 nos ditz “…a donat tanben a l'òme lo sens del passat e del futur…” I a quicòm plan endedins de nosautres que reconeis qu’existís quicòm al delà d'aquesta vida e qualqu’un mai enlà d'aqueste mond. Podèm negar aquesta coneissença intellectualament, pasmens la preséncia de Dieu en nosautres e a travèrs nosautres es encara aquí. Malgrat tot aquò, la Bíblia nos assabenta que d’unes encara contunharàn de negar l’existéncia de Dieu “Pensan entre eles los dessenats: ‘Dieu es pas res.’”. (Psalm 14:1). Vist que mai de 98% de las gents a travèrs l’istòria, dins totas las culturas, dins totas las civilizacions, dins totes los continents creson a l'existéncia de qualque mena de Dieu - i deu aver quicòm (o qualqu’un) que siá causa d’aquesta cresença.
A mai dels arguments biblics sus l’existéncia de Dieu, i a d’arguments logics. Bèl primièr, i a l’argument ontologic. La forma mai populara de l’argument ontologic emplega essencialament lo concèpte de Dieu per demostrar l’existéncia de Déu. Comença amb la definicion de Dieu coma “çò que se pòt pas concebre de mai grand.” Alara se ditz qu’existir es mai grand qu’existir pas, e doncas l’èsser mai grand que se pòsca concebre deu existir. Se Dieu existís pas, alara Dieu non seriá pas l'èsser mai grand que se pòsca concebre – pasmens aquò contradiriá la quita definicion de Dieu. Ven puèi l’argument teologic. L’argument teologic es aquel que ditz que coma l'univèrs nos mòstra una concepcion tant impressionanta, cal qu’aja existit un creador Divenc. Per exemple, se la tèrra foguèsse sonque qualques quilomètres mai pròcha o mai alunhada del solelh, seriá pas possibla la granda majoritat de la vida que conten actualament. Se los elements de l’atmosfèra nòstra foguèssen diferents dins sonque qualques feblas diferéncias dins los percentatges, cada èsser vivent de la tèrra moririá. La possibilitat que se forme una sola molecula de proteïna es d'1 sus 10243 (es a dire, un 10 seguit de 243 zèros). Una sola cellula conten de milions de moleculas de proteïnas.
Un tresen argument logic de cap a l'existéncia de Dieu se sona argument cosmologic. Cada efièch deu aver una causa. L’univèrs e tot çò que conten es un efièch. Cal que i aja quicòm que causèsse l’existéncia de tot. En darrièr recors, i deu aver quicòm de “pas causat” que pòsca aver causat l'existéncia de tot çò demai. Aqueste quicomet de “pas causat” es Dieu. Un quatren argument es conegut jol nom d'argument moral. A travèrs l’istòria, cada cultura a agut qualque mena de lei. Totes an una nocion del ben e del mal. Assassinar, mentir, raubar, e l’immoralitat son rebutats gaireben universalament. D’ont es vengut aqueste sens del ben e del mal senon d’un Dieu sagrat?
Malgrat aquò, nos explica la Bíblia que las gents rebutaràn aquesta coneissença clara e innegabla de Dieu e se pensarà qu’es una messorga. Dins los Romans 1:25 se declara “An bescambiat la vertat de Dieu per de messorgas, en venerar e adorar las creaturas en luòga del Creador. Que siá el benesit sègles e sègles. Amén”. La Bíblia proclama a mai que las gents an pas cap d’excusa per creire pas en Dieu “Que tre la creacion del mond, las qualitats invisiblas de Dieu – Son poder etèrn e Sa natura divina – son estats vistes clarament, a partir de çò qu’es estat fach, per aquò los òmes an pas cap d’excusa” (Romans 1:20).
Las gents confessan que creson pas en Dieu qu’es pas quicòm de “scientific” o “perque existís pas cap de pròva”. La rason vertadièra es qu’un còp que las gents admeton que i a un Dieu, s’avisan a l’encòp que devon èsser responsables davant Dieu e qu’an besonh del Sieu perdon (Romans 3:23; 6:23). Se Dieu existís, alara sèm responsables de nòstras accions davant El. Se Dieu existís pas, alara podèm far çò que volèm sens besonh de nos preocupar de se Dieu nos jutjarà. Albiri qu”es per aquò que l'evolucion es tant fòrtament enrasigada dins fòrça personas de nòstra societat – pr’amor de donar a las gents una alternativa a la de creire a un Dieu Creador. Dieu existís e fin finala sabon totes que El existís. Lo quite fach que d’unes ensagen de desmentir tant agressivament Son existéncia es en realitat un argument en favor de Son existéncia.
Permetatz-me de presentar un darrièr argument per demostrar l'existéncia de Dieu. Cossí pòdi saber se Dieu existís? Sabi que Dieu existís que li parli cada jorn. Ausissi pas coma me respond dins las aurelhas, pr’aquò sentissi la Siá preséncia, sentissi la Siá orientacion, coneissi l’amor Sieu, desiri la Siá gràcia. I a de causas que me son arribadas dins la vida qu’an pas cap d’explicacion possibla se foguèsse pas per Dieu. Dieu a salvat e canbiat d’un biais tant miraculós ma vida que çò mens que pòdi far es mostra ma reconeissença e pregar per la Siá existéncia. Cap d’aquestes arguments solets ni totes amassa pòdon pas convéncer degun que vòlga pas reconéisser çò qu’es tant clar. Fin finala, l’existéncia de Dieu se deu acceptar per fe (Ebrèus 11:6). La fe en Dieu es pas un saut cap a la foscor, es un pas segur cap a un espaci de lum ont nos i espèra, ja 90% de totes nosautres.
English
Existís Dieu? Existisson de pròvas de l’existéncia de Dieu?