Fesili
O lea ua ou talia Iesu ma faatuatua ia te Ia...O le a le isi mea e tatau ona ou faia?
Tali
Faamalo lava! O lea filifiliga e suia ai lou olaga atoa! E le taumate ua e fesili: "Poo le a le mea e soso'o ai nei?" E faapefea ona amataina la'u faigamalaga ma le Atua? E lima ni vaega o loo faatonuina mai e le Tusi Paia e te mulimuli iai. E te maua foi ni tali o ni au fesili i le www.GotQuestions.org/Samoa.
1. Ia e malamalama lelei i le mataupu o le faaolataga.
Ua ta’ua mai I le I Ioane 5:13: "Ua ou tusi atu nei mea ia te outou o e faatuatua i le suafa o le Alo o le Atua, ina ia outou iloa ai ua ia te outou le ola e faavavau." E finagalo le Atua ina ia tatou malamalama i le mataupu o le faaolataga. O Lona loto atoa, ia mautinoa lelei e le tagata lona faaolaina. Toe usi lelei le faafofoga i ki nei o le faaolataga:
(a) Ua agasala i tatou uma lava. E iai a tatou amioletonu ua avea ma mea ua le fiafia mai ai le Atua.
(e) Ua tatau ia i tatou le faasalaga atoa ma le vavaeeseina e faavavau mai le Atua, ona o a tatou agasala (Roma 6:23).
(i) Na maliu Iesu i le satauro ma totogi ai e Ia le tau o a tatou agasala (Roma 5:8; 2 Korinito 5:21). Na maliu Iesu e sui a’i i tatou, ma sa nofosala ai o Ia mo i tatou. O Lona toe tu mai ua faamaonia ai, ua lava ma totoe Lona maliu e togiola ai i tatou mai le leaga o le agasala.
(o) O le Atua lava Na te faamagaloina a tatou agasala ma faaolaina i tatou uma ua faatuatua ia Iesu--ma talitonu i Lona maliu e magalo ai a tatou agasala (Ioane 3:16; Roma 5:1; Roma 8:1).
O le feau lea o le faaolataga! Afai ua e faatuatua ia Iesu Keriso ma avea o Ia e fai ma ou Faaola, ua faaolaina ai oe! Ua faamagaloina au agasala uma ma ua folafolaina mai e le Atua, Na te le tuua lava oe (Roma 8:38-39; Mataia 28:20). Ia e manatua, o lea ua mautu lou olataga ia Iesu Keriso (Ioane 10:28-29). Afai ua e talitonu ia Iesu o Ia e toatasi o lou Faaola, o lena o loo e mautinoa ai, ua iai lou nofoaga tumau faatasi ma le Atua i le lagi!
2. Saili se ekalesia o loo aoaoina le Tusi Paia atoa.
'Aua e te manatu o le Ekalesia o se fale ua fausia i lima. O le Ekalesia e fausia i tagata. E matua taua tele le mafutafuta faatasi o tagata ua talitonu ia Iesu Keriso. O le tasi lea matafaioi taua o le Ekalesia. Ona e fou lou tagata talitonu ia Iesu Keriso, saili loa se Ekalesia e talitonu ma aoaoina le Tusi Paia, e lata ane foi i lou fale, ma ia vave loa ona faafesoota'i le Faifeau. Faailoa ia te Ia ua e mauaina le faaolataga ma ua amataina lou olaga fou ia Iesu.
O le isi aoga o le Ekalesia, e aoaoina ai oe i le Tusi Paia, le Afioga a le Atua. O iina e te iloa ai le finagalo atoa o le Atua mo lou olaga. O lou malamalamaga foi i le Tusi Paia o le ki lava lea e te ola manumalo ai i lou olaga faa-Kerisiano. Fai mai le 2 Timoteo 3:16-17, "O Tusi Paia uma lava e mai le Agaga o le Atua ia, e aoga foi ia e a'oa'o ai, e aoai ai, e faatonu ai, e faapoto ai foi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava."
O lona tolu, o le Ekalesia e aoaoina ai lau Tapuaʼiga i le Atua. O le Tapua’iga o lou faafetai atu lea i le Atua mo mea uma na Ia faia! O le Atua e faaolaina ai i tatou. O le Atua foi na alofa mai ia te i tatou. O Ia lava na foaiina mai mea uma mo i tatou. O le Atua foi Na te taitai ma faatonuina la tatou savaliga. E faapefea ona tatou le faafetai ia te Ia? E paia le Atua, e amiotonu, e alofa, ma e tumu o Ia i le alofa tunoa. O loo ta’utino mai le Faaaliga 4:11, "Le Alii e, e tatau lava oe ina ia tuu atu ia te oe le viiga, ma le faaneeneega, ma le mana; aua na e faia mea uma lava, ona o lou finagalo foi e i ai i latou ma ua faia."
