Fesili
Ua na o Iesu ea le ala i le Lagi?
Tali
"O a'u o se tagata lelei, o lea ou te sao ai i le lagi." "Ua lelei, e iai nai mea leaga ua ou faia, ae tele atu a'u mea lelei, ma o lea ou te sao ai i le lagi." "E le tulia a'u e le Atua i seoli ona ou te le o ola i le Tusi Paia. Ua ese taimi nei!" "Na o tagata e sili ona leaga e o i seoli e pei o i latou o e faaleagaina fanau ma fasioti tagata."
O manatu lava nei o loo talitonu iai le tele o tagata, ae o le mea moni lava, e pepelo uma nei faamatalaga. O satani, le o loo pulea lenei lalolagi, ua ia totoina nei manatunatuga i o tatou mafaufau. O ia, atoa ma e o loo mulimuli i ona ala, ua fai ma fili i le Atua (I Peteru 5:8). O satani e foliga mai e lelei (2 Korinito 11:14), ae o loo pulea e ia mafaufau o e o loo taumamao ma le Atua. "Ua faatauasoina manatu o i latou o e le talitonu i le atua o le lalolagi nei, ina ne'i pupula atu ia te i latou le malamalama o le tala lelei i le mamalu o Keriso, ua tusa o ia ma le Atua" (2 Korinito 4:4).
E pepelo le talitonuga faapea e le kea le Atua i agasala iti, ma o seoli o loo faaagaga mo "tagata leaga". Ua iai se vanu tele i lo tatou va ma le Atua ona o le agasala ma e leai foi ni "agasala papa'e". Ua agasala tagata uma, ma ua leai se tasi e sao i le lagi i sana amio ua tonu (Roma 3:23). E le sao foi i le lagi niisi ua tele atu ana amio lelei nai lo amio leaga; E lusi i tatou pe a faapea. Afai foi o le alofa tunoa, ua le o galuega; ana faapea, po ua le toe ta'ualofatunoaina le alofa tunoa; afai foi o galuega, ua le o le alofa tunoa; ana faapea, po ua le toe ta'ugaluegaina le galuega" (Roma 11:6). E leai sa tatou amio ua tonu e mafai ai ona tatou sao i le lagi (Tito 3:5).
"Ia outou ulu atu i le faitotoa va apiapi; aua e va tele le faitotoa, e lautele foi le ala e tau atu i le malaia, e toatele foi i latou o e ui atu ai" (Mataio 7:13). E tusa pe ola tagata uma i le agasala, ma ua faatauvaa le talitonu i le Atua, e le mafai lava ona faatagaina e le Atua le agasala. "Na outou savavali ai anamua, e tusa ma le tu a lenei lalolagi, e tusa ma le ta'ita'i o le au faipule i le va nimonimo, o le agaga lea o loo matua galue nei i e ua faalogogata" (Efeso 2:2).
Sa atoatoa ona lelei le lalolagi na faia e le Atua; Ua lelei foi mea uma na Ia faia. Ona faia lea e Ia o Atamu ma Eva, ma tuuina ia te i laua le pule e filifili ai, e mulimuli ma usiusitai i le Atua, pe leai. A o Atamu ma Eva, o ulua'i tagata na faia e le Atua, ua faaosoosoina e satani ia 'aua ne'i usiusita'i i le Atua, ma ua agasala ai i laua. O lea na vavaeeseina ai i laua (ma tagata uma ua fananau mai ia te i laua, e aofia ai ma i tatou) ma ua leai se mafutaga va lalata ma le Atua. O Ia e atoatoa, e paia, ma ua Ia faamasino i le agasala. E le fai mo tagata agasala le lagi ona o a latou lava amio. O lea na saunia ai e le Atua le ala e toe fesoota'i ai o Ia ma i tatou i le lagi. "Aua ua faapea lava ona alofa mai o le Atua i le lalolagi, ua Ia au mai ai lona Atalii e toatasi, ina ia le fano se tasi e faatuatua ia te Ia, a ia maua e ia le ola e faavavau" (Ioane 3:16). "Aua o le oti, o le totogi lea o le agasala; a o le ola e faavavau, o le mea foaifuaina mai lea e le atua, i lo tatou Alii o Keriso Iesu" (Roma 6:23). Na fanau Iesu e aoao ia i tatou le ala ma maliu e sui a'i i tatou, ua le o'o ai le faasalaga ia i tatou. O le aso tolu na toe tu mai ai o Ia nai le tuugamau (Roma 4:25), ma faamaonia ai Lona manumalo i le oti. Ua fai o Ia ma leleiga i le va o tagata ma le Atua ma ua toe maua ai se mafutaga va lalata e i latou o e talitonu ia te Ia.
"O le ola e faavavau foi lenei, ia latou iloa oe le Atua moni e toatasi, atoa ma le ua E auina mai, o Iesu Keriso lea" (Ioane 17:3). E talitonu le tele o tagata i le Atua, e talitonu foi satani. Ae ina ia talia le faaolataga, e tatau ona tatou liliu i le Atua, faia se mafutaga va lalata mai Ia, fulitua i a tatou agasala ma mulimuli ia te Ia. E tatau ona tatou talitonu ia Iesu i mea uma lava ua ia i tatou, atoa ma mea uma tatou te faia. "O le amiotonu lea a le Atua i le faatuatua ia Iesu Keriso, e oo i tagata uma, mo tagata uma foi o e faatuatua; aua e le eseese lava" (Roma 3:22). Ua aoao mai le Tusi Paia, e leai lava se tasi ala e faaolaina ai tatou ua na o Keriso. Fetalai Iesu i le Ioane 14:6, "O a'u nei le ala, le upu moni, ma le ola. E le alu atu lava se tasi i le Tama pe a le ui mai ia te A'u."
Ua na o Iesu lava le ala i le faaolataga aua ua Na o Ia na togiolaina i tatou (Roma 6:23). E leai lava se tasi talitonuga tatou te maua ai se a'oa'oga loloto e uiga i le leaga o le agasala atoa ma lona taui. E leai foi se talitonuga ua amoina le faasalaga mo a tatou agasala, ua na o Iesu Keriso lava ua faia lea mea. E leai foi se isi talitonuga ua iai se tasi sa ta'ua o Ia o le Atua ae ua liu tagata (Ioane 1:1,14) -- ma e pau foi lea o le ala e mafai ai ona totogiina le tau o le agasala. Ana le maliu Iesu, o Ia lava o le Atua, e le magalo agasala a le lalolagi. Ua na o le faatuatua ia Iesu Keriso e maua ai e i tatou le avanoa mo le faaolataga. "E leai foi se tasi ua i ai le ola; e leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou" (Galuega 4:12).
Ua fai sau filifiliga ma'oti mo Keriso ina ua e faitau malamalama i itulau nei? Afai o lea, asiasi i le "Ua ou talia Iesu i le Aso lenei" o loo iai i lalo.
English
Ua na o Iesu ea le ala i le Lagi?