ৱাহং
খৃষ্ট্যানিতি করিনো অমসুং খৃস্ট্যানশিংনা করিবু থাজবগে?
পাওখুম
১ কোরিনথিয়ান্স ১৫: ১-৪ না হায়, “হৌজিক্তি, ইচিনইনাওশা, নখোয়না লৌশিনখ্রবা অদুগা মসিগীদমক নখোয়না লেপখ্রবা ঐহাক্না নখোয়গী মফমদা শন্দোকখ্রবা গোসপেল ঐহাক্না অমুক হন্না নিংশিংবা পামই। ঐহাক্না নখোয়দা শনদোকখিবা ৱাহৈ অদু নখোয়না চু পায়বগুম পায়দুনা লৈরবদি, গোসপেল অসিমক্না নখোয়বু কনবীরবনি। নত্রবদি, নখোয়না অরেম্বদা থাজবা ওইদুনা তোক্কনি। ঐহাক্না ফংখিবা নখোয়দা অহানবমক্তদা খুৎশিন্নখ্রবনি: পূয়াগী মতুংইন্না খৃষ্টনা ঐখোয়গী পাপকীদমক্তা শিবিখ্রবনিনা, মহাকপু লৈরোল চনখ্রবা মতুংদা, পূয়াগী মতুংইন্না হুমনিশুবা নুমিৎতা মহাক হিংগৎলকখি।”
শমজিল্লবা ৱারোল অমদা, মসিনা খৃষ্ট্যানিতিগী মরুওইখ্রবা অশম্বা ৱারোলনি, লালহৈদবা ঈপূরোইগী ৱাহৈনি, অসুমনা মসিগী পাওতাক অসিনা ইরোয় লোইবা অঙম্বনি (২ টিমোদি ৩:১৬; ২ পিতর ১:২০-২১)। খৃষ্ট্যানশিংনা মপা, মচানিপা (যীশু খৃষ্ট), অমসুং থৱায় অশেঙবা অহুম অসিদা তোংদুনা লৈরিবা ঈপূরোয় অমখক্পু থাজৈ।
খৃষ্ট্যানশিংনা থাজৈ মদুদি মীওইবা হায়বসি অখন্ননা শেমখিবগী মরমদি ঈপূরোয়গা মরী অমা থমবা ঙমনবগীনি, অদুবু লঙজরুবা পাপ অদুনা মী পূম্নমক ঈপূরোয়দগী তোঙান্না তাখি (রোমিয়ো ৩:২৩, ৫:১২)। খৃষ্ট্যানিতিনা তম্বী মদুদি যীশু খৃষ্টগী মখোঙমক্না মালেম অসিগী লৈমায়থক্তা চৎখিবনা, মপূং ফান ঈপূরোয় ওইজরবসু, মপূং ফারবা মী অমা ওইবা মরমনা (ফিলি ২:৬-১১), মহাক পাং মথক্তা শিখি। খৃষ্ট্যানশিংনা থাজৈ মদুদি মহাক্না পাং মথকতা শিখ্রবা মতুংদা, লৈরোল চনখি, মহাক অমুক হৌগৎলকখি, অসুমনা হৌজিক মপাগী য়েৎথংবা নাকলদা ফমলগা লৈরি, হায়রিবসিনদি থাজরবশিংগীদমক্তা মহাক্না মতম চুপ্পগী ঐখোয়গীদমক্তা হায়জ চৎচ তৌবিরি (ইব্রিয়া ৭:২৫)। খৃষ্ট্যানিতিনা অসুমনা লাওথোকই মদুদি যীশুনা পাং মথক্তা শিবিখিবসিনা মী পূম্নমকনা তোল্লিবা পাপকী অতৌমল অদু মপূং ফান শিংদোকলে হায়বদা হায়মনবা থোক্ত্রবনি অমসুং মসিনা ঈপুরোয়গা তাইবং মীওইবগা তৎনরুরবা মরী অদু হন্নমুক শমজিন্নহল্লবনি (ইব্রি ৯:১১-১৪, ১০:১০; রোমিয়ো ৫:৮,৬:২৩)।
কনবীনবগীদমক্তা, কনাগুম্বা মীওই অমনা পাং মথক্তা থবক লোইশিনখ্রবা খৃষ্টদা মপূং ফান মহাক্কী থাজবা ইচম চমনা থমগদবনি। কনাগুম্বা অমনা খৃষ্টনা মহাক মশামক্কী মফমদা শিখি অমদি মশামক্কী পাপকী মমল পীখ্রে, অদুদগী অমুকহন্না হৌগৎলকখ্রে হায়বসিবু থাজরবদি, অসিগুম্বা মীশক অসি কনবীরবনি। কনামত্তনা নুপীসু ওইসনু নিপাসু ওইসনু ঈপূরোয়বু “মতিক চান” পেলহনবা কৈদৌঙৈদা ঙমলোই, মরমদি ঐখোয় পূম্নমক পাপ চেনবা ঙাক্তনি (য়িসাইয়া ৫৩:৬, ৬৪:৬-৭)। অনীশুবদা, মসিদগী হেন্না তৌগদবা থবক অতৈ লৈতে, মরমদি খৃষ্টনা থবক পূম্নমক তৌবীখ্রে! মহাক্না পাং মথক্তা লৈবা মতমদা, যীশুনা হায়খি, “মসি লোইরে” (যোহান ১৯:৩০)।
