Suraq
Kieli kitapta ondyqty berý týraly ne aitylǵan?
Jaýap
Osy taqyryp kóptegen senýshilerdiń júreginde kúres týdyrady. Qaýymdardyń kóbisi ondyqty berý jaǵynan senýshilerge tym qatań talaptar qoyady. Sonymen birge kóptegen másixshiler Kieli kitaptaǵy ondyq berý týraly nusqaýlarǵa baǵynǵysy kelmeidi. Qudaiǵa ondyqty nemese qurbandyqty berý igi ári bataly is bolǵandyqtan senýshiler osyny qýanyshpen isteý kerek. Ókinishke orai, búgingi qaýymdarda senýshilerdiń barlyǵy osyny shattana istep júr dep aitý qiyn.
Ondyqty berý Kóne kelisimnen kelgen túsinik. Sol zamandaǵy zań boiynsha evreiler tabystarynyń ondyq bólshegin Qudaidyń ǵibatxanasyna tartý retinde baǵyshtaityn (Leýilik. 27:30; Rý. sanaý 18:26; Zań. qaital. 14:24; Shejire. 2-jazba 31:5). Keibir adamdar Kóne kelisimdegi ondyqty dini qyzmetkerler men leýilikterdiń muqtajdyqtaryn qamtamasyz etý úshin jinalǵan salyq dep sanaidy. Jańa kelisimniń esh jerinde «másixshiler ondyqty júieli túrde berýge tiis» degen buiryq joq. Alaida Paýyl senýshilerge tabystarynyń bir bóligin qaýymdy qoldaý úshin jumsaýǵa nusqaý bergen (Qorynt. 1-xat 16:1-2).
Jańa kelisimniń esh jerinde arnaiy paiyz týraly aitylmaidy. Tabystyń Qudaiǵa baǵyshtalatyn kólemi jaily: «Árqaisylaryń jaǵdailaryńa qarai qoldaǵy qarajattaryńnan bólektep, saqtap qoiyńdar» - dep qana aitylǵan (Qorynt. 1-xat 16:2). Senýshilerdiń qaýymdary Kóne kelisimdegi on paiyzdy «eń az degende berilýge tiis kólem» dep qabyldap, osy ólshemdi turaqty paidalanatyn boldy. Jańa kelisimde qurbandyqtyń naqty kólemi týraly aitylmaǵanymen, qýanyshpen berýdiń mańyzdylyǵy men paidasy týraly aitylady. Senýshiler «jaǵdailaryna qarai qoldaǵy qarajattarynan bólektep», qaýymǵa berý kerek. Keide on paiyzdan kóp berilse, basqa kezde on paiyzdan az berilýi múmkin. Bul másixshiniń jaǵdaiyna nemese qaýymnyń muqtajdyqtaryna bailanysty. Ár senýshi minajat etip, óziniń qansha berý kerek ekeni jaily Qudaidan danalyq suraý kerek (Jaqyp. xaty 1:5). «Árqaisyń júrekterińniń sheshimine sai, esh renishsiz, zorlyqsyz barlaryńmen bólisińder! Qudai qýanyshpen beretinderdi unatady» (Qorynt. 2-xat 9:7).
English
Kieli kitapta ondyqty berý týraly ne aitylǵan?