Fesili
O a tonu fuafuaga o le faaolataga?
Tali
O e galala ea i le fia taumafa? E le o se galala faaletino, a o se galala ona ua e mana'omia se isi tulaga e sili atu o lenei olaga? O iai ea se mafatiaga lilo i le taele o lou loto e le mafai ona faamalieina? Afai o lea, ua na o Iesu lava le Ala! Ua fetalai Iesu, "O a'u nei le areto o le ola. O le sau ia te A'u, e le laina lava ia; o le faatuatua foi ia te A'u, e le toe fia inu lava ia" (Ioane 6:35).
O a ni tulaga ua fevesia'i ai lou mafaufau? O e sailiili pea, ae ua e le maua se ala e taunuu i se olaga mautu ma le fiafia? E foliga ea ua tapeina e se tasi le moli ma ua pogisa atoa lou si'omaga, ua e le iloa atu sina malamalama? Afai o lea, o Iesu lava o le Ala! Ua fetalai Iesu, "O a'u nei o le malamalama o le lalolagi; o le mulimuli mai ia te a'u, e le savali o ia i le pouliuli, a e ia te ia le malamalama o le ola" (Ioane 8:12).
E foliga ea o loo e tu i fafo atu o lou olaga ma ua loka le faitotoa ua le mafai ona e ulufale i totonu? Sa e tatalaina ea ni faitotoa se tele ae ua le maua ai lava se mea e aoga mo oe? O e sailia pea se ala e te ulufale atu ai i se olaga ua faatumulia? Afai o lea, o Iesu lava o le Ala! Ua fetalai Iesu, "O a'u nei o le faitotoa; afai e ui mai se tasi ia te a'u, e faaolaina ia, e alu atu ma ulu fafo, e maua foi e ia le mea e 'ai" (Ioane 10:9).
O iai ni tagata o loo vaai faatauvaa ia te oe? O iai ni faaletonu i le va o oe ma niisi tagata? O faatogafitiina oe e niisi i ni uiga le manuia? Afai o lea, o Iesu lava o le ala! Ua fetalai Iesu, "O a'u le leoleo mamoe lelei; e tuu atu e le leoleo mamoe lelei o lona ola e sui a'i mamoe" (Ioane 10:11, 14).
O e manatunatu ea i le tulaga e o'o ia te oe pe a mavae atu lenei olaga? Ua e fiu ea e ola i lenei olaga ua na ona tumu i mea e pala ma le elea? Pe mata ua e manatunatu pe iai se mea o lenei olaga e sili atu nai lo mea ua oo ia te oe? E te fia maua ea le ola pe 'a mavae atu lenei olaga? Afai o lea, O Keriso lava o le Ala! Ua fetalai Iesu, "O a'u nei o le toe tu ma le ola; o le faatuatua mai ia te a'u, e ui lava ina oti, a e ola lava ia. O tagata ola uma e faatuatua mai ia te a'u, e le oti lava e oo i le faavavau; po ua e talitonu mai ea i lena mea?" (Ioane 11:25, 26).
O le a le ala? O le a foi le upu moni? A o le a foi le ola? Ua tali Iesu e faapea, "O a'u nei le ala, ma le upu moni, ma le ola; e le alu atu lava se tasi i le Tama, pe a le ui mai ia te a'u" (Ioane 14:6).
O le galala lena o loo ia te oe o le fia taumafa faaleagaga, ma e na o Iesu e mafai ona faamalieina lena manaoga. O Iesu o le faitotoa i le olaga manuia. O Iesu o lau Uo, o lou Leoleo Mamoe ua leva ona e sailia. O Iesu o le Ola -- i le olaga nei atoa ma le atali. O Iesu lava o le ala i lou faaolataga!
O le mafua'aga ua e galala ai, ma e tauaupago ai i le pogisa, atoa ma lou le maua foi o se mea taua i lou olaga, ona ua leai se lua mafutaga ma le Atua. Fai mai Lana Afioga ua agasala tagata uma lava, ma ua motusia ai le fesoota'iga ma le Atua (Failauga 7:20; Roma 3:23). O le lagona gaogaolia lena o loo e lagonaina i lou loto e mafua ona e le o 'auai le Atua ia te oe. Na fausia le tagata ina iai se mafutaga ma le Atua. Ae ua motusia lea mafutaga ona o a tatou agasala. O le mea ua sili ona leaga, o le avea lea o le agasala ma mafua'aga ua tuueseeseina ai i tatou ma le Atua e faavavau, i le olaga lenei atoa ma le olaga atali (Roma 6:23; Ioane 3:36).
E faapefea la ona fo'ia lea faafitauli? O Iesu lava o le tali! Na fai o Ia ma agasala o le sui o i tatou (2 Korinito 5:21). Na maliu Iesu e sui a'i i tatou (Roma 5:8), ua faasalaina foi o Ia i le faasalaga sa tatau mo i tatou. Ua mavae aso e tolu, ona toe tu mai lea o Iesu nai e ua oti, ua faamaonia ai iina Lona manumalo a'ia'i i le agasala ma le oti (Roma 6:4-5). Aisea ua Ia faia ai lea mea? O loo talia e Iesu lava lea fesili, "E le sili lava le alofa o se tasi i lenei alofa, ia tuuina atu e se tasi lona ola e sui a'i ana uo" (Ioane 15:13). Na maliu Iesu ina ia ola i tatou. Afai e tuu atoa lo tatou faatuatua ia Iesu, ma talitonu i Lona maliu ua togiolaina ai i tatou mai le agasala -- ua magalo ai iina a tatou agasala uma ma ua faamamaina ai i tatou! O iina lava e malie ai le galala faaleagaga o loo i totonu ia i tatou. E malamalama ai foi mea uma sa pogisa. Tatou te maua ai lea o se olaga ua faatumuliaina. E iloa ai foi e i tatou la tatou Uo moni ma le sili ae maise lo tatou Leoleo Mamoe lelei. O iina foi e mautinoa ai ua tatou maua le ola e faavavau pe 'a mavae lenei olaga -- o se olaga ua toe faafouina i le lagi e faavavau faatasi ma Iesu!
"Aua ua faapea lava ona alofa mai o le Atua i le lalolagi, ua Ia au mai ai lona Atalii e toatasi, ina ia le fano se tasi e faatuatua ia te Ia, a ia maua e ia le ola e faavavau" (Ioane 3:16).
Ua fai sau filifiliga ma'oti mo Keriso ina ua e faitau malamalama i itulau nei? Afai o lea, asiasi i le "Ua ou talia Iesu i le Aso lenei" o loo iai i lalo.
English
O a tonu fuafuaga o le faaolataga?