ৱাহং
শেম্বিবা মপু লৈব্রা?
পাওখুম
শেম্বিবা মপু লৈ হায়বা মরম পিদুনা উৎপা ঙম্লোই নৎত্রগা লৈতে হায়বসু ঙম্লোই। শেম্বিবা মপু লৈ হায়বা ৱাফম অসি থাজবগী মপান্না ঐখোয়না থাজগদবনি হায়না বাইবলনা ঐখোয়দা হায়: “অদুনা থাজবা য়াওদনা শেম্বিবা মপু পেলহনবা ওইথোক্তে, মরমদি মহাক্কী মনাক্তা লাকপা মী খুদিং মহাক লৈ হায়বা থাজবা তাই অমসুং মহাকপু খৌরাংনা থীজবা মীশিংবু মহাক্না মনা পিবি।” (ইব্রীয়া 11:6) করিগুম্বা শেম্বিবা মপুনা নীংলবদি, ইবুংঙো মহাক ইচম চম্না উহনবা ঙম্মি অমসুং মহাক লৈ হায়বা তাইবংপান অপুম্বদা তাকপা ঙম্মি। তৌইগুম্বসুং করিগুম্বা ইবুংঙো মহাক্না মদু তৌরবদি, থাজবা লৈরুবগী কান্নবা লৈররোই। “অদুগা যীশুনা মঙোন্দা হায়, ‘নঙনা ঐবু উরবা মরম্না ঐবু থাজৈ, ঐবু উদ্রিবা অদুবু থাজবা মখোয় অদু য়াইফবনি’” (যোহান 20:29)
শেম্বিবা মপু লৈ হায়বগী পান্দম লৈতে হায়না হায়বা নত্তে। বাইবলনা ময়েক শেংনা তাকই, “সোরারেন্না শেম্বিবা মপুগী মতিক মঙাল লাউথোকই; অতিয়ানা ইবুংঙো মহাক্কী খুৎনা তৌখিবা থবকশিং শন্দোকই। নুমিৎ খুদিং মখোয়না লেপ্পা লৈতনা ৱা ঙাংথোকই; অহিং খুদিং মখোয়না লেপ্পা লৈতনা ইবুংঙো মহাক্কী খুৎনা তৌবা থবক লাউথোকই। মখোয়গী খোঞ্জেল লৈতে, মখোয়গী ৱাহৈ লৈতে; মখোয়দগী মখোল অমতা তাদে। অদুম ওইনমক মখোয়গী খোঞ্জেল মালেম শিনবা থুংনা চৎলি, মখোয়গী ৱাহৈ মালেমগী অরোইবা মফম ফাওবা য়ৌই” (ঈশৈ লাইরিক 19:1-4)। অতিয়াদা লৈরিবা থৱানমিচাকশিং য়েংবদা, মালেম অসি য়াম্না পাক চাউই খঙবদা, মহৌশাগী খুৎশেমগী অঙকপা য়েংবদা, কৌরৌ নুমিৎনা চঙবা উবদা ফজরিবা – হায়রিবা ময়াম অসিনা লৈশেম্বা মপু অমগী মরমদা তাকই। হায়রিবশিং অসিনা তাকপদা অৱাৎপা লৈরবসু, ঐখোয়গী থম্মোয়দা শেম্বিবা মপু লৈ হায়বগী পান্দমসু লৈরি। পাওশন্দোকপা 3:11 না ঐখোয়দা হায়, “. . .