Suraq
Isa Másix Kim?
Jaýap
Isa Másix Kim? Qudaidyń shynymen bar ekenine kúmándanatyn adamdar az emes. Alaida Isa Másixtiń bar bolǵanyna kúmándanatyndar azyraq. Adamdar Isany shamamen 2000 jyl buryn Israil elinde ómir súrgen adam dep sanaidy. Degenmen Onyń bolmysy týraly sóilesken kezde kóptegen daý-janjal týyndaidy. Keń taraǵan dinderdiń árqaisysy derlik Isany paiǵambar, igi ustaz nemese taqýa adam dep esepteidi.
K.S. Lyuis degen másixshi jazýshy óziniń «Kádimgi másixshilik» degen kitabynda bylai jazǵan: «Men barlyq adamdarǵa myna jii aitylatyn aqymaq nárseni aitpaýdy eskertkim keledi: «Men Isanyń igi ustaz ekenin moiyndaýǵa daiynmyn, biraq Onyń Qudai ekenine kelispeimin». Biz eshqashan osylai aitpaýymyz kerek. Isa kádimgi adam bola tura osyndai sózderdi aitqanda onda igi ustaz dep atalýǵa laiyqty bolmas edi. Mundai tulǵa «men jumyrtqamyn» deitin esi aýysqan adam nemese tozaqtan shyqqan shaitannyń ózi bolar edi. Sondyqtan sizge endi tańdaý jasaý kerek: siz Isany Qudaidyń Uly dep qabyldaisyz ba álde Ony esi aýysqan adam nemese tipti odan da jaman bireý dep sanaisyz ba? Ony aqymaq nemese jyn ustaǵan bireý dep, betine túkiresiz be álde ayaǵyna jyǵylyp, Ony Ieńiz ári Qudaiyńyz dep qabyldaisyz ba? «Onyń Qudai Uly bolǵanyna kelispeimin, biraq Onyń Igi Ustaz bolǵany ras» dep sandyraqtaýdan aýlaq bolaiyq. Ol bizge solai sóileýge quqyq bergen joq. Ol bizdiń solai qateleskenimizdi qalamaidy».
Sonymen Isa Ózin Kim dep ataǵan? Kieli kitap Ony kim deidi? Birinshiden Joxan 10:30 ayatyna qaraiyq. Isa osy jerde: «Ákem ekeýimiz birtutaspyz» deidi. Bul sózderge birinshi qaraǵanda Isa Ózin Qudai dep atamaǵandai kórinedi. Alaida osy sózderdi estigen evreilerdiń serpilisine qaraiyq. Olar Isaǵa: «Seni igi isiń úshin emes, Qudaidy qorlaǵanyń úshin tas laqtyryp óltirmekpiz. Sen adam bola tura, Ózińnen Qudai jasaǵyń keledi!» - dedi (Joxan 10:33). Demek evreiler Isa Ózin Qudai dep atady dep paiymdady. Kelesi ayattarda biz Isanyń: «Men Ózimnen Qudai jasaǵan joqpyn» - dep aqtalǵanyn kórmeimiz. Yaǵni Isa Óziniń Qudai ekeninen bas tartpady. Ol: «Ákem Ekeýimiz birtutaspyz» degende Óziniń Qudai ekenin jariyalady (Joxan 10:30). Osy jaily taǵy bir mysal - Joxan 8:58. Isa: «Senderge mańyzdy shyndyqty aitaiyn: Ybyraiym týmastan buryn-aq Men bar bolatynmyn» - dedi. Bul jerde de evreiler Ony tas laqtyryp óltirmekshi boldy (Joxan 8:59). Isa Ózin Qudaidyń Kóne kelisimdegi esimimen ataidy (Mysyr. shyǵý 3:14) Nelikten evreiler Isany tas laqtyryp óltirmekshi boldy? Óitkeni Isa Ózin Qudai dep atady, al evreiler úshin bul sózder Qudaidy balaǵattaýmen teń bolǵan.
