settings icon
share icon
Fesili

O le a le uiga o le taliaina o Iesu e avea ma ou Faaola?

Tali


Po ua e talia ea Iesu Keriso e fai ma ou Faaola? Ae le'i talia lea fesili, se'i ou faapupula atili ia te oe lona uiga moni. E tatau ona muamua e malamalama i uiga o upu nei: "Iesu Keriso", "mo oe", "Faaola".

O ai Iesu Keriso? E tele tagata ua manatu o Iesu Keriso o se tagata lelei, o se aoao sili, po'o se perofeta foi a le Atua. E moni nei manatu, ae e le pau lea. O loo molimau mai le Tusi Paia, o Iesu o le Atua lava Ia ua liu tino tagata (faitau le Ioane 1:1,14). Na maliu mai le Atua i le lalolagi Na te a'oa'o i tatou, faamalolo, faatonu, faamagalo -- ma maliu mo i tatou! O Iesu Keriso o le Atua, O Le na fausia mea uma, o Ia o le Alii silisili. Ua e taliaina ea Iesu?

O le a lea Faaola ae aisea foi ua tatou mana'omia ai se Faaola? Fai mai le Tusi Paia ua agasala ma fai amio leaga i tatou uma(Roma 3:10-18). O lea ua tatau ai mo i tatou le toasa o le Atua ma Lana faamasinoga. Ua nofosala i tatou e faavavau ina ua tatou faasagatau i le Atua o le faavavau (Roma 6:23; Revelation 20:11-15). O le mafua'aga lea ua tatou mana'omia ai se Faaola!

Na afio mai Iesu Keriso i le lalolagi e maliu e sui a'i i tatou. O le maliu o Iesu, o Ia o le Atua ua liu tino tagata, ua togiolaina ai i tatou e faavavau mai le agasala (2 Korinito 5:21). Ua totogiina e Iesu le tau o a tatou agasala (Roma 5:8). Ua faia lea ma ala ua le toe nofosala ai i tatou. O Lona toe tu mai nai e ua oti e faamaonia ai, ua lava ma totoe le taulaga na osia e Iesu e togiola a'i i tatou. O lea ua ala ai ona ta'ua Iesu o le Faaola lava Ia e toatasi (Ioane 14:6; Galuega 4:12)! Po ua e talitonu ea o Iesu o lou Faaola?

Ua e avea ea Iesu e fai ma ou Faaola? E tele tagata e manatu o le olaga Kerisiano o le to'aga lea i le lotu, o le faia o mea uma a le Ekalesia, ma le le faia o nai isi agasala. E leai. O le olaga Kerisiano moni o le iai lea o sau mafutaga va lalata ma Iesu Keriso. O le tuuina atu foi lea o lou faatuatua ma lou talitonuga atoa ia Iesu ma talia o Ia e fai ma ou Faaola. E le faaolaina oe i le faatuatua o le isi tagata. E le ona o galuega lelei foi e faamagaloina ai i tatou. E tasi lava le ala i le faaolataga, ua na o le talia lea o Iesu e fai ma faaola, talitonu i Lona maliu e togiola ai oe mai le agasala, atoa ma Lona toe tu ua maua ai e oe le ola e faavavau (Ioane 3:16). Ua e avea ea la Iesu e fai ma ou Faaola?

Afai ua e mana'o e talia nei Iesu Keriso e fai ma Faaola, faata'ita'i upu nei e te ta'utino ai i le Atua. Manatua, e le faaolaina oe i se tatalo. Ua na o lou talitonu ia Keriso e faaolaina ai oe mai au agasala. O se tatalo faigofie lea e te faamatala atu ai i le Atua lou faatuatua ia te Ia atoa ma lau faafetai ona o le faaolataga ua Ia saunia. "Le Atua e, ua ou iloa ua ou agasala ia te Oe ma ua tatau ia te a'u le faasalaga o le oti. A ua maliu Iesu Keriso ma ua nofosala o Ia ina ia ou magalo ai. Ua ou fulitua nei i le agasala ae talitonu ia te Oe mo lo'u faaolataga. Ua ou talia Iesu e fai ma o'u Faaola! Faafetai tele mo Lou alofa tunoa matagofie ma Lou faamagaloina o a'u -- o le meaalofa lea o le ola e faavavau! Amene!

Ua fai sau filifiliga ma'oti mo Keriso ina ua e faitau malamalama i itulau nei? Afai o lea, asiasi i le "Ua ou talia Iesu i le Aso lenei" o loo iai i lalo.

English



Toe taga'i i le itulau ua faaliliuina i le gagana Samoa

O le a le uiga o le taliaina o Iesu e avea ma ou Faaola?
© Copyright Got Questions Ministries