ইবুংঙো মহাক্না মীওইবগী থম্মোয়দা লোম্বা নাইদবগী খুভম শীন্দুনা থমলে।” হিংলিবা পুন্সি অসিগী মতুংদা করিগুম্বা খরা অমসুং তাইবংপান অসিগী ৱাংমদা কনাগুম্বা অমা লৈরি হায়না ঐখোয়গী থম্মোয় নুংদা খঙজবা অমা লৈ। খঙজরিবা অসি ঐখোয়না মশিং থাদবা ঙম্লোই, তৌইগুম্বসুং শেম্বিবা মপুনা ঐখোয়গী নুংদা অমসুং ঐখোয়গী অকোইবদা লৈরি হায়বা ময়েক শেংই। মসিগী মথক্তা, বাইবলনা চেকশিন ৱা ওইনা তাকই মদুদি, মী খরদি শেম্বিবা মপু লৈ হায়বা য়ারোই: “অপঙবনা মহাক্কী থম্মোয়দা হায়, ‘শেম্বিবা মপু লৈতে’” (ঈশৈ লাইরিক 14:1)। মালেমগী পুৱারীদা অয়াম্বা মীশিংনা, মাগী মাগী চৎনবি মতুং ইন্না, মীরোল খুদিংদা অমসুং লৈবাক খুদিংদা শেম্বিবা মপু অমা, করিগুম্বা অমা (নৎত্রগা কনাগুম্বা অমা) লৈরমগনি হায়না থাজনবা লৈ।
বাইবলনা শেম্বিবা মপু লৈ হায়না তাকপা অসিগী মথক্তা, মরম চাবা খন্নবা য়াবা ৱাফমশিং লৈরি। অহানবদা, ওন্তোলোজিকেল নৈনবা – মালেমদা লৈরিবা মহৌশাগী ওইবা মিৎনা উরিবা পোৎ-চৈশিংগী মরমদা নৈনবা। মহৌশাগী লৈরিবা পোৎ-চৈশিং নৈনদুনা খন্নবদা খ্বাইদগী মরু ওইবা ৱাফমদি, শেম্বিবা মপু লৈ হায়বগী মরমসিদা শেম্বিবা মপু করিনো হায়বগী ৱাখল্লোন অসিনা মরম পিরগা নৈনবা অসিনি। “শেম্বিবা মপুদি খঙবা ঙম্বদগী য়াম্না চাউবা হেল্লি” হায়বা শেম্বিবা মপুগী ৱাহনথোক অসিগা লোইননা হৌই। মসিনা তাকপদি লৈরি হায়বা ৱাফম অসিনা লৈতে হায়বা ৱাফমদগী চাউবা হেল্লি, মরম অসিনা খঙবা য়াবা শেম্বিবা মপু অমা শোইদনা লৈরমগনি। করিগুম্বা শেম্বিবা মপু লৈত্রবা, অদু ওইরবদি শেম্বিবা মপু মহাক খ্বাইদগী অচৌবা খঙবা য়াবা অদু ওইররোই, অদু ওইরবদি শেম্বিবা মপু হায়বগী ৱাহনথোক অসিগা চানদ্রে।
অনিশুবদা তেলিওলোজিকেল নৈনবা - পোৎ পুম্নমক্কী মতিক চাবা মরম অমম্ম লৈ। পোৎ পুম্নমক্কী মতিক চাবা মরম লৈ হায়বা ৱাখল্লোন অসিনা হায় মদুদি তাইবং মালেম অসি অঙকপা নীংথিজরবা শকওং শক্তম অমনি, মসিবু শেম্বা-শাবা লৈশেম্বা মপু অমা শোইদনা লৈরমগনি। খুদম ওইনা, মালেম অসিনা হৌজিক লৈরিবা হিংবগী মচাক পিবা য়ানবা কৌরৌ নুমিৎতগী লাপনা অমসুং নকনা মফম চানা থম্বিরে। ঐখোয়গী অকোইবদা লৈরিবা হিংবগী মচাকশিং অসিদগী করিগুম্বা মশিং খজিক নেম্না লৈরম্বদা, মালেমদা হিংলিবা থৱায় পানবশিং অমতা হিংবা ঙমলম্লোই। প্রোটিনগী মোলিকুইল মশিং 10243 গী মনুংদা 1 (10 গী মতুংদা ফুন মশিং 243) ওইরবা। সেল অমদা প্রোটিনগী মোলিকুইল মশিং মিলিয়নশিংনা য়াওরমগনি।
