settings icon
share icon
Fesili

O a ia tulafaono faaleagaga e fa?

Tali


O Tulafono faaleagaga nei e fa o se tasi foi lea auala tatou te fetufaa'i ai i le tala lelei e faasino i le avanoa ua maua i le faaolataga, e ala i le faatuatua ia Iesu Keriso. O se ala ua faigofie ai ona faavasegaina le tala lelei i ni vaega e fa.

O le tulafono muamua e faapea, "E alofa le Atua ia te oe ua mafua ai ona Ia saunia se aIa matagofie mo lou olaga". Fai mai le Ioane 3:16, "Aua ua faapea lava ona alofa mai o le Atua i le lalolagi, ua Ia aumai ai Lona Alo e toatasi, ina ia le fano se tasi e faatuatua ia te Ia, a ia maua e ia le ola e faavavau." O loo aumaia e le Ioane 10:10 le mafua'aga na afio mai ai Iesu, "Ua ou sau ina ia latou maua le ola, ia maua atili ai lava." O le a le mea ua polokaina ai i tatou mai le alofa o le Atua? O le a le mea o loo punitia ai le o'o mai o le olataga e matua tele ia te i tatou?

O le tulafono lona lua fai mai, "Ua eleelea tagata uma ona o le agasala ma ua le maua ai se mafutaga va lalata ma le Atua." Ona o lea, ua le mafai ai ona tatou iloa atu fuafuaga maoa'e a le Atua mo o tatou olaga. O loo faamautuina e le Roma 3:23 e faapea, "Aua ua agasala tagata uma lava ma ua le oo i le viiga mai le Atua." O loo ta'ua e le Roma 6:23 le i'uga o le agasala, "o le totogi o le agasala o le oti." Na faia e le Atua i tatou ina ia mafuta ma Ia. Ae peita'i, ua oo mai le agasala i le lalolagi ona o le tagata, ma ua motusia ai la tatou mafutaga ma le Atua. Ua faaleagaina le mafutaga na Ia foafoaina mo i tatou. O le a la le mea e tatau ona fai?

O le tulafono e tolu e faapea, "o Iesu Keriso le ala e toatasi ua saunia e le Atua mo le faamagaloina o a tatou agasala. O Iesu Keriso ua ala mai ai le faamagaloina o a tatou agasala ma le faafouina o la tatou mafutaga tonu ma le Atua." Fai mai le Roma 5:8, "A ua faaalitinoina mai e le Atua Lona lava alofa ia te i tatou, ina ua maliu Keriso ma sui o i tatou, a o tatou agasala pea." I le I Korinito 15:3-4, o loo ta'ua ai mea uma e tatau ona tatou iloa ma talitonu iai, e maua ai le faaolataga, "Na maliu Keriso ma sui o a tatou agasala, pei ona tusia; na tanu foi o Ia, ma toe tu mai i le aso tolu, pei o upu ua i Tusi." O Iesu lava Ia na fetalai i le Ioane 14;6: "O A'u nei le ala, ma le upu moni, ma le ola. E le alu atu lava se tasi i le Tama, pe a le ui mai ia te A'u." E faapefea ona ou maua le meaalofa o le faaolataga?

O lona fa o tulafono faaleagaga lea, "E tatau ona tuu atu atoa lo tatou faatuatua ia Iesu Keriso ma talitonu o Ia o le Faaola, ona maua ai lea e i tatou le meaalofa o le faaolataga, ma manino lelei ai ia te i tatou fuafuaga matagofie a le Atua mo o tatou olaga." O loo faamatala mai e le Ioane 1:12, "A o latou uma o e ua talia o Ia, ma faatuatua i Lona suafa, na Ia avatu i ai o lea manuia, ia avea i latou ma fanau a le Atua." O loo manino foi i le Galuega 16:31, "Ina faatuatua ia i le Alii o Iesu Keriso, e ola ai oe atoa ma lou aiga." E na o le alofa tunoa e faaolaina ai i tatou, e ala lava i le faatuatua, ia Iesu Keriso e toatasi (Efeso 2:8-9).

Afai ua e talitonu ma e mana'omia nei Iesu Keriso e avea ma Faaola, faata'ita'i upu nei e fai ma au tatalo i le Atua. O nei foi upu e le faaolaina ai oe, aua e faaolaina oe ona ua e talitonu ia Keriso! O se tatalo faigofie lenei e te talatala atu ai i le Atua lou faatuatua ia te Ia atoa ma lau faafetai mo le faaolataga na Ia saunia mo oe. "Le Atua e, ua ou iloa ua ou agasala ia te Oe ma ua tatau lava ona ou oti. A ua fai Iesu Keriso ma o'u sui ina ia ou magalo e ala i lo'u faatuatua ia te Ia. Ua ou fulitua nei i le agasala ae faatuatua ia te Oe mo lo'u faaolataga. Faafetai mo Le matagofie o Lou alofa tunoa ma Lau faamagaloga--o le meaalofa lea o le ola e faavavau! Amene!"

Ua fai sau filifiliga ma'oti mo Keriso ina ua e faitau malamalama i itulau nei? Afai o lea, asiasi i le "Ua ou talia Iesu i le Aso lenei" o loo iai i lalo.

English



Toe taga'i i le itulau ua faaliliuina i le gagana Samoa

O a ia tulafaono faaleagaga e fa?
© Copyright Got Questions Ministries