Fesili
E moni o le Tusi Paia o le Upu a le Atua?
Tali
O la matou tali i lea fesili e le gata ina faailoa atu ai la matou vaaiga i le Tusi Paia atoa ma lona faatauaina i o matou olaga, ae e faasilisili ai le matua aafiaina o o matou olaga e faavavau. Afai o le Tusi Paia o le upu moni a le Atua, e tatau la ona tatou faatauaina, su'esu'e iai, usiusita'i iai ae ia faasilisili ona talitonu ma fai. Afai o le Tusi Paia o le Upu a le Atua ae ua tatou faatalale iai, o lona uiga ua tatou faatalale i le Atua.
O le moni o le aumaiga e le Atua o le Tusi Paia o le faamaoniga lea o loo faaataata mai ai e Ia Lona lava alofa ia i tatou. O le uiga faigofie o le upu "faaaliga" o se auala lea ua saunia e le Atua e maua ai se fesoota'iga ma Ia ae maise o se mafutaga amiotonu. O mea nei e le oo iai lo tatou malamalama pe ana le seanoa le alofa silisili o le Atua o loo faaalia mai i le Tusi Paia. E ui lava ina faapea sa faasolosolo ona faaali mai e le Atua o Ia lava i le Tusi Paia i le vaipa o le 1500 tausaga, ae o loo atoatoa ai iina mea uma e manaomia e le tagata na te iloa atu ai le Atua ma faia sa la mafutaga amiotonu ma Ia. Afai la e moni o le Tusi Paia o le Upu lea a le Atua, o iina o loo iai Le pule aoao i mataupu uma e faatatau i le faatuatua, o talitonuga eseese, atoa ma amio e tatau ona faia.
O le fesili e tatau ona fesiligia ai i tatou lava, pe faapefea ona iloa o le Tusi Paia o le Upu a le Atua ae le na o se tasi o tusi lelei? O le a le eseesega faapitoa o le Tusi Paia ma isi tusi faalelotu ua tusia? E iai ni faamaoniga o le Tusi Paia o le Upu Moni a le Atua? O ituaiga fesili ia e tatau ona vaai toto'a iai pe afai tatou te iloiloa le mau a le Tusi Paia o le Upu a le Atua, sa faaalia mai e Lona Agaga, ma ua sili ona aoga mo mataupu uma o le faatuatua faapea lona faataitaiga.
E le tatau ona iai se masalosalo e uiga i le mau a le Tusi Paia o le Upu lava a le Atua. O loo ta'u manino mai lea i le 2 Timoteo 3:15-17 e faapea, "...talu foi ina o e tama itiiti ua e iloa le Tusi Paia, e mafaia ona faapoto ai ia te oe e iu ai i le ola i le faatuatua ua ia Keriso Iesu. O Tusi Paia uma lava e mai le Agaga o le Atua ia, e aoga foi ia e a'oa'o ai, e aoai ai, e faatonu ai, e faapoto ai foi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava."
Ina ia talia fesili nei ia tatou vaai i totonu atoa ma le itu i fafo o ni mau o loo faamaonia ai o le Tusi Paia o le Upu moni lava lea a le Atua. O tusitusiga i totonu o le Tusi Paia o mea ia o loo ta'utino i Lona lava a'a faaleagaga. O se faamaoniga muamua i totonu lava o le Tusi Paia o le tuu faatasiga lea o ni tusi e tele e fai ma tusi e Tasi. E ui ina o loo aofia ai ni tusi e ono sefulu ma le ono, ma sa tusia i konetineta e tolu, i gagana foi e tolu, i le vaipa o tausaga e 1500, e ala mai foi i ni tagata tusitala e to'afasefulu (o e na savalia magaala eseese o lenei olaga), o le Tusi Paia lava lea o loo tumau o le tusi aofa'i e Tasi mai lona amataga seia oo i lona iuga e aunoa ma se upueseina. O le tuu faatasiga foi lea o loo faailogaina ai le Tusi Paia e ese mai nai lo se isi lava tusi, ma ua faamaonia ai le pogai faaleagaga o Upu a o faagaeetiaina e le Atua loto o tagata i se ala e uiga ese ma ua mafai ai e i latou ona faamaumauina Ana lava fetalaiga.