অহুমশুবা শেম্বিবা মপু লৈ হায়বগী ঙাংনরিবা ৱাফম অসিবু কোসমোলোজিকেল হায়না খঙনৈ। শাফু খুদিংগী হৌরকফম মরম লৈগনি। তাইবং-মালেম অমসুং মসিদা লৈরিবা পোৎ পুম্নমক অসি শাফু অমনি। লৈরিবা পোৎ খুদিংমক অসি ওইরকনবা করিগুম্বা হৌরকফম মরম লৈরমগনি। অদুগা লোইননা, করিগুম্বা “মরম করিসু লৈতবা” অমা লৈরমগনি, মদুনা মরম ওইদুনা লৈরিবা পোৎ পুম্নমক ওইহল্লকখি। পোৎ পুম্নমক ওইহল্লকখিবা “মরম করিসু লৈতবা” হায়বসি শেম্বিবা মপুবুনি।
মরিশুবা ঙাংনরিবা ৱাফম অসি মীওইবদা য়াওরিবা মহৌশাগী ওইবা ৱাখল্লোন হায়না কৌই। পুৱারী খুদিংদা মীওইবগী চৎনবিদা করিগুম্বা কাংলোন খরা অদুম য়াওই। চুম্মি নৎত্রগা লাল্লি হায়বা খঙবা ঙম্বগী ৱাখল মীপুম খুদিংদা য়াওই। মীহাৎপা, ওইদবা ৱা ঙাংবা, হুরানবা, অমসুং লমচৎ মোৎপা হায়বসি মালেমগী মনুংদা য়ানদবা ৱাফমনি। লাল্লি নৎত্রগা চুম্মি খঙবা ঙম্বা অসি অশেংবা শেম্বিবা মপুদগী লাকপা নৎত্রবদি কদাইদগী লাকই?
অসি পুম্নমক্কী মথক্তা, বাইবলনা ঐখোয়দা তাকই মদুদি মীওইবনা শেম্বিবা মপুগী মরমদা ময়েক শেংনা লৌশিন্দে অমসুং য়াদবা ঙম্লরোইদবা খঙবা অদু লৌশিনবা ঙমদে অদুগী মহুত্তা ওইদবা অদু থাজৈ। রোমীয় 1:25 দা অসুম্না হায়, “মখোয়না শেম্বিবা মপুগী অচুম্ববু ওইদবা অমগী দমক ওন্থোকই, অমসুং মতম চুপ্পদা থাগৎকদবা শেম্বিবা মপুগী মহুৎতা অশেম্বা পোৎশিংদা খুরুম্মি অমসুং থৌগল তৌই। অমেন।” মীওইবনা শেম্বিবা মপুদা থাজদবগী মরম্না ঙাকপিফম লৈতে হায়না বাইবলনা লাউথোকই: “তাইবংপা লৈশেম্বদগী শেম্বিবা মপুগী উবা ঙমদবা মগুনশিং – মহাক্কী লোম্বা নাইদবা পাঙ্গল অমসুং শেম্বিবা মপুগী খুৎশেম – ময়েক শেংনা উহল্লে, লৈশেমখ্রবশিংদগী খঙবা ঙমহল্লে, অদুনা মীওইবা ঙাকপিফম লৈতে” (রোমীয় 1:20)।