Joxan 1:1 ayatynda: «Sóz Qudai edi», al Joxan 1:14 ayatynda: «Sóz adamǵa ainalyp, aramyzda ómir súrdi» dep jazylǵan. Bul sózder Isanyń adam keiipinde kelgen Qudai ekenin bildiredi. Isanyń shákirti Toma óziniń Ustazyna: «Iem meniń, Qudaiym meniń!» - dedi. Isa ony túzetpedi. Elshi Paýyl Isany «Uly Qudaiymyz jáne Qutqarýshymyz» dep ataidy (Tit. xat 2:13). Elshi Petir de Isa týraly «Qudaiymyz ben Qutqarýshymyz» deidi (Petir. 2-xaty 1:1). Isanyń Kim ekenin Qudai Ákeniń Ózi de rastaidy: «Ýa, Qudai, Seniń taǵyń saqtalady máńgilik, júrgizesiń Patshalyǵyńa ádil bilik». Sonymen birge Isanyń Qudai ekeni Kóne kelisimde de jariyalanady: «Sebebi Sábi dúniege keldi, biz úshin osy Ul syiǵa berildi! Bilik bolady Onyń qolynda máńgi: Ony «keremet aqyldy Keńesshi, Qudiretti Qudai, Máńgilik Áke, tynyshtyq pen amandyqty syilaityn Ámirshi» dep te ataityn bolady» (Ishaya 9:6).
Sondyqtan K.S. Lyuis pikiri durys: Isa bizge Ózi týraly: «Onyń Qudai Uly bolǵanyna kelispeimin, biraq Onyń Igi Ustaz bolǵany ras» dep aitýǵa quqyq bergen joq. Eger Isa Qudai bolmasa, onda Ol ótirikshi. Al ótirikshi paiǵambar da, igi ustaz da, tipti imandy adam da bola almaidy. Qazirgi zamannyń «oqymystylary» Isanyń sózderin saraptaýǵa tyrysyp júr, alaida olardyń Isa týraly «tarixi turǵydan» aitqan paiymdaýlarynda Kieli kitaptaǵy aqiqattar az aitylady. Isanyń ne aitqany nemese ne aitpaǵany jaily daýlasatyndai biz sonsha kimbiz? Qudaidyń sózi jaily daýlasatyndai biz sonsha kimbiz? Isadan keiin eki myń jyldan soń dúniege kelgen «oqymystylar» Onyń ne aitqanyn nemese ne aitpaǵanyn qaidan biledi? Osyny eń jaqsy bilgender - Isamen birge júrip, qyzmet etken jáne Odan úirengen Onyń shákirtteri emes pe? (Joxan 14:26)
Isanyń bolmysy jaily osy suraq nelikten sonshalyqty mańyzdy? Isanyń Qudai bolǵany nemese bolmaǵany nelikten sonshalyqty mańyzdy? Munyń eń mańyzdy sebebi mynandai: eger Isa Qudai bolmaǵanda Onyń ólimi búkil adamzattyń kúnálarynyń qunyn tóleýge jetkiliksiz bolar edi (Joxan. 1-xaty 2:2). Mundai orasan ári sheksiz qundy Qudai ǵana tólei alady (Rim. xat 5:8; Qorynt. 2-xaty 5:21). Bizdiń kúnámyzdyń qunyn tóleý úshin Isa Qudai bolýǵa, al ólý úshin Ol adam bolýǵa tiisti bolǵan. Adam balasy Isa Másixke senim artý arqyly ǵana qutqaryla alady! Isa – Qudai ári qutqarylýdyń jalǵyz joly. Ol Óziniń Qudai ekenin bylai jariyalaǵan: «Jol, shyndyq jáne shynaiy ómir Menmin. Men arqyly bolmasa, eshkim de Ákege bara almaidy» (Joxan 14:6).
English
Isa Másix Kim?