Suraq
Eger men másixshi bolsam, otbasym menen bas tartyp, mańaiymdaǵylar (óz ultymnyń adamdary) meni qýdalaityn bolady. Men ne isteimin?
Jaýap
Álemdegi elderdiń kóbisinde dini bostandyq bar. Keibir elderde osyndai bostandyq tipti olardyń mádenietiniń negizi bolyp tabylady. Osyndai elderde turatyndar basqa elderdegi senýshilerdiń qalaisha jáne nelikten qýdalaýǵa tap bolatyndaryn tolyq túsine almaidy. Alaida Kieli kitap Qudaidyń sózi bolǵandyqtan onda adamnyń ómirinde bolatyn máseleler men synaqtardyń barlyǵy sipattalǵan. Sondyqtan biz adamnyń qai zamanda jáne qai jerde bolsyn qiynshylyqtarǵa tap bolatynyn túsinýimiz kerek. Isa Onyń sońynan erýdiń quny qymbat bolatynyn eskertken. Demek Onyń sońynan erý úshin adam bárinen bas tartý kerek. Birinshi tólenetin qun: biz ózimiz. Isa Onyń artynan erip júrgen xalyqqa: «Maǵan erip shákirtim bolǵysy kelgen árkim óz erki boiynsha ómir súrýin qoisyn, ári aiqyshyn arqalaǵan kisidei azapty ólimge daiyn bolyp Meniń jolymmen júrsin!» degen (Marqa 8:34). Aiqysh ólimdi bildiredi, sondyqtan Isa osy sózder arqyly adam ózi úshin «ólip», Qudai úshin ómir súrý kerek dep aityp tur. Yaǵni biz tilekterimiz ben talpynystarymyzdyń bárin aiqyshqa «shegelep», Isadan jańa ómir alýymyz kerek, óitkeni eshkim «eki qojaiynǵa birdei qyzmet ete almaidy» (Luqa 16:13). Degenmen Isa syilaityn jańa ómir osy álemdegi barlyq nárseden artyq ári asyl.
Ekinshi tólenetin qun bizdiń týysqandarymyz ben dostarymyz bolýy múmkin. Matai 10:32-39 ayattarynda Isa Onyń jolyn qýýshylar men olardyń otbasylaryn bir-birinen ajyratatynyn aitady. Yaǵni óziniń otbasyn Isadan artyq kórgen árkim Onyń jolyn qýýshy bola almaidy. Eger biz otbasymyzdaǵy tatýlyq úshin Isadan bas tartsaq, onda Ol da kóktegi Ákesiniń aldynda bizden bas tartpaq. Isa bizden bas tartsa, biz jumaqqa kire almaimyz. Al eger biz Isanyń Kim ekenin adamdardyń aldynda ashyq jariyalasaq, onda (tólegen qunymyz qandai bolsa da) Ol Ákesine: «Bul meniń adamym, Áketai, ony Patshalyǵyńa kirgize ber» demek. Matai 13:44-45 ayattarynda máńgilik ómir «asa qundy injý-marjanǵa» uqsatylady, osy «injý-marjan» úshin qoldaǵy barlyq nárseni qiǵan durys. Osy álemdegi qysqa ári turaqsyz nárselerge jarmaspaq bolyp máńgilik qundylyǵy bar nárseden aiyrylý aqymaqtyq bolar. «Adam búkil dúniege ie bolyp, sol sebepti ómirinen aiyrylsa, budan oǵan ne paida?» (Marqa 8:36). Djim Elliot degen elshi Ekvador elindegi xýaorani taipasyna (indeisterge) Isa Másix týraly Izgi xabardy jetkizbek bolyp ómirinen aiyrylǵan. Osy elshi: «Ótkinshi, paidasyz ári qolda turmas nárseden óz erkimen bas tartyp, onyń ornyna joǵalmaityn nárseni alǵan adam aqymaq emes» dep edi.
Sonymen birge Isa senýshilerdiń Onyń atyna bola mindetti túrde qýdalanatynyn aitqan. Qýdalaný Onyń shákirtteri úshin ádettegi nárse, sondyqtan Isa osyndai jaǵdailarda bizdiń batyl bolǵanymyzdy qalaǵandyqtan bizdi jigerlendiredi. Isa qýdalanǵan senýshilerdi «baqytty» dep, olarǵa: «Qýana shattanyńdar! Sebebi kókte senderdi zor syilaryń kútip tur!» dep jiger beredi. Ol Qudaidyń adamdarynyń árqashan solai qýdalanyp kele jatqanyn aitady. Kóne kelisimde zulym adamdar paiǵambarlardy uryp soǵyp, qinap óltiretin, tipti denelerin aramen kesetin! (Evrei. xat 11:37). Patmos aralyna jer aýdarǵan Joxannan basqa elshilerdiń barlyǵy Másixtiń xabaryn taratqandary úshin óltirilgen bolatyn. Petir aiqyshta óler aldynda ózin tóńkertip shegeletipti, óitkeni ol Isadai ólýge laiyqty emespin dep oilaǵan. Degenmen óziniń birinshi xatynda osy Petir bylai dep jazǵan: «Másixtiń atyna bola qorlyq kórseńder, baqyttysyńdar, sebebi ulylyqqa bóleitin Qudai Rýxy senderge ornyǵady» (Petir. 1-xaty 4:14). Elshi Paýyl da Másixtiń xabaryn ýaǵyzdaǵanyna bola san ret túrmege qamalyp, uryp soǵylsa da, kórgen azabyn tipti aitýǵa turmaityn bolmashy nárse dep eseptegen, óitkeni ol bolashaqta ózin kútip turǵan ulylyqtyń áldeqaida zor ekenin bilgen (Rim. xat 8:18).
Isanyń shákirti bolýdyń quny úlken bolyp kóringenimen, kókte beriletin syilarmen qatar osy álemde de beriletin syilar bar. Isa «dúnieniń aqyr sońyna deiin» bizben birge bolýǵa ýáde berdi (Matai 28:20); Ol bizdi eshqashan tastap ketpeidi (Evrei. xat 13:5); Ol bizdiń qaiǵymyz ben azabymyzdy biledi, óitkeni Ózi de biz úshin azap shekti (Petir. 1-xaty 2:21); Onyń bizge degen súiispenshiligi sheksiz; Ol bizdiń shamamyzdan artyq synalýymyzǵa jol bermeidi, azǵyrylysqa qarsy turýǵa kúsh-qýat berip, odan qutylyp shyǵýǵa kómektesedi (Qorynt. 1-xat 10:13). Biz óz otbasymyzdaǵy nemese óz xalqymyzdaǵy alǵashqy másixshi bolsaq, onda, Qudaidyń otbasynyń músheleri retinde, Onyń súiispenshiligin osy álemdegi ózimizge jaqyn ári súiikti adamdarǵa tanytatyn elshilerge ainalamyz. Sonymen birge biz Qudaidyń basqa adamdardy Ózine tartatyn quraly bolamyz. Osyny istegen kezde bizdiń qýanyshymyz turaqty ári oilaǵanymyzdan zor bolmaq.
English
Eger men másixshi bolsam, otbasym menen bas tartyp, mańaiymdaǵylar (óz ultymnyń adamdary) meni qýdalaityn bolady. Men ne isteimin?