O se isi faamaoniga o le Tusi Paia o le Upu a le Atua o loo vaaia i le mae'a lelei o le faamaumauina o upu faa perofetaga. O loo tusia i le Tusi Paia le fia selau o ni upu faaperofetaga ua atoatoa lelei lona faamaumauina ma mea e tutupu i aso amuli i nai isi atunuu faapea Isaraelu, seia oo lava i le lumana'i o isi nu'u faapitoa, o le i'uga e o'o i tagata, atoa ma le afio mai o Le ua ta'ua o le Mesia, le Faaola e le gata mo Isaraelu, ae mo tagata uma e talitonu ia te Ia. E le pei o upu faa perofetaga ua maua i isi tusi faalelotu e iai tusi a le alii o Nostradamus, a o perofetaga a le Tusi Paia ua matua faamatala 'oto'otoina ma ua le pine lona faataunuuina. E silia ma le 300 upu faaperofetaga e faasino ia Iesu Keriso o loo tusia i le Feagaiga Tuai. E le gata ina mua'i folafolaina mai le nuu e fanau ai o Ia ma le aiga e sau ai, ae e faapea foi le ala e maliu ma toe tu mai ai o Ia i le aso tolu. E matua leai se ala faigofie e faamatala faalemafaufau ai le taunuuga o nei upu faa perofetaga a le Tusi Paia se'i vagana ai lona lava pogai faaleagaga na afua mai ai. E matua leai foi se isi lava tusi faalelotu o loo tusia ai ni upu faaperofetaga ma lona faataunuuina e mafai ona faatusaina i le Tusi Paia.
O se faamaoniga lona tolu e sapaia ai le pogai faaleagaga o le Tusi Paia ua vaaia lea i le uiga ese o le pule o loo iai atoa ma le mana. E ui ina faapea ua faa’au’au lea manatu pe a tuu faafeagai ma manatu e lua ua talanoaina i luga, e le faaitiitia ai le mana o le molimau a le Tusi Paia i lona pogai, o le a’a faaleagaga. E uiga ese lava le mana o le Tusi Paia ia ma e le tutusa ma se isi lava tusi. O le mana ma le malosiaga lea ua matua faamaonia i le suiga o olaga o le toatele ua faitau i le Tusi Paia. Ua faamaloloina e sa faaaogaina fualaau faasaina, faasaolotoina e sa tuinanau i o latou lava tino, o e sa le manatu i se lumana'i o le olaga ua matua suia o latou manatu, o e sa matua leaga olaga ua faafouing atoatoa, ua amiotonu ai foi tagata agasala, ma ua liua ai le ita i le alofa ona ua faitau tagata i le Upu a le Atua. O le Tusi Paia o loo iai le mana malosi e liua ai tagata uma ona o le Upu moni lava lea a le Atua.
E le gata i faamaoniga mai totonu o le Tusi Paia, ae atoa foi ma fafo atu, o loo sapasapaia ai le Tusi Paia o le Upu a le Atua. O se tasi o ia faamaoniga o loo i totonu lava o tala’aga eseese o le Tusi Paia. Taluai ona o le Tusi Paia o loo tala 'oto'oto mai ai talaaga ua moni ma le tonu, e iai foi la le aia tatau e su'esu'e ma faamaonia ai ona talaaga e faapei ona masani ona faia i soo se tusitusiga. Ua tele ina faamaonia tusitusiga o i le Tusi Paia i sailiiliga faasaienitisi ma isi foi tusitusiga i taimi fai pea. O le mea moni lava, o suesuega ma tusitusiga a saienitisi e sapaia ai le Tusi Paia ua mafua ai ona taua faapea ua sili le maoa’e o faamaumauga o le Tusi lenei nai lo se isi lava tusi mai le lalolagi tuai. O le moni ma le faamaoni o faamaumauga a le Tusi Paia i ona talaaga faasolopito ua avea ai ma mea ua faaaogaina ai lea Tusi Na te faafeiloaiina ni faafitauli e tulai mai i mataupu tau lotu atoa ma talitonuga faavae, ma e fesoasoani foi e faamautu atili ai le mau o le Upu lava lea a le Atua.