3. Faaavanoa se taimi i aso taitasi mo lau mafutaga ma le Atua.
E taua tele le taimi e te faaavanoaina mo se lua mafutaga ma lou Atua i aso taitasi. O niisi ua taua lea o le “taimi o le mafutaga." E faaigoa foi e niisi o le "taimi tatalo," aua o taimi faapenei e tuuina atu ai oe atoa i le Atua. O isi ua faaavanoaina a latou taimi faapea i le taeao, a o isi ua filifili e faia i le afiafi.
(a) Tatalo. O a oulua talanoaga ia ma le Atua. Talanoa i le Atua i mea o loo e manatu iai ma ta’u ia te Ia ni ou faafitauli. Fesili i le Atua mo le poto faapea atoa ma Lana taitaiga i lou olaga. Ole atu i le Atua ona o ou manaoga. Faamatala ia te Ia lou alofa tele mo Ia ma lou agaga faafetai ona o mea uma ua Ia faia mo oe. O mea uma ia e aofia i le mataupu o le tatalo.
(e) Faitau le Tusi Paia. Ia 'aua ne'i gata le faitauina o lau Tusi Paia i le lotu o le Aso Sa poo aoga Tusi Paia foi--a ia faavanoaina ni taimi i lou aiga i aso taitasi e faitau ai lau Tusi Paia mo oe lava ia. E te maua i le Tusi Paia faamanuiaga uma mo lou olaga. O loo tusia i le Tusi Paia ala uma o le Atua e faia ai au filifiliga ma le poto, ma e te mautinoa ai foi le finagalo o le Atua mo oe, po'o se fesoasoani mo se isi tagata, ma faatonu ai foi le aga’i i luma o lou ola faaleagaga. O le Tusi Paia o le Upu a le Atua e aoaoina ai i tatou, e lelei atoatoa ai fo’i, ma e fai ma mea e matua fiafia mai ai le Atua ia i tatou.
4. Mafuta i ni tagata e faamalosia ai lou olaga faaleagaga.
Fai mai le I Korinito 15:33, "Aua ne'i faaseseina outou, O le feoai ma e amio leaga e leaga ai amio lelei." E tele aoaiga a le Tusi Paia e 'aua ai ne'i tosina ese i tatou i amioga a tagata amio leaga. O le tele o lou mafuta i tagata o loo faia le agasala, e mafua ai ona faaosoosoina lou ola fia taumafai mo le Alii ma toe foi ai i tua lou olaga. O lea, e taua tele le si'omiaina o oe e tagata o loo alolofa faamaoni ma gaua'i i le Alii.
Saili ni uo pe lua mai lau Ekalesia, e mafai ona fesoasoani ma faamalosi ia te oe (Eperu 3:13; 10:24). Ta'u ia te i laua, e te manaomiaina le la fesoasoani i le faamautuina o oe i ou taimi ma le Atua, o au mea uma e fai, faapea foi ma lau savaliga faaleagaga. Fai iai e te faia foi lea mea mo i laua. O lona uiga, e te alofa pea i au uo sa e masani ai, ae ia e molimau ia i latou i le suiga o lou olaga ina ua e maua Iesu Keriso, ma fai iai ua e le toe faia amioga sa e masani ai. Faatoga i le Atua mo ni avanoa lelei Na te aumaia e te molimauina mo Iesu i au uo.
5. Ia papatisoina oe.
E tele tagata e le malamalama lelei i le mataupu o le papatisoga. O le uiga o le upu "papatiso" o le ala lea a le Tusi Paia e fai ma au molimau i tagata lautele, ua e faatuatua ia Keriso ma ua e filifili e mulimuli ia te Ia. O lou tofu atoa i le vai e faailoa ai ua e loto e tanumia faatasi oe ma Keriso. O lou tu i luga nai totonu o le vai o le ata lea o le faatuina o Keriso nai e ua oti. O le papatisoga foi i le vai e faailogaina ai lou talitonu i le maliu o Iesu, Lona tanumia, atoa ma Lona toe tu mai (Roma 6:3-4).
Maitau lelei, e le faaolaina oe e le papatisoga. E le aveesea foi e le papatisoga ni au agasala. O le papatisoga, o se auala taua lea ua e uia ona o lou usiusita'i--o lau ta'utinoga i lou faatuatua ia Keriso e toatasi ma Lana faaolataga. Afai ua e sauni e papatiso, talanoa loa i le Faifeau.
English
O lea ua ou talia Iesu ma faatuatua ia te Ia...O le a le isi mea e tatau ona ou faia?