Mbudziso
Mukriste ndi mini?
Phindulo
Thalusamaipfi i ṱalusa Mukriste sa "muthu ane a tenda kha Yesu sa Kristo kana vhurereli ho thewaho kha pfunzo dza Yesu.” Naho yeneyi i mbuno, u fana na dziṅwe ṱhalusamaipfi, a i ṱalusi nga vhuḓalo zwine Bivhili ya zwi amba nga ha u vha Mukriste. Ipfi "Mukriste" ḽo shumiswa luraru kha Thesitamende Ntswa (Mishumo 11:26; 26:28; 1 Petro 4:16). Vhatevheli vha Yesu Kristo vho thoma u vhidzwa "Vhakriste" ngei Antiokio (Mishumo 11:26) nga ṅwambo wa vhuḓifari havho, mushumo, na nḓila ye vha vha vha tshi amba ngayo zwo vha zwi tshi fana na zwa Kristo. Ipfi "Mukriste" nga lwa thevhedzaipfi ḽi amba, "u vha muraḓo wa tshigwada tsha Kristo" kana "mutevheli wa Kristo."
Zwi pfisaho vhuṱungu ndi uri u ya nga tshifhinga, ipfi "Mukriste" a ḽo ngo tsha vha na ndeme nahone kanzhi ḽi shumiswa kanzhi kha muthu ane a vha kha vhuṅwe vhurereli kana ane a ḓifara zwavhuḓi fhedzi ane a vha kana ane a si vhe mutevheli wa Yesu Kristo. Vhathu vhanzhi vhane vha sa tende na u fulufhela Yesu Kristo vha ḓidzhia vhe Vhakriste nga ṅwambo wa uri vha a ya kerekeni kna vha dzula na vhathu vhane vha vha "Vhakriste." Fhedzi u ya kerekeni, u thusa vhashai, kana u vha muthu o lugaho a zwi ni iti Mukriste. U ya kerekeni a zwi ni iti Mukriste u fana na muthu ane a ya garadzhi zwi sa mu iti muḓivhadzigoloi. U vha muraḓo wa kereke, u ya tshumeloni tshifhinga tshoṱhe, na u ita mishumo ya kereke a zwi ni iti Mukriste.
Bivhili i funza uri mishumo yavhuḓi ine ra i ita a i sumbedzi uri ri ḓo ṱanganedzwa nga Mudzimu. Tito 3:5 i ri, “Ho ngo ri tshidzela mishumo ya u lugani ye riṋe ra i ita, o ri tshidza nge a ri khathutshela. O ri tshidza nga u ri ṱambisa maḓi a u bebwa hafhu, na a u ri ita vhaswa nga Muya-mukhethwa.” Nga zwenezwo, Mukriste ndi muthu o bebwaho hafhu nga Mudzimu (Yohane 3:3; Yohane 3:7; 1 Petro 1:23) nahone u na lutendo na u fulufhela kha Yesu Kristo. Vha-Efesa 2:8 i ri vhudza uri ndi “…nga tshilidzi, zwi tshi bva u tendani, a no ngo tou ḓi-ita, no tou fhiwa nga Mudzimu.”
Mukriste wa vhukuma ndi muthu ane a vha na lutendo na u vha na fulufhelo kha muthu na mishumo ya Yesu Kristo, u katela na lufu Lwawe kha tshifhambano u itela u lifha zwivhi zwashu na u vuswa Hawe nga ḓuvha ḽa vhuraru. Yohane 1:12 i ri vhudza uri “Hone, vhoṱhe vho mu ṱanganedzahoa vha ṋea maanḓa a u vha vhana vha Mudzimu; ndi avho vho tendaho kha dzina ḽawe.” Luswayo lwa Mukriste wa ngoho ndi u funa vhaṅwe na u thetshelewsa Ipfi ḽa Mudzimu (1 Yohane 2:4, 10). Mukriste wa ngoho ndi ṅwana wa Mudzimu, ndi muraḓo wa muṱa wa Mudzimu, na we a ṋewa vhutshilo vhuswa nga Yesu Kristo.
Naa no no ita phetho nga ha Kristo nga ṅwambo wa zwe na zwi vhala afha? Arali zwo ralo, nga khumbelo puṱedzani bathini i re afho fhasi ine ya ri "Ndo ṱanganedza Kristo ṋamusi".
English
Mukriste ndi mini?