O le isi faamaoniga i le itu i fafo o le Tusi Paia o loo faamautuina lea i le amio ua tonu a e sa tusia. E pei ona ta’ua muamua, na faaaogaina e le Atua tagata mai so’o se savaliga o lenei olaga ina ia faamaumauina ai Ana Fetalaiga mo i tatou. I suesuega o olaga o nei tagata, e leai se mafua'aga o le a tatou le talitonuina ai i latou o ni tagata e faamaoni ma moni la latou molimau. I le auiliiliina o o latou olaga ma le latou naunautaiga e maliliu (e peiseai e faamaturo i le tele o taimi) mo le mea o loo talitonu iai, e vave manino ai lava iina le faatauvaa ma le moni o le latou talitonuga o le Atua sa fetalai ia te i latou. O tagata nei sa tusia le Feagaiga Fou atoa ma le tele o niisi o e ua faatuatua (I Korinito 15:6) na iloa le moni o le latou molimau ina ua latou vaai ma faaavanoa o latou taimi e faatasi ai ma Iesu Keriso i Lona toe tu mai nai e ua oti. O le faafouina o i latou ina ua vaaia le Keriso Toe Tu na oo ai se suiga ese i nei tagata. Ua latou le toe lalafi ina ua matatau, ae ua latou lotoa e maliliu mo le tala lelei ua faaalia e le Atua ia te i latou. O o latou olaga atoa ma taimi sa maliliu ai ua avea lea ma molimau e faamaonia ai o le Tusi Paia o le Upu lava a le Atua.
O se faamaoniga mulimuli mai fafo atu o le Tusi Paia e sapasapaia ai le Upu moni a le Atua, o le le mafaia lea ona faaumatiaina. Ona o le taua o lana molimau o lea lava le upu a le Atua, ua tele ina faataugaina ma taupulepule ai niisi e faaumatia lea tusi nai lo se tasi lava tusi i ona talaaga. Mai anamua i Pule’aga faa Roma e iai faipule e pei o Diocletian, faapea ta’ita’i Komunisi ma e tete’e ae maise le ‘au faalekea, ua ‘auvasa mai ai le Tusi Paia ma ua tula’i e faailoa ia i latou uma o e na taumafai e faaumatiaina o Ia, o le Tusi Paia o se tusi ua silia ona lomiga i le lalolagi atoa nai lo se isi lava tusi, e oo mai lava i le aso.
I taimi ua mavae, sa manatu niisi o le Tusi Paia o se tusitala, ae ua faamautuina e saienitisi lona tala’aga faamaumauina. Ua faasagatau le 'au faatui'ese i ana a’oa’oga fai mai e faatauvaa ma ua le toe aogi i taimi nei, a o lona faavae amiotonu ma ana aoaoga ua ta’uleleia ai faalapotopotoga, o sosaiete atoa ma aganuu eseese o le lalolagi. O loo faatau pea lava iai niisi o saienitisi, o le 'au saikolosi, ae maise e fai polotiki ae tumau pea le moni ma le taua o le Upu i ona po nei e pei ona iai i le taimi na mua’i tusia ai. O se tusi foi ua faaliliuina ai le tele o olaga ae maise aganu’u eseese i le 2000 tausaga ua mavae atu. E tusa poo le a le taumafai o e faasagatau ma mananao e faaumatia ma faaleaogaina lea Tusi, o loo tumau pea le Tusi Paia i lona malosi ua sili atu, o loo tumau pea lona faamaoni, ma o loo aoga pea i le aso e pei ona iai anamua. O le mea moni ua faasaoina mai i nei taumafaiga uma e faasese, faatau ma faaleagaina, o ta’utinoga mautu uma e faamaonia ai le Tusi Paia o loo i totonu lava o le Upu moni a le Atua. E le tatau ona faate’ia i tatou i lea mea e tusa pe faataugaina faafia le Tusi Paia, ae e tula’i mai lava e aunoa ma se mea e suia pe faaumatiaina. I le i’uga o mea uma, ua fetalai Iesu, “E mavae atu le lagi ma le lalolagi; a e peitai a’u upu, e le mavae lava ia” (Mareko 13:31). Ina ua vaai toto’a i faamaoniga nei e tatau ai ona faapea ifo le tagata e aunoa ma le masalosalo “Ioe, e moni o le Tusi Paia o le Upu lava a le Atua.”
English
E moni o le Tusi Paia o le Upu a le Atua?