শেম্বিবা মপু লৈ হায়বসি “সাইন্সগী ওইবা ৱাফম নত্তে” নৎত্রগা “মতিক চাবা মরম পিবা লৈতে” হায়দুনা মীশিংনা লৌশিনবা ঙমদে। মসি ঙমদবগী মরমদি মখোয়না শেম্বিবা মপু লৈ হায়না য়াজরবদি, মখোয়গী পুন্সি শেম্বিবা মপুগী খৎতা লৈ হায়বা মখোয়না খঙবা তাই অমসুং মখোয় ইবুংঙো মঙোন্দগী ঙাকপিবা ফংবা মথৌ তাই (রোমীয় 3:23, 6:23)। শেম্বিবা মপু লৈরবদি, ঐখোয়না তৌরিবা থবক খুদিংগী দমক ইবুংঙো মহাক্কী মখাদা লৈগদবনি। করিগুম্বা শেম্বিবা মপু লৈত্রবদি, ঐখোয়না তৌনিংবা তৌবা য়ারে, শেম্বিবা মপুনা ঐখোয়বু ৱায়েল তৌগনি হায়্দুনা অকিবা লৈরোই। অসিনা মরম ওইদুনা শেম্বিবা মপু লৈতে হায়না থাজবা মীশিংনা মীওইবা তিন-কাংদগী ওল্লপনি হায়না কন্না থাজনৈ – মসিনা মখোয়দা শেম্বিবা মপুদা থাজবগী মহুৎতা অতোপ্পা অমদা থাজৈ। শেম্বিবা মপু লৈ অমসুং মীপুম খুদিংনা ইবুংঙো মহাক লৈ হায়বা থাজনৈ। কনাগুম্বা অমনা শেম্বিবা মপু লৈতে হায়না মরম পিদুনা হোৎনরিবা অসিগী অচাবা মরমদি শেম্বিবা মপু অমা লৈ হায়বা ৱাফম অসিনি।
শেম্বিবা মপু লৈ হায়বা ঐখোয়না মতৌ করম্না খঙবা ঙম্মি? খৃস্ত্যান অমা ওইনা, শেম্বিবা মপু লৈ হায়বা ঐখোয় খঙই মরমদি ঐখোয়না ইবুংঙো মঙোন্দা নুমিৎ খুদিং ৱারী তৌই। ইবুংঙো মহাক্না ঐখোয়দা খোঞ্জেল থোকনা ৱা ঙাংবা ঐখোয়না তাবা ঙমদে তৌইগুম্বসুং ইবুংঙো মহাক্না লোইনবা খঙবা ঙম্মি, ইবুংঙো মহাক্না চীংবিবা ঐখোয়না খঙবা ঙম্মি, ঐখোয়না মহাক্কী নুংশিবা খঙই, ইবুংঙো মহাক্কী থৌজাল ঐখোয়না পাম্মি। ঐখোয়গী পুন্সিদা থেংনরিবা থৌদোক খুদিংমক শেম্বিবা মপু নত্তনা খঙবা ঙমদে। শেম্বিবা মপুনা ঐখোয়বু য়াম্না ঙকপা মওংদা কনবিরে অমসুং ঐখোয়গী পুন্সি অহোংবা পিবিরে মসি ঐখোয় ইশানা তৌবা ঙমদে তৌইগুম্বসুং ইবুংঙো মহাক লৈ হায়বা য়াজৈ অমসুং থাগৎলি। খন্নরিবা ৱাফম অসিনা অচুম্বা অদুবু য়াবা ঙমদবা মী কনা অমতনা পুক্নিং চীংশিনবা ঙম্লোই। অরোইবদা, শেম্বিবা মপু অমা লৈ হায়বসি থাজবগী মপান্না লৌশিনগদবনি (ইব্রীয়া 11:6)। শেম্বিবা মপুদা থাজবা হায়বা অসি অমম্বদা চোংদুনা চৎপা মিৎতাংবা অমগা মান্নদে; মসিদি মী ময়াম তিল্লিবা থাউমৈ থান্দুনা নীংথিজনা ঙানবা কা অমদা অশোক-অকাই লৈতনা থাংজিনবা খোংথাং অমনি।
English
শেম্বিবা মপু লৈব্রা? শেম্বিবা মপু লৈ হায়বা খঙবা ঙম্নবা খুদম লৈব্রা?