খৃষ্টনা পাং মথক্তা নংখিবা অৱাবা অদুদা থাজবা থমখ্রবা অদুগুম্বা নিপা নত্রগা নুপী অদুগীদি, অরাল খুবম ফংননবা করিসু তৌনিংঙাই লৈত্রবনিনা, মখোয়গী অরাল খুবম মাঙহনবা ঙমগদবা থবক অমত্ত লৈররোই মরমদি থবক অদুমক খৃষ্টনা তৌবীদুনা মপূং ফাহল্লমলে! মসিবু অরাল খুবমগীদমক ফংজরবা মখোয় অদুনা কনাগীসু মখা পোননিংঙাই মরম করিসু লৈত্রে। যোহান ১০:২৭-২৯ না হায় “ঐগী য়াও ওইরিবা নখোয় ঐগী খোনজেল অসি তাও; ঐনা নখোয়বু মশক খঙই, অদুনা নখোয়না ঐগী তুং ইল্লিবনি। ঐনা নখোয়দা লোমনাইদবা পূনসি পীনবীরি, অদুনা নখোয় মাঙখিবা লৈররোই; কনামত্তনসু নখোয়বু ঐগী খুৎতগী মুনবা ঙমলোই। নখোয় অসিবু ঐঙোনদা শিন্নরম্বা, ঐগী ঈপানা, পূম্নমক্তগী ইহেন হেন্না চাওই; কনামত্তনা নখোয়বু ঐহাক্কী ঈপাগী মখুৎতগী মুনবা ঙমলোই।”
কনাগুম্বা খরনা অসুম্না খনবা য়াই, “মসিদি চাওখ্রেদা- কনবু কনবীখ্রবদি, ঐনা তৌনিং তৌনিংবদু তৌবা ঙম্বা তারে হায়বদি মদুনা ঐগী অরাল খুবম মাঙহনগদৌবা লৈত্রবনিনা!” অদুবু অরাল খুবম হায়বসিনা কনাগুম্ববু তৌনিং তৌনিংবা তৌহনদে। অরাল খুবমনা হান্নগী পাপ অদুদগী মনিং তমহল্লি অদুগা ঈপুরোয়গা অচুম্বা মরী অমা থমনবা কন্না হোৎনবদা মনিং তমহল্লি। মতম অমদা পাপকী মনাই ওইরম্বা অদু, ওইদদুনা হৌজিক্তি খৃস্টগী মনাই ওইজরে হায়বনি (রোমিয়ো ৬: ১৫-২২)। থাজরবশিংনা মালেম অসিগী মথক্তা মখোয় মখোয়গী হকচাংদা পাপ তৌদুনা হিংলিবমখৈ, লংজরিবা পাপ অদুগা লেপতবা লান অমা থেংনদুনতা লৈগনি। অদুম ওইনমক, খৃস্ট্যানশিংনা ঈপূরোইগী ৱাহৈ (বাইবল) নৈনদুনা অমদি মখোয়গী পূনসিদা মসিবু পানশিল্লবদি, থৱায় অশেঙবনা খুদুম চল্লক্কনি - হায়বদি, থৱায়গী তৌবা ঙম্বদা চঙজদুনা অমদি নুংতিগী থৌদোকশিংদা মসিনা লমজিংদুনা অমদি থৱায়গী পাংগলনা, ঈপূরোইগী ৱাহৈনা হায়বদু ইন্দুনা পাপকা লানথেংনরবদি শোয়দনমক্কী মায় পাকপা ঙমগনি।
অসুমনা, লাইনিং পথাপ অয়াম্বনা মী অমনা মসি তৌগদবনি মসিনা তৌরোইদবনি হায়বা অককনবা মথৌ তাবশিং থমনরি, খৃষ্ট্যানিতিগীদি খৃষ্টনা ঐখোয় ইশামক্কী পাপকী মমল পীবা ওইনা পাং মথক্তা শিবিখি অদুবু অমুক হন্না হৌগৎলকখি হায়বসিদা থাজবা থম্বা অদুখক্তনি। নঙোন্দা তোল্লম্বা পাপকী লনদোল অদু শিংদোকখ্রবনিনা নহাক্না ঈপূরোইগা শীংলুপ অমত্তদা য়াওমিন্নবা ঙমলগনি। নহাক্না নহাক্কী পাপকী হৌনশা ওইবদুবু লাকশিন্দুনা থম্বা ঙমলগনি অমসুং শীংলুপ য়াওমিন্নদুনা অমদি ঈপূরোইনা হায়বা ইন্দুনা চৎমিন্নবা ঙমলগনি। মসিমকনি অশেঙবা বাইবলগী ওইবা খৃষ্ট্যান চৎনরোল।
English
খৃষ্ট্যানিতি করিনো অমসুং খৃস্ট্যানশিংনা করিবু থাজবগে?