Suraq
Másixshilik degen ne? Másixshiler nege senedi?
Jaýap
Qorynt. 1-xattyń 15:1-4 ayattarynda bylai aitylǵan: «Al endi, baýyrlastar, men senderge ýaǵyzdaǵan Izgi xabardy taǵy da esterińe salǵym keledi. Sender ony qabyldap, senimderiń nyǵaiyp keldi. Eger ony dál men ýaǵyzdaǵandai berik ustansańdar, osy Izgi xabar arqyly qutqarylasyńdar; áitpese oǵan bekerge sengenderiń. Meniń qabyldap alyp, senderge jetkizgen eń basty xabarym mynaý boldy: Kieli jazbalarda aldyn ala aitylǵandai, Másix bizdiń kúnálarymyzdyń qunyn óteý úshin janyn qidy. Osy jazbalardyń taǵy aldyn ala aityp ketkenindei, Másix qabirge qoiylyp, úshinshi kúni qaita tirildi».
Másixshiliktiń qysqasha anyqtamasy osy. Másixshilik basqa senimderden erekshe, óitkeni másixshilikte basty kóńil dini áreketterge emes, qarym-qatynasqa bólinedi. «Isteýge bolady, isteýge bolmaidy» degen tizimmen júrýdiń ornyna másixshilik adamdy Qudaimen jaqyn dostyqta bolýǵa jigerlendiredi. Osyndai qarym-qatynas adamnyń ómirinde Isa Másix pen Kieli Rýxtyń eńbegi men qyzmeti arqyly týyndaidy.
Másixshiler Kieli kitaptyń Qudaidyń jeteleýimen jazylǵanyna jáne ondaǵy xabardyń jalǵyz durys ilim ekenine senedi (Timote. 2-xat 3:16; Petir. 2-xaty 1:20-21). Másixshiler Qudaidyń tulǵaly ekenine, yaǵni Ákeden, Ulynan (Isa Másixten) jáne Kieli Rýxtan turatynyna senedi.
Sonymen birge másixshiler adamzattyń Qudaimen qarym-qatynasta bolý úshin arnaiy jaratylǵanyna, alaida kúnányń kesirinen Qudaidan ajyrap qalǵanyna senedi (Rim. xat 5:12; Rim. xat 3:23). Másixshilerdiń nanymy boiynsha Isa, tolyq bolmysymen Qudai ári adam bola tura, osy dúniege kelip, ómir súrip, aiqyshta óldi; ólgennen keiin Ol jerlenip, qaita tirilip, Ákesiniń oń jaǵynan otyrdy. Sol jerde ol Oǵan sengen barlyq adamdar úshin Qudaiǵa máńgilik arashashy minajat aitýda (Evrei. xat 7:25). Másixshilik ilimde mynandai shyndyq jariyalanady: Isanyń aiqyshtaǵy ólimi arqyly barlyq adamdardyń kúnálarynyń quny tólenip, osy arqyly Qudai men adamnyń arasyndaǵy buzylǵan qarym-qatynas durystaldy (Evrei. xat 9:11-14; Evrei. xat 10:10; Rim. xat 6:23; Rim. xat 5:8).
Máńgilik ólimnen qutqarylý úshin adam búkil senimin Másixtiń aiqyshta jasaǵan igi isine artý kerek. Yaǵni siz Másixtiń sizdiń ornyńyzda ólip, kúnálaryńyzdy tólep, Onyń ólimnen qaita tirilgenine senseńiz onda qutqarylasyz. Adam óz kúshimen eshqashan qutqaryla almaidy. Eshkim «jaqsy adam» bolýǵa tyrysý arqyly Qudaidy riza qyldyra almaidy, óitkeni biz barlyǵymyz kúnákarmyz (Ishaya 64:6-7; Ishaya 53:6). Sonymen birge adamǵa qutqarylý úshin eshqandai jasaityn is qalǵan joq, sebebi Másix barlyq jumysty túgel bitirip tastaǵan! Sondyqtan Isa aiqyshta janyn tapsyrar aldynda: «Endi túgel oryndaldy!» dedi (Joxan 19:30).
Qutqarylý úshin eshqandai eńbek sińirýdiń qajeti joq, sondai-aq Másixtiń aiqyshtaǵy igi isine shyn júrekten senim artqan adamnyń osy qutqarylýdan aiyrylyp qalýy da múmkin emes. Esińizde bolsyn, Másix barlyq jumysty bitirip qoiǵan! Qutqarylýǵa ie bolǵan adamǵa eshteńe bailanysty emes! Joxan jazǵan Izgi xabardyń 10:27-29 ayattarynda bylai jazylǵan: «Óz «qoilarym» daýsymdy estip, baǵynady. Men olardy jaqsy bilemin, olar Maǵan erip júredi. Solarǵa máńgilik ómir beremin. Olar eshqashan qurymaidy, eshkim olardy Meniń qolymnan tartyp almaidy. Olardy Maǵan bergen Ákem bárinen de uly. Eshkim solardy Ákemniń qolynan da tartyp ala almaidy».
Keibireýler bylai oilaý múmkin: «Mynaý jaqsy boldy ǵoi! Endi oiyma kelgendi istei bersem de qutqarylýdan aiyrylmaimyn ba?» Alaida qutqarylý oiǵa kelgendi isteý degendi bildirmeidi. Qutqarylýdyń myǵynasy: kúnály bolmysymyzdyń quldyǵynan azat etilip, Qudaimen durys qarym-qatynasta bolý. Másixke sengen adamdar osy álemde ómir súrgende ǵumyr boiy kúnály bolmysymen kúresip shyǵady. Kúná Qudai men adamnyń arasyndaǵy qarym-qatynasqa kedergi jasaidy, sondyqtan eger senýshi kúnály ómir súrse onda Qudaidyń oǵan bergisi kelgen qýanysh pen batadan aiyrylady. Degenmen másixshiler Qudaidyń sózin oqyp, Kieli Rýxtyń jeteleýimen júrse onda kúnány jeńetin bolady. Senýshiler kúndelikti ómirde ózderin tolyǵymen Kieli Rýxqa tapsyryp, Qudaiǵa baǵyný kerek.
Kóptegen dinder adamǵa «mynany iste, mynany isteme» dep shekteitin talaptar qoyady. Al másixshilik senim adamdy Qudaimen qarym-qatynasta bolýǵa jigerlendiredi. Másixshiliktiń negizi – Isanyń aiqyshta bizdiń kúnálarymyzdyń qunyn tóleý úshin ólip, qaita tirilýi. Sizdiń kúnáńyzdyń quny tólendi, endi siz Qudaimen tatýlasyp, Onymen durys qarym-qatynasta bola alasyz. Siz ózińizdiń kúnály bolmysyńyzdy jeńip, Qudaiǵa baǵynyp, Onymen dos bola alasyz. Qudaidyń sózine negizdelgen shynaiy másixshilik degen osy.
English
Másixshilik degen ne? Másixshiler nege senedi?